5 علامات تقولك انك محتاجة تغيري روتين العناية بالبشرة بتاعك فورا

ريهام محمود
ريهام محمود
في
بشرة
5522

اكيد مهم جدا ان كل بنت تحط نظام عناية مناسب لبشرتها وتلتزم بيه على طول عشان تحافظ عليها, لكن اكيد انه هيكون محبط جدا ليكي لو بعد العناية دي مش بتوصلي للنتيجة اللي انتي عايزاها وبتعاني بردو من عيوب في بشرتك, سواء كانت افراز زيوت زيادة, او بشرة خشنة, او فيها بقع, في الحالة دي ده معناه ان في غلطات بتقعي فيها في نظام العناية بالبشرة بتاعك, لكن الخبر الحلو ان غالبا بيكون في حلول سريعة وسهلة لعلاج المشاكل دي, والنهاردة من خلال موضوعنا هنقولك 5 علامات تقولك ان روتين العناية بالبشرة بتاعك غلط ومحتاجة تستبدليه عشان تحافظي على بشرتك صحية.

دليل روتين العناية بالبشرة:

1- البشرة المشدودة:

السبب: الافراط في التقشير او جفاف الجلد.

الحل: تغيير المنتجات اللي بتستخدميها لبشرتك, ومكونات الوصفات الطبيعية.

لو بشرتك دايما مشدودة ده معناه ان طبقة الجلد الواقية اللي بتحميها من الجفاف والحساسية والتهيج اتعرضت للخطر, وده ممكن يحصل بسبب استخدام مكونات او منتجات قاسية على البشرة زي الريتينول, او استخدام المنتجات اللي بتجرد البشرة تماما من الزيوت الطبيعية زي الصابون وانواع الغسول الرغوية, عشان كده ضروري انك تبصي على مكونات المنتجات وتتجنبي اللي بتحتوي على مكونات زي الصوديوم او السلفات, لانها ممكن تأثر على الطبقة الواقية للبشرة, البشرة المشدودة كمان ممكن يكون سببها الافراط في غسل بشرتك, او غسل البشرة بمية سخنة اوي, اللي بيأدي لتدمير الحاجز الدهني اللي بيحافظ على رطوبة للبشرة, عشان كده لازم تتأكدي انك تغسلي بشرتك بمية فاترة ومرتين بس في اليوم كحد اقصى.

التقشير كمان ممكن يخلي جلدك مشدود وحساس, عشان كده التقشير المفروض ميزدش عن مرة او مرتين بالكتير في الاسبوع, ومع ذلك لو انتي حاسه ان بشرتك مشدودة اوي بننصحك انك تاخدي راحة فترة من التقشير لحد ما تحسي ان بشرتك مرتاحة, راجعي نظام العناية ببشرتك كله والمنتجات اللي بتستخدميها بما فيهم التونر, المرطبات, السيروم, ودوري فيهم على مكونات زي AHAs,  وحمض الساليسيليك, والريتينول, وحاولي تتجنبيهم ومتستخدميش المنتجات اللي بتحتوي على مكونات تقشير طبيعية او بتسرع تجديد خلايا الجلد, يعني مثلا لو انتي التونر اليومي بتاعك بيحتوي على حمض الجليكوليك يبقى في الحالة دي اعملي تقشير للبشرة مرة واحدة بس في الاسبوع, واتأكدي انك متستخدميش التونر في نفس اليوم اللي قشرتي فيه بشرتك.

عشان تتخلصي من مشكلة البشرة المشدودة, انتي محتاجة لاعادة بناء بشرتك بروتين عناية لطيف او خفيف على البشرة مليان بمكونات ترطيبية للبشرة ومكونات نشطة زي حمض الهيالورونيك ومضادات الاكسدة, واعتمدي على طريقة التنضيف المزدوج انتي تدلكي البشرة الاول بالزيت, وبعدها استخدمي غسول خفيف على اساس مائي, وفي الاخر ادهني البشرة بسيروم وكريم مرطب, وزيت لو متوفر عندك, لان الجلد بيبقى مشدود بسبب قلة الرطوبة في الطبقة الخارجية, عشان كده هدفك الاول لحل المشكلة دي هو انك تدخلي الترطيب بشكل مكثف في روتين العناية بالبشرة بتاعك.

روتين العناية بالبشرة 1
روتين العناية بالبشرة 1

2- البشرة الدهنية:

السبب: التقلبات الهرمونية, تغيير الجو, نظام العناية بالبشرة.

الحل: تغيير نظام العناية بتاعك.

الحقيقة ان البشرة الدهنية او الليي بتفرز زيوت كتير ليها اسباب كتير, بعض الاسباب ممكن تقدري تسيطري عليها, وبعض الاسباب لا, وده ممكن يرجع للوراثة او التقلبات الهرمونية, بما فيهم مرحلة البلوغ, الدورة الشهرية, الحمل, او تأثير تحديد النسل.

