12 فايدة من اكل البطيخ اثناء فترة الحمل..وازاي تدخليه في نظامك الغذائي بطرق مختلفة

بقلمريهام محمود فيصحة visibility361

فترة تسع شهور الحمل اكيد بتكون من اصعب الفترات اللي ممكن تمر على اي واحدة, وبتمر فيها بحاجات كتير بما فيها الرغبة الشديدة في الاكل وتقلب المزاج, وطول الوقت بتبقى في حالة بحث عن افضل النصايح اللي تفيدها في الفترة دي, وواحدة من اكتر النصايح اللي بتسمعها الحامل هي “اكل الفاكهة الطازة كتير”, ومع ذلك في فواكه كتير بيكون ممنوع اكلها في فترة الحمل, ولكن لحسن الحظ ان البطيخ واحد من الفواكه اللي اكلها امن جدا اثناء الحمل, والنهاردة من خلال موضوعنا هنقولك فوايد البطيخ اثناء الحمل, وازاي تدخليه في نظامك الغذائي بطرق مختلفة.

البطيخ يعتبر مصدر ممتاز جدا للعناصر الغذائية الاساسية, زي فيتامين A, C, B6, والمغنسيوم, البوتاسيوم, كمان البطيخ بيحتوي على نسبة عالية من الالياف.

فوايد البطيخ اثناء الحمل:

1- بيخفف حرقة القلب والحموضة:

البطيخ مهديء جدا للمعدة وانبوب الطعام, والحوامل بصفة عامة دايما بيعانوا من مشاكل الجهاز الهضمي المختلفة زي الحموضة والحرقة, والبطيخ ليه خصائص تبريد بتساعد على تخفيف المشاكل دي, عشان كده المره الجايه اللي تحسي فيها بالاعراض دي بننصحك تروحي على طول على طبق البطيخ الساقع هتبقي كويسة.

2- بيقلل من تورم القدمين والايدين:

التورم الخفيف اللي بيحصل في الايدين والقدمين من الاعراض الشائعة جدا اللي بتحصل اثناء فترة الحمل, والبطيخ لانه بيحتوي على نسبة عالية من المية بيقلل من انسداد الاوردة والعضلات والبتالي بيساعد على منع التورم.

فوايد البطيخ اثناء الحمل

3- بيخفف من تعب واعياء الصبح:

البطيخ لو اكلتيه الصبح هيديكي بداية منعشة ومهدئة وخفيفة لليوم, كمان بيحتوي على الخواص الغذائية والتنشيطية اللي بتمنع انه يحصل غثيان الصبح عند الحوامل, فهتكون فكرة ممتازة جدا ان الحامل تبدأ يومها كل يوم الصبح بكوباية عصير بطيخ طازة, ممكن تضيفي له كمان عصرة ليمون وذرة ملح لو عايزة يكون طعمه مالح او لاذع شوية.

4- بيمنع الجفاف:

كل النساء الحوامل بينصح ان هما يشربوا كمية مية كبيرة لمنع الجفاف, لان الجفاف ممكن يسبب تقلصات مبكرة ويأدي لولادة مبكرة, والبطيخ لانه بيحتوي على اكتر من 90% من المية فهيكون مصدر ممتاز جدا عشان جسمك يفضل رطب وتمنعي الجفاف.

فوايد البطيخ اثناء الحمل

5- بيقلل من تقلصات العضلات:

اثناء الحمل جسم المرأة بيمر بتغييرات كتير جدا, والوزن الزائد والهرمونات بتسبب آلام العضلات والعضم, واستهلاك البطيخ باي شكل بيساعد على التعامل بشكل افضل مع التغييرات دي وتخفيف التقلصات والتشنجات العضلية.

6- بيمنع تصبغ الجلد:

كتير من الحوامل بيعانوا اثناء فترة الحمل من تصبغ الجلد ودي مشكلة بتكون مزعجة جدا, البطيخ بيساعد ان حركة الامعاء تشتغل بشكل سليم وسلس وبيسهل عملية هضم الاكل, وده بدوره بيأثر على الجلد, وبيساعد على تقليل تصبغ الجلد في اجزاء الجسم المختلفة عن طريق التطهير المنتظم للجسم, عشان كده اكل البطيخ هيحافظ على صحة الجلد اثناء فترة الحمل.

فوايد البطيخ اثناء الحمل

7- بيقوي المناعة:

اثناء الحمل جسمك بيكون مسؤول عن روحين انتي وطفلك, وبالتالي اي تقصير في صحتك هيأثر بشكل مباشر على نمو الطفل, لكن بنقولك متقلقيش لان اكل البطيخ بانتظام ممكن انه يساعد على تقوية مناعتك, البطيخ بيحتوي على اللايكوبين وده واحد من مضادات الاكسدة المسؤولة عن لونه الاحمر, وده بيساعد على تقليل فرص تسمم الحمل بنسبة 50%, وكمان بيلعب دور مهم جدا في بناء مناعتك اللي بيحصل فيها انخفاض خلال فترة الحمل.

