افضل 8 نصايح لمكياج تواجهي بيه حرارة الصيف

بقلمريهام محمود فيمكياج visibility567

اول ما يبدأ موسم الصيف لازم تكوني مستعدة لتأثير الجو من الحر والرطوبة, على بشرتك وشعرك ومكياجك, وعشان كده النهاردة هنقول لكل بنات حوا افضل نصايح لمكياج الصيف, عشان تحافظي عليه بقدر الامكان وتقدري تواجهي بيه حرارة الصيف والرطوبة.

نصايح لمكياج الصيف:

1- قشري بشرتك:

تقشير البشرة زي ما دايما بنقول هو مهم جدا عشان تتخلصي من خلايا الجلد الميتة وتنضفي المسام المسدودة, وده هيساعد على تهيئة البشرة للمكياج بشكل افضل, اعملي تقشير من مرة لمرتين في الاسبوع عشان تحافظي على بشرتك وتخلي المكياج يطلع بشكل احلى على الوش.

نصايح لمكياج الصيف

2- استخدمي برايمر:

لو انتي مش بتستخدمي برايمر طول السنة, في الصيف هيكون استخدامه ضروري سواء للوش كله والعيون والشفايف, وممكن تستخدمي الكونسيلر للعيون والشفايف لو مش متوفر عندك برايمر مخصوص ليهم.

 البرايمر يعتبر الخطوة التمهيدية اللي قبل المكياج اللي هتساعدك على تطبيق المكياج بشكل اسهل, وكمان هتحافظ عليه لفترة اطول من غير ما يسيح, ولان زي ما كلنا عارفين الرطوبة بتكون عالية جدا في الصيف البرايمر هيساعد في التحكم في لمعة البشرة لانه بيقلل الخطوط والمسام اللي ممكن تسبب افراز دهون زيادة على البشرة.

نصايح لمكياج الصيف

3- جربي المرطب الملون:

لو صعب انك تستغني عن الفونديشن وفي عيوب في بشرتك محتاجة انك تداريها, ممكن تستبدلي الفونديشن بمرطب ملون بيكون خفيف على البشرة وهيخلي شكلها مشرق وفي نفس الوقت هيديكي تغطية مناسبة, ممكن تشتري مرطب ملون وهتلاقيه في ماركات كتير, وممكن انتي تعمليه في البيت ببساطة امزجي كمية من الكريم المرطب يكون خالي من الزيوت مع كمية من الفونديشن العادي اللي انتي بتستخدميه, هيديكي لوك طبيعي وتغطية ناعمة مناسبة للصيف.

نصايح لمكياج الصيف

4- استخدمي الادوات الصح في تطبيق المكياج:

زي ما قولنا ان الافضل في الصيف تستخدمي مكياج خفيف, ولكن لازم تطبقيه بشكل صح عشان تمنعي افراز الزيوت على البشرة وتمنعي اللمعة, عشان كده بننصحك لما تيجي تطبقي المرطب الملون استخدمي Buffing brush اللي هي بتكون مخصوص لتوزيع كريم الاساس, الخطوة دي هتساعد ان الفونديشن او المرطب الملون يدوم فترة اطول, وهتمنع لمعة البشرة.

5- استخدمي منتج واحد لاكتر من مهمة:

ممكن تستخدمي منتج واحد للشفايف, والجفون, والخدود, وده بقى اتجاه منتشر جدا في الفترة الاخيرة لكتير من خبراء المكياج, انهم يعتمدوا على لوك مكياج بلون واحد ويستخدموا الروج مش بس للشفايف لكن كمان كبلاشر وايشادو, ده هيخلي انه سهل عليكي تاخدي منتج واحد بس في شنطتك من غير زحمة منتجات كتير, بالاضافة انه هيديكي لوك ناعم بلون موحد.

6- مكياج العيون:

مكياج العيون لوحده بيظهر شكل الوش جدا حتى لو مش حاطه اي مكياج خالص في الوش, بكل بساطة ممكن تعملي لوك كات ايز او عيون القطة باستخدام ايلاينر كريمي باللون الاسود, او تعملي لوك سموكي لعيون جذابة وملفته.

7- تسريحات الشعر:

الشعر يعتبر جزء مهم من المكياج لانه بيكمل اللوك بتاعك, وفي الصيف المفروض يكون مختلف شوية عن المواسم التانية, وممكن يكون في كتير من البنات بيفضلوا الشعر القصير في الصيف, ولكن سواء كان شعرك طويل او قصير لازم تستخدمي المنتج المناسب لفصل الصيف, عشان كده بننصحك باستخدام حامي من الحرارة لتصفيف الشعر بعد غسله عشان تحافظي عليه من حرارة الجو واشعة الشمس.

8- اعتمدي على المكياج المضاد للمية:

عشان تتجنبي ان مكياجك يسيح وخصوصا مكياج العيون, ممكن في الصيف تعتمدي على انواع المكياج المضادة للمية, وده يعتبر ضروري جدا في الصيف عشان تحافظي على مكياجك من الحر والرطوبة, والا لو استخدمتي المكياج العادي هتضطري انك تفضلي تجددي فيه طول اليوم, على عكس الايلاينر المضاد للمية هيتحمل معاكي حرارة الجو وتقدري تنزلي بيه المية كمان من غير ما يتأثر.

افضل افكار للوك مكياج طبيعي مناسب للصيف

افكار مكياج طبيعي للصيف