10 وصفات بروتين للشعر طبيعية وفعالة عشان ترجعي شعرك صحي وتعالجي التلف

ريهام محمود
ريهام محمود
في
شعر
50736

الشعر بيتكون من الكيراتين ومجموعة من الاحماض الامينية, او باختصار بيتكون من البروتين, والاستخدام المستمر للمواد الكيميائية القاسية واستخدام الحرارة على طول والتعرض للتلوث في الجو, كل ده بيأثر على الشعر وبيخليه هش وجاف وتالف, والطريقة الوحيدة عشان ترجعي شعرك صحي, انك تديه اللي فقده وهو البروتين, عشان كده النهاردة من خلال موضوعنا هنقولك وصفات بروتين للشعر هترجعه صحي تاني وهتعالج التلف والجفاف والهيشان.

على الرغم من انه دلوقتي موجود في صالونات التجميل انواع كتير من العلاج بالبروتين للشعر, لكن في الاسهل والارخص ليكي وفي نفس الوقت هتديكي نتيجة فعالة هي وصفات بروتين للشعر بمكونات طبيعية, الوصفات دي بتساعد على علاج نقص الكيراتين والبروتين من الشعر ودي هيخلي الشعر اقوى وصحي اكتر من غير ما تستخدمي مواد كيميائية.

لكن قبل ما تبدأي وصفات بروتين للشعر لازم تعرفي الاول اذا كان شعرك فعلا محتاج ده ولا لا, لو الشعر بتحسي انه جاف وناشف بس في الحالة دي انتي محتاجة بس ترطيب زيادة للشعر, لكن لو لاحظتي ان الشعر مقصف وبيتكسر اثناء غسيله في الحالة دي ممكن يبقى الشعر محتاج جدا للبروتين, زي البيض, اللبن, المايونيز, الافوكادو, حليب جوز الهند, دي تعتبر بعض المصادر الغنية بالبروتين, واللي ممكن تستخدميها في الوصفات لتغذية الشعر بالبروتين.

وصفات بروتين للشعر:

1- وصفة البيض والزبادي:

المكونات:

1 بيضة كاملة.

2 معلقة كبيرة زبادي.

لو شعرك طويل تقدري تضاعفي الكمية اللي تكفي طول وكثافة شعرك.

الطريقة:

في طبق او بوله صغيرة اضربي البيضة مع الزبادي لحد ما الخليط يبقى ناعم, لو شعرك جاف اوي استخدمي صفار البيضة بس, لو شعرك دهني استخدمي البياض بس, لو شعرك عادي او مختلط استخدمي البيضة كاملة.

ادهني فروة الراس والشعر كله بالخليط, وسيبيه لمدة 30 دقيقة, وبعدين اغسليه بمية باردة مع الشامبو والبلسم.

ممكن تضيفي للخليط كام نقطة من اي زيت عطري زي زيت اللافندر عشان ريحة البيض.

تقدري تكرري الوصفة دي مرتين في الاسبوع.

البيض مليان بالبروتين وهيساعد على تنعيم الشعر جدا, والزبادي بيساعد على تنضيف فروة الراس والشعر بشكل فعال.

وصفات بروتين للشعر 1
وصفات بروتين للشعر 1

2- وصفة صفار البيض والعسل:

المكونات:

صفار بيضة.

1 معلقة كبيرة عسل.

1 معلقة كبيرة زيت لوز حلو.

الطريقة:

اخلطي المكونات كلها مع بعض لحد ما يبقى الخليط ناعم.

حطي الخليط على الشعر كله وسيبيه لمدة من 15 – 20 دقيقة, وبعدين اغسليه بمية باردة مع الشامبو والبلسم.

كرري الوصفة مرتين في الاسبوع.

متستخدميش الوصفة دي لو شعرك دهني, ومتسيبيش الوصفة اكتر من 20 دقيقة لان العسل بيحتوي على خصائص تفتيح ممكن يفتح لون شعرك لو سيبتيه فترة طويلة.