8- بيعالج الامساك:

الامساك من المشاكل الشائعة جدا اثناء فترة الحمل, والبطيخ يعتبر علاج طبيعي آمن وموثوق لازالة حركات الامعاء المتقطعة, لانه غني بالالياف, وومحتواه المائي بيساعد على تنضيف الممر اللي بيعمل ضغط على الامعاء.

فوايد البطيخ اثناء الحمل

9- مهديء للطفح الجلدي:

الحمل بيسبب زيادة في حرارة الجسم, وده ممكن يسبب طفح حراري ينتج عنه تهيج وحكه في الجلد, ويعتبر البطيخ بسبب خصائص التبريد اللي فيه حل ممتاز جدا للطفح الجلدي, وبيمنع جفاف الجلد المستمر وبيحافظ على رطوبته وبيمنع الحكه على مدار الساعة طول ايام الاسبوع.

10- علاج التهاب المسالك البولية:

في المرحلة المبكرة من الحمل كتير من الحوامل بيشتكوا من التهاب المسالك البولية, وتعتبر مشكلة شائعة جدا وبتزيد مع مشكلة ان الحامل متقدرش تاخد الادوية المناسبة لحل المشكلة دي اثناء الحمل, لكن من النهاردة المشكلة دي حلها بسيط جدا وبشكل طبيعي وهو البطيخ, البطيخ مثالي جدا لحل المشكلة دي بسبب نسبة المية العالية الموجودة فيه والخصائص المضادة للبكتيريا, وبالطريقة دي البطيخ بيساعد على طرد البكتيريا المترسبة في المسالك البولية, وده هيريحك من التبول المستمر بشكل مؤلم.

فوايد البطيخ اثناء الحمل

11- بيعزز الرؤية:

البطيخ بيحتوي على البيتاكاروتين, وده واحد من مضادات الاكسدة اللي بيتم تحويلها لفيتامين A, وبالطريقة دي بيساعد فب تفكيك الجذور الحرة اللي ممكن تكون بتسبب اضرار للخلايا, وفيتامين A كمان بيرتبط برؤية صحية, لانه بيساعد على حماية الطبقة الخارجية للعين “القرنية”, وكمان بيسهل انتقال او ارسال العصب البصري الصحي.

12- بيدعم تكوين عضم الجنين:

البطيخ بيحتوي على نسبة عالية من الكالسيوم والبوتاسيوم, ودي تعتبر المعادن المرتبطة ارتباط مباشر بتطور العضم المناسب لطفلك, عشان كده متنسيش انك تدخلي البطيخ في نظامك الغذائي بشكل يومي طول فترة الحمل.

فوايد البطيخ اثناء الحمل

طرق تدخلي بيها البطيخ في نظامك الغذائي اثناء الحمل:

1- عصير البطيخ والليمون:

المكونات:

4 كوبايات بطيخ متقطع مكعبات.

½ كوباية عصير ليمون.

½ كوباية سكر.

4 كوبايات مية باردة.

مكعبات تلج.

الطريقة:

حطي البطيخ في الخلاط واضربيه لحد ما يبقى ناعم, مع تقليل سرعة الخلاط من العالية للمتوسطة كل 30 ثانية وانتي بتضربيه, صفي العصير ده عن طريق المصفي واستخرجي منه العصير بس.

في وعاء صغير ضيفي السكر و ½ كوباية مية وحطيهم على نار متوسطة وقلبيهم لحد ما السكر يدوب تماما, استمري في التقليب لمدة 5 دقايق تقريبا.

في ابريق اخلطي ½ كوباية عصير الليمون في 3 كوبايات مية وضيفي لهم مزيج السكر اللي حضرتيه في الخطوة اللي فاتت.

في كوباية ضيفي مكعبات التلج وربع الكوباية تقريبا من عصير البطيخ اللي حضرتيه, وبعدين ضيفي عصير الليمون وقلبيهم مع بعض, واستمتعي بالمشروب.

الكمية دي تعمل تقريبا حوالي 12 كوباية, تقدري تحفظيه في التلاجة وتشربي منه بشكل يومي.

وصفات بالبطيخ

2- آيس كريم البطيخ:

المكونات:

2 كوباية بطيخ متقطع مكعبات.

½ كوباية مية.

