7 تسريحات سهلة وسريعة للشعر المبلول بالخطوات والفيديو

ريهام محمود
ريهام محمود
في
شعر
7803

ساعات كتير ممكن يكون عندك خروجة وغاسلة شعرك ومعندكيش وقت تنشفيه او تعمليه سيشوار, او في فصل الصيف وانتي على البحر او على حمام السباحة وشعرك مبلول ومحتاجة تلميه بطريقة حلوة, النهاردة هنقولك على 7 تسريحات للشعر المبلول سهلة وسريعة تنقذك لو معندكيش وقت, او عشان تعملي لوك حلو لشعرك وانتي على البحر.

تسريحات للشعر المبلول:

1- تسريحة Low twist & Pin buns:

التسريحة دي تعتبر من افضل التسريحات للشعر المبلول, هتخلي شعرك مفرود من فوق وهتديه شكل ويفي خفيف من تحت لما ينشف.

كل اللي هتعمليه هتقسمي شعرك 3 اجزاء متساوية, واعملي كل جزء منهم كحكة منخفضة وثبتيها بالبنس, والميزة كمان في التسريحة دي انها هتخلي شعرك ينشف بشكل اسرع من لو كنتي عملاه كحكة واحدة, عشان كده الستايل ده مناسب جدا لو شعرك تقيل, وتقدري تعملي 4 او 5 كحكات زي ما انتي عايزة.

2- تسريحة High ponytail:

من التسريحات كمان المناسبة جدا للشعر المبلول هي تسريحة ديل الحصان العالي.

لمي شعرك كله بالمشط على فوق واربطيه باستك, لكن بس هتعملي حيلة بسيطة اوي زيادة عشان تشيلي علامات المشط من الشعر مشي جنب ايدك او صوابعك على الشعر بالراحة عشان تساوي علامات المشط, وعشان تثبتي ديل الحصان اكتر ممكن تاخدي خصلة من الشعر تلفيها حوالين الاستك وفي نفس الوقت عشان تداري الاستك بالشعر.

تسريحات للشعر المبلول 3
تسريحات للشعر المبلول 3

3- تسريحة Fishtail ponytail:

ضفيرة ديل السمكة كمان من التسريحات اللي بتدي شكل حلو جدا للشعر المبلول.

اول حاجة اعملي شعرك ديل حصان عالي, بعدها قسمي ديل الحصان لاتنين, امسكي كل خصلة في ايد وابدأي خدي خصلة من كل جنب وضفريها مع الجنب التاني, وكرري الحركة لحد ما تخلصي الشعر كله, وفي الاخر اربطي الضفيرة من تحت باستك صغير, وحاولي انك تسحبي الضفاير بايدك بالراحة تدي الشعر شكل كثيف وتظهري شكل الضفيرة اكتر.

وتقدري تجربي ضفيرة ديل السمك مع ديل الحصان المنخفض او الجانبي, عشان تغيري في شكلها.

4- تسريحة Fishtail bun:

هتعملي ضفيرة ديل السمكة زي الطريقة اللي فاتت بالظبط, بس في الاخر هتلميها على شكل كحكة وتثبتيها بالبنس, الضفيرة بتدي شكل مختلف للكحكة عن الكحكة العادية او التقليدية, ده غير ان الشعر لما هينشف هيبقى معمول ويفي خفيف بشكل طبيعي, ولو معندكيش وقت تعملي ضفيرة ديل السمكة ممكن تعملي الضفيرة الثلاثية التقليدية وفي الاخر تعمليها كحكة وتثبتيها بالبنس.

5- تسريحة The sleek low bun:

الكحكة المنخفضة الكلاسيكية او التقليدية تعتبر من اسهل التسريحات للشعر المبلول, وزي التسريحة الاولى هتخلي شعرك لما ينشف من فوق يبقى مفرود ومن تحت معمول ويفي خفيف.

كل اللي هتعمليه سرحي شعرك ولميه كله اعمليه ديل حصان منخفض, ولفي الشعر كله واعمليه كحكة منخفضة وثبتيها بالبنس, ومشي ايدك على الشعر في الاخر عشان تتخلصي من علامات المشط والشعر كله يبقى متساوي.

6- تسريحة The loose triple bun:

التسريحة دي كمان من التسريحات اللي بتساعد ان الشعر ينشف بسرعة خصوصا لو كثيف, ولما الشعر بينشف بيبقى معمول ويفي طبيعي, وممكن بعد ما ينشف ترشي عليه سبراي ملح البحر عشان تخلي الشعر شكله احلى وتظهري الويفي اكتر.

قسمي الشعر 3 اجزاء, جزء من فوق الاذنين, والجزئين التانيين من تحت من نص الراس, اعملي كل جزء منهم كحكة فضفاضة وثبتيها بالبنس.

ولو فكيتي الشعر وهو ناشف بنسبة 80% تقريبا ممكن تعمليه حلقات صغيرة في نهاية الشعر وتثبتيها بالبنس وتسيبيه لحد ما ينشف خالص وبعدين تفكيها عشان تدي لشعرك شكل كيرلي في النهايات بتاعته.

ممكن كمان تعملي 3 كحكات تحت بعض, هتقسمي الشعر 3 اجزاء تحت بعض, وتعملي كل جزء منهم كحكة وتثبتيها بالبنس.

تسريحات للشعر المبلول 12
تسريحات للشعر المبلول 12

7- تسريحة The side twist bun:

التسريحة دي كمان بتساعد انها تعمل ستايل ويفي للشعر, وتقدري تعمليها فضفاضة او ضيقة زي ما انتي عايزة حسب اختيارك, ممكن تخليها ضيقة لو عايزة ستايل رسمي, ولو كاجوال ممكن تخليها فضفاضة.

خدي خصلة كبيرة من الشعر من قدام وهاتيها على الجنب ناحية الشمال, وابدأي ضفريها, لحد ما توصلي بالخصلة ورا الاذن, لميها مع باقي الشعر واعملي ديل حصان ولفيه على شكل كحكة منخفضة جانبية وثبتيها بالبنس وزي ما قولنا ممكن تخليها كحكة انيقة او فوضوية حسب اختيارك.

ممكن كمان تشوفوا مجموعة تسريحات تانية بالفيديو:

10 تسريحات شعر للصيف سهلة ومتاخدش وقت

تسريحات شعر للصيف سهلة ومتاخدش وقت
تسريحات شعر للصيف سهلة ومتاخدش وقت

مقالات متعلقه

4 ستايلات مختلفة للشعر باستخدام المكواة

4 ستايلات مختلفة للشعر باستخدام المكواة

10 تسريحات شعر صيفية مثالية لايام الصيف الحر

10 تسريحات شعر صيفية مثالية لايام الصيف الحر

ستايلات الشعر المثالية لشكل انفك

ستايلات الشعر المثالية لشكل انفك