10 وصفات طبيعية للعين لازم كل بنت تعملهم
الاهتمام بالجلد اللي حوالين العين مهم جدا عشان تحميه بقدر الامكان من التجاعيد وتحافظي عليه صحي ونضر, وبعيدا عن كريمات العين اللي مهمتها الحفاظ على المنطقة دي, ماسكات العيون كمان بتلعب دور مهم, والنهاردة هنقولك على 10 وصفات طبيعية للعين هتحافظ على الجلد اللي حوالين عينيكي صحي.
وصفات طبيعية للعين:
1- ماسك الخيار ومية الورد:
المكونات:
1 معلقة صغيرة عصير خيار.
1 معلقة صغيرة مية ورد.
الطريقة:
اخلطي عصير الخيار مع مية الورد وقلبيهم مع بعض كويس, هاتي قطعتين قطن واغمسيهم في الخليط وحطي كل قطعة تحت العين لمدة 10 دقايق, وبعدين اغسليه.
الخيار بيحتوي على نسبة عالية من المية اللي بشرتك محتاجاه عشان تحافظي على رطوبة الجلد, ومية الورد ملطف للجلد.
2- ماسك زيت اللوز والعسل:
المكونات:
1 معلقة صغير زيت لوز حلو.
1 معلقة صغيرة عسل.
الطريقة:
اخلطي المكونات مع بعض كويس, ادهني منطقة تحت العين بالخليط وسيبيه وقت على قد ما تقدري, وبعدين اغسليه بالمية, كرري الماسك مرتين في الاسبوع لنتايج سريعة.
الماسك ده بيساعد على ترطيب الجلد تحت العين, وبيساعد على علاج الهالات السودا.
3- ماسك البطاطس:
ابشري البطاطس وافرديها تحت منطقة العين, سيبيها لمدة 20 دقيقة وبعدين اغسليها بالمية.
البطاطس مفيدة جدا في علاج انتفاخات العين والهالات السودا.
4- ماسك اكياس الشاي:
اغلي كيسين شاي وحطيهم في التلاجة لحد ما يسقعوا, وبعدين حطيهم على العين لمدة 10 دقايق, وبعدين شيليهم واغسلي المنطقة بالمية.
اكياس الشاي كمان من الطرق الممتازة جدا في التخلص من انتفاخات العين, والكافيين ومضادات الاكسدة الموجودة في الشاي ليها تأثير فعال جدا على منطقة حوالين العين.
5- ماسك الكيوي والزبادي:
اهرسي قطعة من ثمرة الكيوي وضيفي عليها زبادي لحد ما الخليط يبقى قوامه معقول وسهل الفرد على الجلد, افردي الخليط تحت العين وسيبيه 10 دقايق وبعدين اغسليه بالمية.
الماسك ده هايل جدا للجلد اللي حوالين العين وبيساعد على ترطيبه وبيديه نضارة واشراق وبينعش الجلد.
6- ماسك القهوة:
المكونات:
1 معلقة صغيرة قهوة.
1 معلقة صغيرة عسل.
الطريقة:
اخلطي القهوة والعسل وقلبيهم كويس مع بعض, حطي الخليط تحت العين, وسيبيه لمدة من 10 – 15 دقيقة وبعدين اغسليه بالمية.
الماسك ده من افضل الماسكات للعين, ومناسب لكل انواع البشرة, الكافيين بيقلل من الانتفاخ وتعب العين, والعسل بيساعد على ترطيب الجلد.
7- ماسك الكاكاو والكريمة:
المكونات:
1 معلقة صغيرة كاكاو.
1 معلقة صغيرة من كريمة اللبن.
الطريقة:
اخلطي المكونات مع بعض, ادهني منطقة تحت العين بالخليط, وسيبيه لمدة 20 دقيقة وبعدين اغسليه بالمية.
الماسك بيساعدد على مكافحة التعب والاجهاد, الكاكاو رائع جدا للتجاعيد ولشد الجلد, والكريمة ممتازة للترطيب.
8- ماسك الجيلاتين ومية الورد:
المكونات:
1 معلقة صغيرة جيلاتين بودر.
1 معلقة صغيرة مية ورد.
الطريقة:
اخلطي الجيلاتين ومية الورد مع بعض, افردي الخليط تحت العين وسيبيه لحد ما ينشف وبعدين اغسليه بالمية.
الجيلاتين غني جدا بالكولاجين, وده يعتبر عامل طبيعي مضاد للشيخوخة والتجاعيد, كرري الماسك من مرة لمرتين في الاسبوع قبل تطبيق كريم العين لو بتستخدميه.
9- ماسك زيت اللوز والبقدونس:
المكونات:
1 معلقة صغيرة زيت اللوز الحلو.
1 معلقة صغيرة عصير بقدونس.
الطريقة:
اخلطي المكونات مع بعض, ادهني منطقة تحت العين بالخليط, سيبيه لمدة 10 دقايق وبعدين اغسليه بالمية.
البقدونس غني جدا بالفيتامينات والزنك, وزيت اللوز مرطب جدا للجلد, يعني الماسك يعتبر فعال جدا لترطيب وعلاج منطقة تحت العين.
10- ماسك الافوكادو وجل الالوفيرا:
المكونات:
1 معلقة صغيرة افوكادو.
1 معلقة صغيرة من جل الالوفيرا.
الطريقة:
اهرسي الافوكادو وضيفي عليها جل الالوفيرا, قلبيهم مع بعض كويس, حطي الخليط تحت العين, سيبيه لمدة من 10 – 20 دقيقة وبعدين اغسليه بالمية, وممكن تستخدمي زيت الافوكادو بدل الافوكادو المهروس.
الافوكادو مغذي جدا للجلد, وجل الصبار مرطب هايل للجلد.