كتير من البنات بيتعاملوا مع البشرة الدهنية بشكل غلط خالص وبيختاروا نظام عناية مش مناسب ليها, ويمكن اللي كتير ميعرفوش وممكن يكون مفاجيء ان البشرة الدهنية غالبا علامة على جفاف الجلد, لان الحقيقة ان البشرة لما بتعاني من نقص في الرطوبة بتحاول تعويض النقص ده عن طريق افراز زيوت زيادة, عشان كده مهم جدا الترطيب بانتظام بمرطب خفيف يدخل جوه البشرة ويرطبها بعمق من غير ما يسد المسام, دوري دايما على الجل او المرطب اللي على اساس مائي, او سيروم بيحتوي على حمض الهيالورونيك, ده عنصر مرطب بشكل مكثف موجود بشكل طبيعي في جسمك وبشرتك.

الجو كمان ممكن يأثر على البشرة ويزود افراز الزيت, التعرض للجو البارد ممكن يأثر على حجاز بشرتك, وكمان التعرض للشمس, او زيادة درجة الحرارة والرطوبة, عشان كده هتلاحظي دايما بزيادة افراز الزيوت في البشرة مع تغيير المواسم.

روتين العناية بالبشرة 2
روتين العناية بالبشرة 2

3- ملمس غير موحد للبشرة:

السبب: تراكم الجلد الميت.

الحل: التقشير اكتر من مرة, او استخدام التونر.

ملمس البشرة الغير موحد, حله بسيط وهو انك محتاجة تقشري بشرتك بشكل مكثف, لان ده غالبا بيكون سببه تراكم الجلد الميت على سطح الجلد, ولما تحسسي على البشرة هتحسي بالملمس ده, وعشان تبدأي حل المشكلة قشري البشرة مرة او مرتين في الاسبوع باستخدام فرشة التنضيف, او السكراب, او التقشير الكيميائي, التقشير الكيميائي يعتبر من الحلول الممتازة جدا لحل المشكلة دي, لانه هيخلصك من كل الجلد الميت.

لكن مع ذلك بننصحك انك متستخدميش التقشير وانتي رايحة البحر وهتتعرضي للشمس, وخليكي بعيدة عن التقشير القاسي للبشرة, ولو التونر بتاعك في مكونات تقشير كيميائي يبقى متستخدميهوش اكتر من مرة واحدة بس في اليوم, ومتستخدميهوش في نفس اليوم اللي قشرتي فيه بشرتك, لازم بعد التقشير تتأكدي انك تستخدمي واقي من الشمس عشان تحمي بشرتك من اضرار اشعة الشمس.

روتين العناية بالبشرة 3
روتين العناية بالبشرة 3

4- نتؤات وحبوب حمرا صغيرة:

السبب: تنضيف البشرة بشكل قوي.

الحل: استخدمي المنتجات بشكل تدريجي على البشرة.

لو بشرتك فيها حبوب او نتؤات حمرا صغيرة, ده ممكن يحصل بسبب استخدام غسول بيحتوي على مكونات قوية اتسببت في تهيج البشرة.

وفي سبب تاني انك ممكن تكوني بتستخدمي اداة جديدة لتنضيف البشرة بتكشط الجلد بشكل قوي, وفي الحالة دي لازم توقفي استخدامها وتريحي بشرتك, وبمجرد ما بشرتك ترتاح, ممكن ترجعي تستخدمي المنتج بتاعك بشكل تدريجي على البشرة, يعني ابدأي بمرة واحدة او مرتين في الاسبوع وبعدين زودي بالتدريج في الاسابيع اللي بعد كده, ولو لقيتي بشرتك بتتعب تاني يبقى متضغطيش عليها وتديها اكتر من اللي محتاجاه.

روتين العناية بالبشرة 4

5- احمرار او حساسية البشرة:

السبب: العوامل الخارجية والجو, الافراط في التقشير, استخدام مكونات قوية.

الحل: بدلي مكونات التقشير القوية بمكونات خفيفة.

الجلد الحساس ممكن يحصل لعوامل كتير بتسبب تهيج الطبقة الخارجية  من الجلد لان الحاجز الطبيعي لبشرتك بيكون ضعيف, وده بيخليها تتأثر بسهولة بالعوامل الخارجية زي اشعة الشمس, الطقس البارد, المية السخنة, الاجهاد, التغييرات الهرمونية, او قلة النوم.

لو انتي اصلا بشرتك مش حساسة بشكل طبيعي, لكن حسيتي في وقت انها حساسة وحمرا وملتهبة, ده ممكن يكون بسبب التقشير الزيادة, لان التقشير الزيادة ممكن يضعف الطبقة الخارجية لبشرتك, ويخليها معرضة للبكتيريا والتهيج, وتلف البشرة, ومن اكتر اعراض التقشير الزيادة انك بعد التقشير لو جيتي تحطي اي منتج على البشرة ممكن تحسي بلسعه او حرقان, وفي الحالة دي لازم تاخدي استراحة من التقشير لمدة كام اسبوع لحد ما بشرتك ترتاح, وابعدي عن المكونات القوية زي الريتينول, واعتمدي على روتين خفيف لبشرتك.

روتين العناية بالبشرة 5

مقالات متعلقه

مكون واحد بس لمنع علامات الشيخوخة

مكون واحد بس لمنع علامات الشيخوخة

6 حاجات بنعملها كل يوم بتدمر بشرتنا من غير ما نحس

6 حاجات بنعملها كل يوم بتدمر بشرتنا من غير ما نحس

منتجات للعناية بالبشرة مش محتاجاها وبتضيعي فلوسك عليها!

منتجات للعناية بالبشرة مش محتاجاها وبتضيعي فلوسك عليها!