ازاي تجهزي وجبات السفر والرحلات وتختاري الاكلات المناسبة

بقلمريهام محمود فيمنوعات visibility490

اكيد في فصل الصيف والاجازات بتزيد الرحلات والسفر, لكن دايما اللي بنحتار فيه هو ايه الوجبات والاكلات المناسبة اللي ممكن ناخدها معانا خلال السفر وخصوصا كمان لو في اطفال, عشان كده النهاردة من خلال موضوعنا هنقولك ازاي تجهزي وجبات السفر والرحلات وتختاري الاكلات المناسبة.

وجبات السفر والرحلات:

اول حاجة لازم نعرف ان وجبات السفر والرحلات ليها قواعد معينة لانها بتتاكل في ظروف مختلفة غير الاكل في البيت اللي بتكوني واخدة راحتك فيه, عشان كده هنقولك شوية قواعد تحطيها في اعتبارك لما تيجي تجهزي وجبات الرحلات.

– الاكل الجاف:

حطي في اعتبارك ان الاكل الجاف هيكون افضل في الرحلات والسفر, يعني في اللحوم يفضل اللحوم المشوية او اللحوم الباردة, والافضل تتجنبي اللحوم المقلية ولو انتي من محبات المقلي يبقى تلفي اللحوم بورق كتير عشان يمتص اكبر قدر من الزيوت والدهون اللي ممكن تنزل منها, لكن اللحوم المشوية او الباردة هتحافظ اولا على العلب بتاعتك من الزيوت والدهون وهتحافظ على ايدك وهدومك انها ممكن تتعرض لبقع وانتي على طريق سفر ومش متوفر انك تنضفيها.

وطبعا اتجنبي كمان السوائل زي الشوربة او الخضار اللي بيكون فيه صلصة كتير, لان السوائل دي هتحتاج حاجات كبيرة وتكون محكمة الغلق وده هيكون صعب الحمل في الرحلات, ده غير ان السوائل معرضة انها تتدلق وده هيسبب لك مشاكل كتير.

– الاكل سهل الحمل:

لان الرحلات بطبيعتها بتحتاج اننا نتحرك كتير ونتنقل من مكان لمكان, فبالتالي هتكوني محتاجة ان الاكل يتحط بطريقة يبقى سهل انك تشيليه, وعشان كده الافضل ان الاكل يكون متقطع قطع صغيرة عشان تقدري انك تحطيه في علب صغيرة يكون شيلها سهل وتتحط في الشنط بسهولة, والعصاير يفضل انها تتعبى في ازايز بلاستيك محكمة الغلق عشان تتجنبي خطر انها ممكن تتكسر, وبالتالي لو في ازايز بلاستيك هتقدري تحطيها باي وضع جوه الشنطة وانتي مطمنة.

– تغليف الاكل كويس:

اكلات الرحلات لازم تتغلف كويس جدا, ويفضل تستخدمي طبقة من الورق الفويل في لف الاكل وطبقة تانية من ورق امتصاص الدهون لو عاملة حاجة مقلية, ولو الاكل في علب استخدمي العلب محكمة الغلق.

– صلاحية الاكل:

لما تيجي تحضري وجبات الرحلات والسفر اتجنبي الاضافات اللي ممكن تبوظ بسرعة وتبوظلك الاكل كله زي الطماطم, او اي اكلات تانية ممكن تبوظ بسرعة, وبالتالي يفضل انك تعتمدي على اللحوم المحفوظة والباردة عشان تضمني انها تستمر فترة طويلة من غير ماتبوظ, وابعدي قدر الامكان عن المعجنات والاطعمة الدهنية.

– الحفاظ على القيمة الغذائية للاكل:

دي تعتبر تكملة للنقطة اللي فاتت, اعتمدي على الاكلات اللي ممكن تحتفظ بقيمتها الغذائية فترة طويلة سواء في مرحلة الطبخ او التغليف, وقيمتها الغذائية متتأثرش بطول مدة السفر, ولازم تاخدي بالك كمان من نضافة الحاجات اللي هتغلفي بيها الاكل عشان تحافظي عليها كويسة.

