طريقة عمل سبراي ملح البحر في البيت لشعر ويفي طبيعي

بقلمريهام محمود فيشعر visibility531

في الصيف معظم البنات بيفضلوا ان الشعر يبقى على طبيعته وخصوصا على البحر, عشان كده لو انتي عايزة شعرك يبقى شكله حلو على البحر ومعمول ويفي طبيعي من غير ما يهيش منك وتبقي متحكمة فيه, يبقى اكيد انتي محتاجة تعرفي وصفتنا النهاردة وهي طريقة عمل سبراي ملح البحر اللي هيخلي شعرك ويفي بشكل طبيعي وهيحافظ عليه.

اكيد في كتير سمع قبل كده عن سبراي ملح البحر وعارفين ان في ماركات كتير منزلة منه وموجودة في السوق, لكن احنا النهاردة هنقولك تعمليه ازاي في البيت بمكونات طبيعية وبطريقة سهلة وبسطية جدا.

طريقة عمل سبراي ملح البحر:

المكونات:

1 كوباية مية دافية.

1 معلقة كبيرة ملح البحر.

1 معلقة كبيرة ملح ابسوم “الملح الانجليزي وهنلاقيه عند العطار”.

1 معلقة كبيرة من زيت جوز الهند.

1 معلقة كبيرة من جل صبار الالوفيرا.

5 نقط من اي نوع زيت عطري “اختياري”.

طريقة التحضير:

اول حاجة لازم المية تكون دافية اوي, يعني حطي المية على النار وارفعيها من على النار قبل ما تغلي.

بعد كده ضيفي ملح البحر وملح الابسوم وقلبيهم لحد ما يدوبوا تماما في المية.

ضيفي للمية زيت جوز الهند وقلبيه لحد ما يدوب.

بعد كده ضيفي جل صبار الالوفيرا, وفي النهاية لو عايزة تضيفي اي نوع زيت عطري للريحة ضيفي 5 نقط في الاخر خالص وقلبي كل المكونات مع بعض كويس.

صبي الخليط في ازازة ببخاخ, وكده يبقى السبراي جاهز للاستخدام.

طريقة عمل سبراي ملح البحر

طريقة استخدام سبراي ملح البحر:

دلوقتي بعد ما عرفنا طريقة تحضير السبراي هنقولك ازاي تستخدميه.

السبراي بيدي نتايج افضل على الشعر الرطب, يعني بعد ما تغسلي شعرك سيبيه ينشف شوية وهو لسه رطب رشي السبراي على الشعر كله بالتساوي, وامسكي الشعر جعدية بايدك, وبننصحك مترشيش منه كمية كبيرة زيادة عن اللزوم كمية بسيطة منه على كل الشعر هتكون كافية جدا, وخصوصا لو الشعر اصلا دهني يبقى تستخدمي كبيرة صغيرة لان السبراي بيحتوي على مرطبات كتير زي ما قولنا.

طريقة عمل سبراي ملح البحر

فوايد مكونات السبراي:

ملح البحر: مبدئيا هو مفيد لانه بيدي قوام للسبراي, ولو خايفة ان ممكن الملح ينشف شعرك باي شكل مع الاستخدام المفرط, احنا بنقولك متقلقيش لان السبراي بيحتوي على 4 انواع من المرطبات الطبيعية للشعر وهي زيت جوز الهند وجل الصبار وملح الابسوم والزيت العطري, عشان كده مافيش اي ضرر خالص على شعرك من الملح.

ملح الابسوم “الملح الانجليزي”: ملح الابسوم هو اصلا عبارة عن مغنسيوم على شكل بلورات, وبيستخدم عادة عشان يدي حجم اكبر للشعر, كمان ليه خصائص مرطبة للشعر.

زيت جوز الهند: هو مرطب ممتاز جدا للشعر, وهنلاحظ انه دايما من المكونات اللي دايما بتستخدم في ماسكات الشعر وده بسبب الخصائص المرطبة الموجودة فيه, وزيت جوز الهند بيساعد على تغليف الشعر والحفاظ عليه من عوامل الجو زي الحرارة والرطوبة.

جل الصبار: ليه تأثير مذهل جدا على الشعر, ويعتبر عنصر ترطيب في السبراي, ده غير انه معروف انه بيساعد على زيادة نمو الشعر, وبيحافظ على شكل الكيرلي, وبيقلل من قشرة الشعر, وبالتالي شعرك هيستفاد بكل الحاجات دي لما تستخدمي السبراي.

الزيت العطري: هو مكون مش ضروري اوي لسبراي ملح البحر, لكن فايدته انه هيدي ريحة حلوة لشعرك, ممكن تستخدمي زيت اللافندر هيديكي ريحة حلوة جدا, وممكن تستخدمي زيت البرتقان او الليمون هيكونوا مناسبين جدا لاضافتهم للسبراي.

طريقة عمل سبراي ملح البحر

وصفة صينية قديمة: سيروم هيساعدك على تحفيز نمو الشعر وعلاج الشعر التالف في وقت سريع

سيروم لعلاج الشعر
سيروم لعلاج الشعر