والوصفة دي تعتبر من افضل الوصفات لو شعرك جاف وناقصه بروتين, البيض هيدي شعرك البروتين اللي محتاجه, وزيت اللوز والعسل هيدوا شعرك الرطوبة, ولو حابه تفتحي شعرك او تعملي له هايلايت بطريقة طبيعية العسل هيكون افضل مكون للمهمة دي.

وصفات بروتين للشعر 2
وصفات بروتين للشعر 2

3- وصفة الافوكادو وحليب جوز الهند:

المكونات:

1 ثمرة افوكادو.

2 معلقة كبيرة من حليب جوز الهند.

1 معلقة صغيرة زيت زيتون.

الطريقة:

اهرسي الافوكادو لحد ما تبقى ناعمة ومافيهاش اي كتل, وبعدين ضيفي لها حليب جوز الهند وزيت الزيتون, وقلبي المكونات كلها مع بعض كويس.

حطي الخليط على فروة الراس والشعر كله, سيبيه لمدة 30 دقيقة, وبعدها اغسليه بالشامبو والبلسم.

متستخدميش الوصفة دي لو شعرك دهني, لان الافوكادو ممكن يزود دهون الشعر.

حليب جوز الهند غني بالبروتين, والافوكادو بيحتوي على فيتامين A, B, E, وكلها عناصر مفيدة جدا لصحة الشعر, الوصفة دي كمان بتساعد على زيادة انتاج الكولاجين اللي بيعزز نمو الشعر, وزيت الزيتون بيساعد على ترطيب الشعر.

وصفات بروتين للشعر 3
وصفات بروتين للشعر 3

4- وصفة حليب جوز الهند:

المكونات:

3 معالق كبيرة من حليب جوز الهند.

الطريقة:

سخني حليب جوز الهند على نار خفيفة لحد ما يبقى دافي “متزوديش في تسخينه اوي”, اعملي مساج لفروة الراس بحليب جوز الهند الدافي, وحطيه على الشعر كله.

لفي شعرك بفوطة او ممكن  تغطيه بكيس بلاستيك وتربطي عليه سكارف, سيبيه طول الليل, واغسلي تاني يوم الصبح بالشامبو والبلسم.

كرري الوصفة مرتين في الاسبوع.

حليب جوز الهند غني جدا بالاحماض الدهنية المشبعة والفيتامينات B, C, E, كل العناصر دي هتساعد على استعادة البروتين للشعر, كمان الوصفة بتساعد على علاج قشرة الشعر بشكل فعال جدا, وزيادة نمو الشعر بشكل صحي.

وصفات بروتين للشعر 4
وصفات بروتين للشعر 4

5- وصفة الموز والافوكادو:

المكونات:

1 ثمرة موز.

1 ثمرة افوكادو.

1 معلقة كبيرة من زيت جنين القمح.

1 معلقة صغيرة زيت ورد.

الطريقة:

اهرسي الموز والافوكادو كويس لحد ما يبقى ناعم ومافيش اي كتل, وبعدين ضيفي لهم الزيوت.

حطي الخليط على الشعر وسيبيه لمدة ساعة, وبعدين اغسليه بمية باردة مع الشامبو والبلسم.

كرري الوصفة مرة واحدة في الاسبوع, ومرتين لو شعرك جاف اوي.

متستخدميش الوصفة دي لو شعرك دهني.

الموز غني بالاحماض الامينية اللي بتساعد على اصلاح تلف البروتين في شعرك, والافوكادو غني بالفيتامينات الاساسية اللي بتحافظ على صحة الشعر, والوصفة كلها غنية بمضادات الاكسدة اللي بتمنع الضرر وتلف الشعر.

وصفات بروتين للشعر 5

6- وصفة المايونيز والافوكادو:

المكونات:

1 معلقة كبيرة مايونيز.

1 ثمرة افوكادو.

الطريقة:

اهرسي الافوكادو كويس, وبعدين ضيفي له المايونيز, وقلبيهم مع بعض كويس.

حطي الخليط على الشعر وسيبيه لمدة ساعة, وبعدين اغسليه بالمية الباردة مع الشامبو والبلسم.

كرري الوصفة مرة واحدة في الاسبوع.

