طريقة عمل الراتاتوي “خلطبيطة بالصلصة” بالخطوات والفيديو

ريهام محمود
ريهام محمود
في
مطبخ
3936

كلنا اكيد بنعشق فيلم الفار الطبخ وعارفين اشهر اكله عملها في الفيلم ده وهي الراتاتوي او خلطبيطة بالصلصة, وكلنا بعد ما شوفناها في الفيلم بقى نفسنا نجربها وندوق طعمها, الاكلة دي تعتبر من اشهر الاكلات في فرنسا واللي مش بتخلى منها السفرة الفرنسية, واحنا النهاردة زي ما عودنا بنات حوا اننا بنجيبلهم كل حاجة جديدة ومختلفة, جيبنالكم طريقة عمل الراتاتوي بالخطوات والفيديو.

طريقة عمل الراتاتوي:

مكونات الصلصة:

– 900 جرام طماطم.

– 250 جرام فلفل رومي.

– 200 جرام بصل.

– 200 جرام جزر.

– 100 جرام كرفس.

– 60 جرام فلفل حار “اختياري”.

– 60 جرام زبدة.

– 2 فص ثوم.

– 1 معلقة كبيرة ملح.

– 1 معلقة كبيرة سكر.

– زعتر.

– ريحان.

– بهارات “ممكن تضيفي اي انواع بهارات بتفضليها في الاكل”.

طريقة عمل الراتاتوي 1
طريقة عمل الراتاتوي 1

مكونات طبقة الخضروات:

– ¼ كيلو كوسة.

– ¼ كيلو باذنجان.

– 280 جرام طماطم.

– 200 جرام بطاطس.

– 200 جرام بصل.

– 140 جرام فلفل رومي.

– 4 معالق كبيرة زيت زيتون.

– 2 معلقة صغيرة ملح – فلفل.

– زعتر.

طريقة عمل الراتاتوي 2

طريقة تحضير الصلصة:

1- اشوي الفلفل الرومي رصيه على صينية ودخليه الفرن على درجة حرارة 180 درجة لمدة 20 دقيقة.

2- هاتي الطماطم اعملي لها بالسكينة حرف X من فوق وحطيها في مية مغلية لمدة 10 دقايق.

3- طلعي الطماطم من المية وقشريها واضربيها في الخلاط.

4- في حلة كبيرة حطي زيت الزيتون وشوحي فيه البصل المتقطع والجزر والكرفس, وضيفي الزبدة, وبعدين حطي عليهم عصير الطماطم, وضيفي ورقتين ورق لوري.

5- قشري الفلفل المشوي, وقطعيه وضيفيه لخليط الطماطم على النار.

6- ضيفي البهارات, والثوم, والفلفل الحار, والملح, والسكر.

7- غطي الحلة وسيبيها على نار خفيفة لحد ما تتقل شوية, وبعدين شيلي الغطا وسيبيها على نار خفيفة شوية كمان لحد ما تلاقيها تقلت معاكي وبقت سميكة.

طريقة عمل الراتاتوي 3
طريقة عمل الراتاتوي 3

8- اثناء طبخ الصلصة ابدأي قطعي الخضار اللي عندك حلقات رفيعة بسمك من 3 – 5 ملم.

9- ضيفي الزعتر والريحان لخليط الصلصة في الاخر خالص وشيلي ورق اللوري, وارفعيها من على النار واضربي كل المكونات بالبلندر اليدوي او في الخلاط.

10- صبي خليط الصلصة في صينية كبيرة, ورصي الخضار جنب بعض شريحة من كل نوع وهكذا لحد ما تخلصي الكمية اللي عندك كلها.

11- اخلطي 4 معالق زيت الزيتون مع الزعتر والملح والفلفل وصبيها فوق الخضار في الصينية.

12- غطي الصينية بالورق الفويل ودخليها الفرن على درجة حرارة 160 درجة, وسيبيها لحد ما تستوي ¾ سوا تقريبا, وبعدين شيلي الورق الفويل وسيبيها تكمل سواها لحد ما الخضار كله يستوى ويبقى طري, هتاخد تقريبا 50 دقيقة يف الفرن.

13- طلعيها ورشي عليها بقدونس متقطع وقدميها سخنة, كطبق جانبي, الفرنسيين دايما بياكلوا جنبها لحمة مشوية.

طريقة عمل الراتاتوي 4

الطريقة بالفيديو:

مقالات متعلقه

وصفة شوربة الفاصوليا البيضا

وصفة شوربة الفاصوليا البيضا

طريقة عمل الفلفل المحشي باللحمة المفرومة على الطريقة الايطالية

طريقة عمل الفلفل المحشي باللحمة المفرومة على الطريقة الايطالية

طريقة عمل الزبادي في البيت

طريقة عمل الزبادي في البيت