وجبات السفر والرحلات

افكار لاكلات الرحلات والسفر:

بعد ما عرفنا القواعد الاساسية اللي لازم تحطيها في اعتبارك في تجهيز الوجبات هنقولك شوية افكار للاكلات اللي ممكن تاخديها معاكي.

– البيتزا:

البيتزا ميزتها انها سهلة التحضير بالاضافة انها سهل التقطيع والتغليف, ممكن تقطعيها قطع مربعة صغيرة بدل المثلثات عشان تقدري تحطيها في علب صغيرة وتاخد مكان اصغر, وممكن كمان تعتمدي على البيتزا الميني اللي هي بتكون بحجم صغير, وزي ما قولنا في النصايح فوق اتجنبي انك تحطي طماطم على البيتزا عشان متبوظهاش, وحطي كميات معقولة من الاضافات التانية زي الفلفل والزيتون والجبن.

وجبات السفر والرحلات

– سندوتشات اللحوم الجافة والباردة:

السندوتشات تعتبر من اشهر الاكلات واسهلها اللي ممكن تاخديها في الرحلات, والافضل انك تستخدمي العيش الفينو الصغير او الكبير تقطعيه لاتنين عشان تقدري تحطي كمية اكبر في مكان صغير, وزي ما قولنا ابعدي عن الاطعمة اللي ممكن تبوظ بسرعة, عشان كده الافضل تعتمدي على اللحوم الجافة والمقددة  زي اللانشون, او شرايح فراخ او لحمة مشوية, اللحوم الباردة.

وجبات السفر والرحلات

– سندوتشات الجبن:

في انواع جبن كتير تقدري تاخديها معاكي في الرحلات, ويفضل انك تعتمدي على انواع الجبنة المملحة لان الملح يعتبر مادة حافظة طبيعية, عشان كده اتجنبي الجبنة القريش في السندوتشات لانها ممكن تبوظ بسرعة بسبب ان كمية الملح فيها قليلة, لكن تقدري تعملي سندوتشات من الجبنة الشيدر, الرومي, الفلامنك, الريكفورد, وممكن تحطي شرايح زيتون مع الجبنة, والافضل ابعدي عن الجبنة المقلية عشان الزيوت.

– المعلبات:

في انواع كتير من المعلبات اللي ممكن تعتمدي عليها في الرحلات والسفر زي التونة, البيف, اللانشون المعلب, السمك الماكريل, والمعلبات دي بتتميز بفترة صلاحية طويلة واكيد ده هيخليها مناسبة للسفر, بالاضافة انها سهلة الحمل بشكل آمن جدا لانها محكمة الغلق, وبالتالي بتتوفر فيها كل شروط الاكلات المناسبة للسفر.

– الفطاير المحشية:

تقدري تنوعي وتعملي فطاير محشية باللحمة المفرومة او السجق او المشروم او الجبنة, تعتبر مناسبة جدا للرحلات, والافضل انك لما تيجي تعمليها تتجنبي استخدام الطماطم زي ما قولنا وقللي من الدهون على قد ما تقدري.

– الفواكه:

لما تيجي تاخدي اي نوع فاكهة اتأكدي انها سليمة ومش مستوية وقشرتها سليمة, والافضل طبعا انك تاخدي انواع الفواكة الصلبة عشان متتهرسش منك, ولو عايزة تاخدي انواع فاكهة طريه يبقى لازم تاخدي كل الاحتياطات اللازمة وتغلفيها كويس جدا.

– المكسرات:

المكسرات تعتبر من الاكلات المغذية جدا اللي ممكن تاخديها معاكي في الرحلات كتسالي او سناكس بين الوجبات, ممكن تاخدي كاجو, بندق, لوز, فستق, سوداني.

– العصاير:

الافضل تاخدي العصاير الطبيعية الخالية من السكر اللي معمولة في البيت وحطيها في ازايز محكمة الغلق ممكن تعملي عصير برتقان, توت, مانجا اناناس, ليمون, ولو مافيش وقت تعملي عصاير في البيت ممكن تعتمدي على المعلبة لكن اتأكدي من تاريخ الصلاحية بتاعتها انها لسه حديثة.

اعرفي معانا ازاي تجهزي نفسك للمصيف

اعرفي معانا ازاي تجهزي نفسك للمصيف
اعرفي معانا ازاي تجهزي نفسك للمصيف