متستخدميش الوصفة دي لو شعرك دهني.

المايونيز بيحتوي على البيض الغني بالبروتينات اللي بيوفر التغذية لشعرك, والوصفة مليانة بالزيوت الدهنية اللي بترطب الشعر, باستخدام الوصفة دي بشكل اسبوعي هتخلي شعرك ناعم وبيلمع.

وصفات بروتين للشعر 6

7- وصفة الافوكادو والبيض:

المكونات:

1 بيضة كاملة.

1 ثمرة افوكادو.

2 معلقة صغيرة زيت زيتون.

الطريقة:

اهرسي الافوكادو كويس, واخلطي معاها باقي المكونات وقلبيهم مع بعض كويس.

حطي الخليط على فروة الراس وعلى الشعر كله وسيبيه لمدة 30 دقيقة, وبعدين اغسليه بالمية الباردة مع الشامبو والبلسم.

كرري الوصفة مرة واحدة في الاسبوع, وتقدري تكرريها مرتين لو شعرك ناشف اوي وتالف, ومتستخدميهاش اكتر من مرة واحدة بس في الاسبوع لو شعرك دهني.

الوصفة دي مرطبة ومغذية للشعر, زيت الزيتون اللي موجود فيها يعتبر مرطب طبيعي للشعر وبيخلي الشعر ناعم, والبروتينات اللي موجودة في البيض مع الفيتامينات اللي موجودة في الافوكادو هتدي شعرك الكمية المناسبة من التغذية اللي محتاجها شعرك.

وصفات بروتين للشعر 7

8- وصفة الزبادي والكريمة والبيض:

المكونات:

1 بيضة كاملة.

1 معلقة كبيرة كريمة.

2 معلقة كبيرة زبادي.

الطريقة:

اخلطي المكونات كلها مع بعض كويس, حطي الخليط على فروة الراس والشعر كله, وسيبيه لمدة 45 دقيقة, وبعدين اغسليه بالمية الباردة مع الشامبو والبلسم.

كرري الوصفة دي مرتين في الاسبوع للشعر الجاف, ومرة واحدة للشعر الدهني.

زي ما قولنا الزبادي ممتازة جدا لتنضيف فروة الراس والشعر, والوصفة كلها مغذية ومرطبة للشعر.

وصفات بروتين للشعر 8

9- وصفة الافوكادو وزيت جوز الهند:

المكونات:

1 ثمرة افوكادو.

1 معلقة كبيرة زيت جوز الهند.

الطريقة:

اهرسي ثمرة الافوكادو وضيفي لها زيت جوز الهند وقلبيهم مع بعض كويس.

حطي الخليط على شعرك وسيبيه لمدة 45 دقيقة, وبعدين اغسليه بالشامبو والبلسم.

كرري الوصفة مرة واحدة في الاسبوع, ومتستخدميش الوصفة دي لو شعرك دهني.

زيت جوز الهند من انواع الزيوت اللي بتدخل في الشعر بعمق, ده غير انه غني بالاحماض الدهنية اللي بتساعد على علاج تلف البروتين مع الافوكادو بيعمل خلطة ممتازة وفعالة جدا لشعر قوي وصحي.

وصفات بروتين للشعر 9

10- وصفة المايونيز والبيض:

المكونات:

بياض بيضة.

2 معلقة كبيرة مايونيز.

الطريقة:

اخلطي المكونات مع بعض كويس, حطي الخليط على الشعر وسيبيه لمدة من 30 – 45 دقيقة, وبعدين اغسليه بالشامبو والبلسم.

كرري الوصفة مرة واحدة في الاسبوع, لو شعرك مختلط حطي الوصفة على نص الشعر اللي تحت بس من غير الجذور.

البيض والمايونيز مليانين بالبروتين, عشان كده الوصفة دي تعتبر ممتازة جدا لترطيب وتغذية الشعر.

وصفات بروتين للشعر 10

مقالات متعلقه

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية

افضل زيوت للشعر الخفيف هتساعدك على تكثيفه

افضل زيوت للشعر الخفيف هتساعدك على تكثيفه