4 حاجات لازم تتعلميهم لو لسه خارجة من علاقة غير صحية

بقلمآية حسان فيوجع قلب visibility532

اي علاقة غير صحية بنمر بيها بتسيب جوانا احباطات وعلامات وجروح مش سهل تشفي، لكن لو ماتعلمتيش من اللي مريتي بيه يبقى هو ده الغلط الأكبر، في المقال ده هنقولك على 4 حاجات لازم تتعلميهم لو لسه خارجة من علاقة غير صحية

4 حاجات لازم تتعلميهم لو لسه خارجة من علاقة غير صحية 

اتعلمي من الماضي

لازم تعترفي بالأخطاء اللي ارتكبتيها في حياتك، زي انك تكوني وثقتي في الناس الغلط او انك ممكن ترتبطي بحد املا في انه بعد كده هيتغير، او انك اتجاهلتي اللي قلبك بيقولهولك او انك جرحتى اللي بتحبيهم، كل الحاجات دي وأكتر ممكن تكون أخطاء عملتيها او لسه هتعمليها، لكن المهم ان الاخطاء دي ماتخلكيش تبقي محبطة او تخليكي تتمادي في الغلط، كلنا بنغلط لكن المهم نتعلم من الغلطات دي وناخد منها وخبرة والا يبقى ايه الفايدة منها؟ لازم تتعلمي من الماضي وماتغلطيش الغلطة نفسها مرتين. 
وافتكري ان الماضي مش هو انت وان اللي هتعمليه بكرة هو باختيارك تمام فلازم تتجاوزي الماضي اللي ماتقدريش تغيريه لكن لو خدتي بالك وركزتي مستحيل تمري بنفس المواقف السيئة او تقعي في نفس الغلطات مرة تانية، فحاولي تبعدي عن جلد الذات و تتجاوزي المواقف السية او الندم على اي قرار خدتيه عشان تقدر تتقدمي، حاجات كتيرة بتدوري على اجاباتها ومكن توني مش لاقياها دلوقتي، لكن اتأكدي انه كل حاجة بتحصل في حكمة من وراها وان الاجابة لكل سؤل موجودة وهتعرفيها بس في الوقت المناسب. 

اتعلمي من الماضي
اتعلمي من الماضي

حاولي من جديد

انك تتغلبي على الفترات الصعبة بيحتاج مجهود مش طبيعي وشجاعة و ثقة في النفس، وفي عز أيامك الصعبة وانتي مش عارفة ليه الحاجات الوحشة دي بتحصلك وامتى هتنتهي بقى وبتبقي مرهقة جسديا وعقليا وعاطفيا، كل ده صعب ومتعب بس المهم انك تنجي من النهاردة وبكرة يوم جديد يعني محاولات جديدة، وخليكي ايجابية على قد ما تقدري، لازم تآمني انه في ضوء في نهاية النفق، والمحاولات الجديدة هي انك تحتفلي وتحسي بأهمية كل نجاح او انتظار صغير وبكل علاقة جديدة مريحة وناجحة ببساطة ومن غير وقع قلب، يعني من الآخر لازم تبصي لنص الكوباية المليان ودايما تحاولي من جديد.

حاولي من جديد
حاولي من جديد

ماترضيش بالأمر الواقع 

ابدا ماترضيش بالامر الواقع وتقولي كده خلاص حياتي انتهت ومش ممكن حاجة جديدة هتحصل ولا هتطور، دايما اطمحي للأفضل في حياتك و حاوطي نفسي بالناس اللي بيحبوكي ويدعموكي ويفكروكي دايما بالانسان اللي ممكن تبقيه، وبيدوروا على الأحسن ليكي في كل حاجة. وماترضيش يأي حاجة أقل من الأفضل عافري عشان وظيفة احلامك او بيت احلامك او السفرية اللي نفسك فيها، واخرجي بره الـ comfort zone وخاطري بتجربة حاجات جديدة، واطمحي دايما للأفضل لأنك أكيد تستحقيه وافتكري دايما ان اي علاقة غير صحية مريتي بيها سواء انت علاقة شغل او علاقة عاطفية انها مش نهاية الدنيا. 

شاركي تجربتك

واحدة من أفضل الطرق اللي تساعدك تخرجي وتتعملي من اي علاقة غير صحية هي انك تحكي وتشاركي، حتى لو كنتي فاكرة ان تجربتك مش مهمة كفاية، صدقيني تجربتك مهمة ولو جربتي تتكلمي مع حد يهتم يسمعلك وتفضفضي معاه آلامك ومخاوفك هيساعدك ان ترتاحي وتتخلصي من المخاوف ده ووقتها هتقدري تحاولي من جديد، جربي تحكي لحد من أصحابك أو أهلك أو حد متخصص زي الدكاترة النفسيين عشان يساعدك، ولو صعب احكي للورق، الكتابة كمان تعتبر علاج ممتاز، خليكي فخورة برحلتك وتجربتك واحكيها عشان تتخلصي من أوجاعها وتلهمي بيها غيرك، وتبقي جاهزة لبداية جديدة. 

شاركي تجربتك
شاركي تجربتك

اعرفي كمان نصايح وأفكار إزاي تبطلي تدخلي في دوامة الـ overthinking