11 حيلة لتثبيت المانيكير اطول فترة ممكنة ومنعه من التقشر

بقلمريهام محمود فيأظافر visibility595

مافيش شك ان المانيكير بيدي شكل حلو جدا للايد والضوافر, لكن المشكلة اللي بتقابل كل البنات تقريبا انه ممكن يقشر بسرعة وده بيخلي شكل الايد والضوافر مش حلو ومحرج, عشان كده النهاردة من خلال موضوعنا هنقولك حيل لتثبيت المانيكير اطول فترة ممكنة.

حيل لتثبيت المانيكير اطول فترة:

1- استخدام الخل الابيض:

الخل الابيض من الحاجات اللي ممكن تساعدك على تثبيت المانيكير, كل اللي هتعمليه هاتي قطعة قطن اغمسيها في الخل الابيض وامسحي بيها الضوافر قبل وضع المانيكير ومجرد ما الضوافر تنشف حطي المانيكير, ده بيساعد انه يزيل اي تراكم منتجات او زيوت على ضوافرك.

حيل لتثبيت المانيكير

2- متنقعيش الضوافر قبل وضع المانيكير:

خبراء التجميل تقريبا كلهم بيعملوا خطوة نقع الضوافر في المية لتليين الجلد اللي حوالين الضوافر, لكن الحركة دي بتخلي الضوافر تشرب المية وتتمدد, ولما تيجي تحطي المانيكير هتنكمش مرة تانية وترجع لحجمها الطبيعي, وهيبقى المانيكير مش مناسب لحجم ضوافرك, عشان ككده الافضل انك تستخدمي الزيوت الطبيعية على الجلد اللي حوالين الضوافر لتليينها بدل نقعها في المية.

حيل لتثبيت المانيكير

3- متنسيش الطبقة الاساسية:

متتجاهليش وضع طبقة ال Basecoat او الطبقة الاساسية قبل المانيكير, لان دي تعتبر القاعدة الاساسية للمانيكير اللي بتخليه يدوم لفترة اطول, ومن غيرها المانيكير مش هيقعد فترة طويلة وهيقشر بسرعة, حطي من الطبقة الاساسية طبقتين الطبقة الاولانية على النص العلوي من الضوافر عشان تحافظي عليه لانه بيتكسر بسرعة, والطبقة التانية على الضوفر كله.

4- مترجيش ازازة المانيكير:

بدل ما ترجعي ازازة المانيكير لفوق وتحت, لفيها يمين وشمال بين ايديكي عشان تمنعي تكون فقاعات الهوا, وتخليه خفيف اثناء رسمه على الضوافر.

5- اتجنبي الهوا السخن:

الهوا السخن بيمنع المانيكير ينشف وبالتالي هتيعرض انه يتمسح بسرعة, وانه ينشف بشكل مش صح, عشان كده الافضل استخدام الهوا البارد, اظبطي السيشوار على الهوا البارد واستخدميه لتجفيف المانيكير في اسرع وقت, او ممكن تحطي ايدك في مية فيها تلج لمدة دقيقة او دقيقتين لتجفيف سريع ومثالي.

حيل لتثبيت المانيكير

6- متنسيش الطبقة العلوية:

زي ما الطبقة الاساسية اللي قبل المانيكير مهمة كمان الطبقة العلوية Top coat اللي بعد المانيكير بنفس الاهمية لانها بتحمي المانيكير انه يروح بسرعة او يتقشر, وتقدري تكرري وضع الطبقة العلوية كل يومين او تلاتة لو حاطة المانيكير لفترة طويلة.

حيل لتثبيت المانيكير

7- اغسلي ايدك بالصابون العادي:

اغسلي ايدك بالصابون العادي, واتجنبي استخدام مطهرات الايد وانتي حاطه المانيكير لان المطهرات دي بتكون فيها نسبة كحول بيضعف طبقة المانيكير وبيخليه يروح بسرعة.

حيل لتثبيت المانيكير

8- رطبي ضوافرك:

رطبي ضوافرك بشكل يومي بالزيوت الطبيعية المفضلة عندك, او بالكريم المرطب, عشان تمنعي جفاف الضوافر, وبالتالي ده هيمنع تقشر المانيكير وهيخليه يدوم فترة اطول.

حيل لتثبيت المانيكير

9- حيلة لاخفاء التقشر بطريقة سريعة:

لو حصل ان المانيكير اتقشر في الجزء العلوي من الضوافر, تقدري تحلي المشكلة دي بحيلة بسيطة جدا, استخدمي لون مانيكير مختلف وارسمي بيه على اطراف الضوافر واعملي لوك فرينش وادي ضوافرك شكل جديد.

حيل لتثبيت المانيكير

10- اتجنبي المية السخنة:

اتجنبي استخدام المية السخنة خصوصا بعد اول 12 ساعة من وضع المانيكير, الافضل انك تلبسي جوانتي اثناء غسيل الاطباق, او تغسليها بمية باردة.

حيل لتثبيت المانيكير

11- اتجنبي واقي الشمس على الضوافر:

لما تيجي تحطي واقي الشمس اتجنبي انه يجي على المانيكير لان ده بيضعف طبقة المانيكير وبيخليه يتقشر بسرعة, سواء بتحطي الواقي على بشرتك او على ايدك, اتجنبي انه يلمس المانيكير بتاعك.

حيل لتثبيت المانيكير

7 طرق سهلة وفعالة تخلي المانيكير بتاعك ينشف اسرع

تسريع تجفيف المانيكير
تسريع تجفيف المانيكير