ازاي توقفي الاهتمام بشخص مش مهتم بيكي !

بقلمريهام محمود فيعلاقات visibility2502

لما تكوني في حالة حب اكيد ده احلى احساس ممكن تمري بيه في حياتك, واكيد هتتمني ان الحب ده يدوم للابد, لكن مش ده اللي دايما بيحصل, لانه احيانا ممكن تقعي في حب شخص مش حاسس بيكي او شخص مش بيحبك قد ما انتي بتحبيه, وهنا بتبدأ المشكلة, عشان كده احنا النهاردة من خلال موضوعنا هنقولك ازاي توقفي الاهتمام بشخص مش مهتم بيكي.

ازاي توقفي الاهتمام بشخص مش مهتم بيكي:

اكيد الاهتمام يعتبر علامة صحية على الحب في العلاقات وكلنا بنكون محتاجين ده, لكن متخليش احتياجك يخليكي تستهلكي مشاعرك في المكان الغلط, لازم مشاعرك تبقى في المكان الصح ومتخليهاش تتحكم فيكي وفي قراراتك, يعني لو شخص مش مهتم بيكي, متحطيش كل تركيزك انك تغيري ده وتقولي بكره يهتم, او تفكري في نفسك انك متستحقيش الحب لما تلاقيه مش بيبادلك نفس المشاعر, لو الشخص ده مش حاسس بقيمتك يبقى لازم انتي اللي تراجعي نفسك في تفكيرك فيه.

انتي محتاجة تركزي انك تكوني متعاطفة مع نفسك, وتحسي بقيمة نفسك كويس جدا وان عندك كتير اوي تقدري تعمليه لحياتك وتطوري نفسك وشخصيتك وتخليها اقوى وافضل, في اللحظة اللي هتعرفي فيها قيمة نفسك وانك لازم تتعاملي باحترام وبشكل افضل هتبدأي فيها تاخدي قرارات افضل وعلاقات افضل, والشخص اللي يعاملك بقلة احترام لازم يكون في رد فعل قوي منك اتجاه تصرفاته, متستمريش ابدا في علاقة مع شخص بيقلل منك او مش حاسس بقيمتك, اطلبي منه انه يحترمك او يعاملك بطريقة افضل ولو ده محصلش يبقى تبعدي عن الشخص ده فورا ومتتواصليش معاه تاني.

واول ما تحسي انك تستحقي الاحترام وتستحقي الحب مش هتقبلي بأقل من كده, وهتبدأي انك تقللي من رأي الشخص ده فيكي ومش هيبقى فارق معاكي, وهتدخلي في حياتك الاشخاص اللي بيقدروا قيمتك وبيعاملوكي باحترام.

لو انتي بقى بتحاولي انك تبعدي عن الشخص اللي مش مقدر قيمتك ومش قادرة هنقولك شوية نصايح تساعدك على ده:

1- متتواصليش معاه بأي طريقة:

متحاوليش انك تتصلي بيه, ولا تبعتي رسايل على اي وسيلة سواء ايميل او فيسبوك او واتس اب او غيره, متحاوليش تدخلي نفسك في العالم بتاعه او تدوري وراه وتعرفي اخباره, متقضيش وقتك في التركيز هو بيعمل ايه ومبيعملش ايه في حياته, او تحاولي تعرفي اي حاجة تخصه.

ازاي توقفي الاهتمام بشخص مش مهتم بيكي

2- ركزي على حياتك الخاصة:

ركزي على حياتك, كوني صداقات جديدة دخلي في حياتك ناس جديدة, اخرجي مع اصحابك, او اتصلي باصحابك القدام اللي بقالي كتير متكلمتيش معاهم, غيري جو وابسطي نفسك, سافري, اطلعي رحلة, ابدأي هواية جديدة, اتعلمي حاجة جديدة, دوري على حاجات تهتمي بيها واشغلي وقتك باستمرار.

ازاي توقفي الاهتمام بشخص مش مهتم بيكي

3- المعاملة بالمثل:

العلاقة السعيدة الصحية هي اللي بتقوم على المعاملة بالمثل, اي علاقة لازم يكون الحب والاحترام متبادل بين الطرفين, لان ده اساس الثقة بينهم, عشان كده ضروري انك تفهمي كويس في اي علاقة مع شخص لازم تخلي نفسك واحتياجاتك هي اللي ليها الاولوية, وتعامليه زي ما بيعاملك بالظبط, يعني لو مش مهتم يبقى انتي كمان متهتميش وتفكري في نفسك انتي اهم من اي حاجة وقبل اي حد, اكيد الحب والارتباط حاجة حلوة جدا ولكن لما تكون صحية, لكن لو غير كده يبقى لازم تنهيها.

4- حبي نفسك:

حب النفس مش انانية ابدا, حب الذات دي حاجة صحية ومهمة جدا, بمعنى انك تقبلي نفسك زي ما انتي وتقبلي عيوبك ونقط قوتك, واكيد كل واحد فينا فيه مميزات وفي عيوب ممكن يكون محتاج يشتغل عليها او يحسنها, ومهم انك تكوني مدركه ان مش لازم كل الناس تحبك ده عادي وطبيعي, لكن قبول نفسك هو ده الاهم, عشان كده لو علاقتك منجحتش مع شخص دي مش مشكلة كبيرة او كارثة, لان دايما انتي عندك نفسك والعالم كله مفتوح قدامك واكيد هتلاقي شخص افضل, ولكن في الوقت ده فالشخص اللي محتاج الحب فعلا هو انتي, ودايما افتكري انك تستحقي انك تكوني سعيدة.

5- سامحي:

احيانا كتير بيكون عدم نسيانا لشخص معين او اننا مش عارفين نبطل تفكير فيه انه يكون اذانا او جرحنا باي شكل, وده بيخلينا نفضل مرتبطين بيه وبيبقى ليه قوة في حياتنا وفي تفكيرنا, واكيد لما نتعرض لاذيه وجرح من شخص ده مش سهل اننا ننساه لاننا دايما بنفضل نفكر نفسنا بيه, عشان كده بننصحك انك تسامحي لان اللحظة اللي هتسامحي فيها هتحرري نفسك من الشخص ده انه يسمم حياتك او يبوظها وهتقدري تبطلي تفكير فيه, وده ممكن يكون صعب انه يتعمل لكن مش مستحيل وتقدري انك تعمليه عشان نفسك وحياتك.

علامات تقولك انك في علاقة غير صحية وانك لازم تفكري فيها من جديد

علامات تقولك انك في علاقة غير صحية وانك لازم تفكري فيها من جديد
علامات تقولك انك في علاقة غير صحية وانك لازم تفكري فيها من جديد