الطريقة:

اضربي البطيخ في الخلاط وصفيه على مصفى والعصير اللي هيخرج منه ضيفي له ½ كوباية المية واضربيهم مع بعض تاني, هاتي قوالب الايس كريم وصبي فيها الخليط, وحطيه في الفريزر لمدة من 8 – 10 ساعات لحد ما يتجمد, وكده يبقى الايس كريم جاهز.

وصفات بالبطيخ

3- سلطة البطيخ:

المكونات:

3 كوبايات بطيخ مفرومة ناعم.

1 ثمرة خيار متقطعة مكعبات.

1 ثمرة مانجا متقطعة مكعبات.

1 بصلة صغيرة مفرومة ناعم.

1 معلقة كبيرة ريحان مفروم ناعم.

1 ½ معلقة صغيرة بشر قشر ليمون.

¼ كوباية عصير ليمون.

1 معلقة كبيرة سكر.

ملح – فلفل.

الطريقة:

هاتي طبق كبير ضيفي البطيخ والخيار والمانجا والبصل واوراق الريحان وبشر قشر الليمون, قلبيهم مع بعض كويس, صبي عليهم عصير الليمون والسكر والملح والفلفل واخلطيهم مع بعض كويس, وكده يبقى السلطة جاهزة ممكن تاكليها مع الناتشوز او الشيبسي كوجبة خفيفة.

وصفات بالبطيخ

4- سلطة البطيخ والجبنة الفيتا والنعناع:

المكونات:

1 ½ كوباية بطيخ متقطع مكعبات.

1 ½ كوباية جرجير مفروم.

¼ كوباية نعناع مفروم.

¼ كوباية جبنة فيتا.

¼ كوباية بصل متقطع شرايح.

2 معلقة كبيرة عصير ليمون.

1 معلقة كبيرة زيت زيتون.

6 حبات زيتون متقطعين.

ملح – فلفل.

الطريقة:

في طبق كبير اخلطي البصل والزيتون وزيت الزيتون والليمون, قلبيهم وسيبي الخليط لمدة من 15 – 20 دقيقة.

ضيفي مكعبات البطيخ والنعناع الجرجير والفيتا, قلبي المكونات كلها مع بعض كويس, وكده تبقى السلطة جاهزة.

وصفات بالبطيخ

5- جيلي البطيخ:

المكونات:

3 كوبايات عصير بطيخ.

100 جرام جيلاتين.

½ كوباية سكر.

¼ كوباية عصير ليمون.

1 معلقة صغيرة زيت نباتي.

الطريقة:

في طبق اخلطي الجيلاتين مع كوباية واحدة من عصير البطيخ, سيبيه لمدة من 2 – 3 دقايق.

في وعاء على نار متوسطة صبي باقي عصير البطيخ وضيفي له السكر, وقلبيهم مع بعض لحد ما السكر يدوب تماما, وبعدين صبي عليهم خليط الجيلاتين وعصير الليمون, وقلبيهم مع بعض كويسو ارفعيهم من على النار.

هاتي اطباق الجيلي او اي اطباق صغيرة ادهنيها بالزيت وصبي فيها خليط البطيخ, وحطيه في التلاجة طول الليل, وكده يبقى جيلي البطيخ جاهز.

وصفات بالبطيخ

الاثار الجانبية للبطيخ:

اكيد كل حاجة مهما كانت مفيدة او صحية ممكن يكون ليها اثار جانبية والبطيخ ليه بعض الاثار الجانبية.

– ممكن الاستهلاك المفرط للبطيخ يأدي لارتفاع مستويات السكر في الدم, وده ممكن يأدي للاصابة بسكري الحمل.

– استخدام البطيخ كمطهر ممكن انه يطرد حتى العناصر الغذائية الاساسية من الجسم.

– البطيخ من انواع الفاكهة اللي ممكن تبوظ بسرعة, عشان كده اتجنبي اكل البطيخ باي شكل لو اتساب بره لفترة طويلة لانه ممكن يسبب مشاكل في الجهاز الهضمي ويأدي للغثيان والقيء, الافضل انك تاكلي البطيخ الطازة وتشربي عصير البطيخ الطازة.

– اخر حاجة ممكن تستشيري الدكتور بتاعك اللي انتي متابعه معاه قبل ما تدخلي البطيخ في نظامك الغذائي, وهو ممكن يحددلك الكمية المناسبة ليكي بشكل يومي عشان تستفيدي منه باكبر قدر.

في النهاية اكل البطيخ اثناء الحمل آمن جدا بشرط اكله بكميات معتدلة, في الحالة دي هيوفرلك كل الفوايد الصحية اللي احنا اتكلمنا عليها.

فوايد البطيخ اثناء الحمل

مترميش قشر البطيخ واعملي بيه وصفات لذيذة .. واعرفي فوايده الصحية

فوايد قشر البطيخ