رجيم الفواكه لانقاص الوزن 4 كيلو في اسبوع
ممكن يكون في كتير سمعوا عن رجيم الفواكه, وهو نوع الرجيم اللي بيعتمد على اكل الفاكهة بس طول اليوم, والرجيم ده مناسب للبنات اللي بيكونوا عايزين يخسسوا وزنهم بشكل سريع, والنهاردة من خلال السطور الجايه هنقولك ازاي تعملي رجيم الفواكه لانقاص الوزن.
رجيم الفواكه لانقاص الوزن:
الفواكه تعتبر مصدر طبيعي للسكر اللي الجسم بيمتصها بسهولة وبيحرقها بمجهود قليل, والفاكهة بتزود الشعور بالشبع وبتقضي على الجوع لانها بتحتوي على نسبة مرتفعة من الالياف, وفيتامين C, E, A, وغنية بالعناصر الغذائية زي الحديد والبوتاسيوم والمغنسيوم, اللي بتساعد على حماية الجسم من الاضرار لانها بتحتوي على مضادات الاكسدة اللي بتساعد على تقوية جهاز المناعة.
1- اليوم الاول:
اليوم الاول ده يعتبر اهم يوم لانه هو اللي هينظم للك باقي ايام الرجيم, اول يوم تقدري تاكلي اي انواع فاكهة على مدار اليوم ماعدا الموز والتمر لان فيهم سعرات حرارية عالية, وبننصحك تكتري من البطيخ والشمام لان فيهم كمية عالية من المية والعناصر الغذائية اللي هتساعد على خسارة الوزن بشكل افضل واسرع, ومع الفواكه اشربي من 10 – 12 كوباية مية كل يوم, اول يوم هتعتمدي على الفاكهة بس من غير اي حاجة تانية جنبها.
2- اليوم التاني:
اليوم التاني هيكون معتمد على اكل الخضروات بس باي كمية والخضروات تكون نية او مسلوقة من غير اي دهون, الخضروات غنية بالفيتامينات والعناصر الغذائية المهمة للجسم, وبننصحك يكون الفطار بطاطس مسلوقة لانها بتحتوي على نسبة كبيرة من الكربوهيدرات الضرورية اللي هتدي جسمك طاقة ونشاط خلال اليوم وعشان جسمك يقدر يحرقها باقي اليوم, تقدري خلال اليوم تاكلي اي انواع خضار زي الجزر, القرنبيط, الخيار, الخس, وغيرها من الخضروات, ومتنسيش شرب المية كمية متقلش عن 8 كوبايات لليوم التاني.
3- اليوم التالت:
اليوم التالت تقدري تجمعي ما بين الفاكهة والخضار وتاكلي منهم باي كمية طول اليوم, بس ابعدي في اليوم التالت عن البطاطس والموز, ممكن تاكلي الفاكهة في وجبة الفطار, والخضار في وجبة الغدا, ووجبة العشا ممكن تاكلي خضار وفاكهة تحلي بيها, واشربي 8 كوبايات مية على الاقل خلال اليوم, في اليوم التالت هتلاحظي انك عايزة تدخلي الحمام كتير وده دليل على طرد الجسم للسموم والدهون المتخزنة.
4- اليوم الرابع:
في اليوم الرابع جسمك هيكون اتعود على حرق الدهون بشكل اسرع, هيكون مسموح انك تاكلي موز وتشربي لبن خالي من الدسم, ممكن تاكلي خلال اليوم 8 ثمرات موز وتشربي 3 كوبايات لبن, ممكن تشوفي ان الكمية دي قليلة خلال اليوم وممكن متشبعكيش, لكن بعد مرور 3 ايام من الرجيم هتكون معدتك اتعودت على اكل كميات اكل صغيرة, وزعي الموز واللبن على ال 3 وجبات بتوعك طول اليوم, ممكن الصبح كوجبة فطار تاكلي 2 ثمرة موز مع كوباية لبن, ووجبة الغدا والعشا كلي في كل وجبة منهم 3 ثمرات موز مع كوباية لبن, توزيع الوجبات بالطريقة دي مش هتحسسك بالجوع خلال اليوم.
5- اليوم الخامس:
في اليوم الخامس هيكون مسموح تاكلي ارز بس يكون مسلوق من غير اي دهون خالص, في وجبة الفطار والعشا كلي 7 ثمرات طماطم وزعيهم على الوجبتين, الطماطم بتحتوي على نسبة عالية من حمض اليوريك اللي بيساعد على خسارة الوزن بشكل اسرع, وبالنسبة لوجبة الغدا كلي فيها كوباية ارز مسلوق من غير اي دهون.
6- اليوم السادس:
اليوم السادس هيكون بنفس نظام اليوم الخامس, وهتلاحظي في اليوم ده ان جسمك بدأ في التخلص من الدهون المتخزنة بشكل ملحوظ جدا, وان جهازك الهضمي بيشتغل بشكل احسن.
نصايح للرجيم:
– اشربي كوبايتين مية قبل الوجبات الرئيسية.
– حددي مواعيد ثابتة للنوم والصحيان والوجبات عشان تسرعي عملية التمثيل الغذائي.
– ممكن تمارسي التمارين بشكل يومي لخسارة الوزن بشكل اسرع.
– اتجنبي انك تكرري النظام ده اسبوعين ورا بعض, امشي عليه اسبوع واحد بس ولو عايزة تكرريه خدي فترة راحة متقلش عن 3 ايام وممكن تكرريه تاني بعدها.
– اليوم السابع ده يعتبر يوم فري تقدري تاكلي فيه اللي انتي عايزاه.
– لو حسيتي باجهاد اثناء الرجيم وقفيه فورا.
– لو بتعاني من الضغط العالي او السكر اتجنبي النظام ده.
