8 أخطاء بيعملوها المتجوزين جديد في أول حياتهم،اعرفيها وتجنبيها
انك تتجوزي الشخص اللي بتحبيه ده بيعتبر انجاز كبير طبعا، لكن الصعوبات اللي قابلتكم عشان توصلوا للمرحلة دي مانتهتش لسه، ولسه في ياما صعوبات هتقابلكم وعشان كده لازم تعرفوا ايه هي وتحاولي تتجنبيها أول بأول عشان الموضوع يبقى سهل أكتر عليكم، في المقال ده هنقولك على أشهر 8 أخطاء بيعملوها المتجوزين جديد في أول حياتهم،اعرفيها وتجنبيها
8 أخطاء بيعملوها المتجوزين جديد في أول حياتهم،اعرفيها وتجنبيها
1- مابيحطوش حدود للأهل و الأصدقاء
انك تحافظي على علاقاتك الشخصية سواء مع اهلك أو مع اصدقائك اوقات كتير بتبقى حاجة صعبة لما تنتقلي من كونك سينجل لكونك متزوجة، لأن معظم أوقاتك بقت تتقضي مع شخص تاني غيرهم وترتيب أولوياتك بيتغير، فبقيتي تقي اجازاتك و سفرياتك بعيد عنهم وممكن ماتبقيش قادرة تتواجدي معظم الأوقات زي الأول، وهنا بتبدأ الغيرة تظهر وخصوصا من الأهل والغيرة دي بتبدأ تخلق مشاكل زي “تيجي عند أمك وماتروحيش عند حماتك وحماتك تقول العيد تقضيه عندي مش عند أهلك” وكلام من النوع ده، وهنا لازم تاخدوا خطوة وتحطوا حدود للأهل والأصدقاء تجنبا لخلق المشاكل، والحدود دي تكون بانكم تتناقشوا معاهم ويفهموا ان الحياة الجديدة اللي بدأتوها بتفرض عليكم إلتزامات جديدة وفي نفس الوقت تحاولوا ترضوا الأطراف كلها بما يناسبكم باي طريقة تكون ممكنة.
2- تجاهل الأهل والأصدقاء
حاجة تانية من ضمن أخطاء بيعملوها المتجوزين جديد هي تحييد وتجاهل الأهل والأصدقاء، النقطة دي بتكمل النقطة الأولى اللي اتكلمنا فيها، مش معنى اننا بننصح بوضع حدود هو انك تكوني قاسية مع أهلك وأصدقاءك وتتجنبيهم او ان علاقتك بيهم تضعف وتقل، حاولي تخلقي نوع من التوازن بين كل العلاقات الموجودة في حياتك، لأن مش معنى ظهور حد جديد في حياتك انك تتخلي عن الناس المهمة.
3- انك تتوقعي ان جوزك مايعملش اي غلطات
الناس دايما بتتوقع انه بمجرد اتخاذ خطوة الجواز ان كده هما وصلوا للمثالية في علاقاتهم وانه خلاص مفيش خطوة أعلى من دي ممكن يعملوها، ولنه خلاص كل الغلطات والمشاكل والخلافات هتنتهي من حياتهم والحقيقة ان ده مش حقيقي، لأن مهما كنتى تعرفي الشخص اللي قدامك كونك دخلتي معاه في علاقة مهمة وجدية زي دي وبقيتوا عايشين مع بعض ككيان واحد، ده هيخليكوا تكتشفوا طباع جديدة في بعض مكن تخلق بعض الخلافات وبالتالي هتظهر غلطات، فلازم تتوقعي الغلطات دي وتتخلي عن النظرة الرومانسية بتاعت انكم هتعيشوا الأيام كلها في عشل لأنه جوزك خلاص مش هيعمل أي حاجة تضايقك.
4- مشاركة الأدوات الشخصية
طبعا الصورة اللي انتي شايفاها قدامك دي من أكتر المشاهد الرومانسية اللي بنشوفها في الأفلام والمسلسلات وبنقعد نتخيلها ونتمنى تحصلنا، فبتفكري ليه نشتري نوعين من معجون الأسنان مثلا لما ممكن نستخدم نوع واحد ونوفر فلوس ونقف نغسل أسنانا سوا كده زي المسلسلات او نستخم نفس اللوشن والمرطب و حاجات من النوع ده، الحقيقة انه بعد فترة لما تلاقي معجون الأسنان ناشف عشان هو بيكسل يقفله وانه المطرب خلصان ومفيش حاجة تستخدميها وانه اللوشن بتاعك اتساب على الارض لحد ما باظ هتبدأي تضايقي وتغضبي والحاجات الصغيرة دي هي اللي هتخلق بينكم الزهق وشوية شوية هتتحول لمشاكل كبيرة، خلي لكل حد منكم الأدوات الشخصية الخاصة بيه، دي حاجة تبان تافهة وبسيطة لكنها مهمة.
5- ان بيتك يبطل يبقى جديد
حياة جديدة يعني بيت جديد، عشان كده لازم طول الوقت تحسي معاه ان بيتكم جديد مهما مر عليه من الوقت ويكون مليان بتفاصيل تخصكم سوا بعيد عن التفاصيل المنفصلة لكل واحد فيكم سواء في أوضته او في بيته قبل الجواز، اختاروا كل حاجة في البيت الجديد سوا وافضلوا املوه بتفاصيل جديدة من اختياركم المشترك حتى لو كانت حاجة بسيطة زي برواز او فازة ورد وخلي الخطوة دي من وقت للتاني.
6- الاستعجال للخطوة التالية
أول حاجة بيبدأ يزن عليها الأهل من تاني يوم جواز هي الخلفة، بس شطارتك انك ماتديش اهتمام لأي ضغوطات عن الموضوع ده ولا تهتمي بأي مضايقات واتفقي انتي وشريكك على خطة زمنية تمشوا بيها لتطوير علاقتكم وشوفوا سوا انتوا حابين تخلفوا على طول ولا تستنتوا سنة او اتنين لحد ما تفهموا بعض أفضل وتبقى علاقتكم جاهزة أكتر لاستقبال طفل وتربيته، ماتستعجلوش على الخطوة التالية.
7- عدم التفكير في خطة مالية طويلة المدى
انكم تعيشوا شهر بشهر او يوم بيومخه ويكون اللي جاي على قد الرايح ده واحد من أسوأ الغلطات اللي ممكن تعملوها، لازم يبقى عندكم خطة مالية واضحة للسنين الجاية وحساب مدخرات بتوفوروا فيه فلوس عشان تقدروا توفوروا حياة أفضل ليكم ولأولادكم في المستقبل.
8- توقع ان علاقتكم هتفضل رومانسية للأبد
لازم تبقى نظرتك الرومانسية للحياة بتقابلها نظرة واقعية عن انه اوقات كتير هتكونوا انتوا الاتنين مرهقين عاطفيا ونفسيا ومش قادرين حتى تبصوا لبعض او تتكلموا مع بعض فأوقات كتير هتغيب الرومانسية عنكم وهيبقى مكانها اوقات جامدة وصعبة، فمهم تتوقعي ان علاقتكم مش للأبد هتكون رومانسية لكن كمان هتبقى في أوقات صعبة ويمكن حزينة لكن ده مش وحش أبدا لأن الأوقات الصعبة دي هي اللي هتقوي علاقتكم.
اعرفي معانا كمان 5 أسباب تشجعك تاخدي خطوة الجواز
