14 حيلة ملابس هتحول القطع العادية لتصميم جديد على الموضة

ريهام محمود
ريهام محمود
4713

اوقات كتير بيبقى عندنا هدوم في الدولاب راكنينها ومش بنلبسها ممكن بسبب اننا ذهقنا من شكلها او قدمت وبقالها كذا سنة وحاسه ان موضتها ممكن تكون بطلت, لكن انتي تقدري تجددي القطع اللي عندك باضافة تفاصيل بسيطة ليها, او حتى تعملي قطعة جديدة خالص, والنهاردة من خلال موضوعنا هنقولك افكار لتجديد الملابس وازاي تعملي لها اعادة تدوير عشان تجددي شكلها وتبقى على الموضة.

افكار لتجديد الملابس:

1- اضافة فيونكة قطيفة:

لو عندك سويت شيرت سادة وعايزة تجددي شكله, ممكن تضيفي للياقة بتاعته فيونكة قطيفة, والطريقة بسيطة وسهلة جدا, كل اللي هتعمليه هتجيبي شريط قطيفة اسود وممكن يبقى الشريط ساتان, قصيه نصين, اتني الحرف بتاعه وخيطيه في السويت شيرت من الجنبين, وبعدين اربطيه على شكل فيونكة وكده يبقى جددتي السويت شيرت بطريقة بسيطة جدا.

افكار لتجديد الملابس 1
افكار لتجديد الملابس 1

2- اضافة الوان للتيشرت:

لو عندك تيشرت سادة ممكن تضيفي لها الوان عشان تظهريه, كل اللي هتعمليه هاتي شرايط زجزاج بألوان مختلفة, قصيها على قد جيب التيشرت وعلى كل شريط حطي غرا ملابس والزقيهم على الجيب تحت بعض.

افكار لتجديد الملابس 2
افكار لتجديد الملابس 2

3- توب من فستان قديم:

لو عندك فستان قديم وبطلتي تلبسيه تقدري تعملي له اعادة تدوير وتصممي منه بلوزة بكشكشة على الموضة.

افكار لتجديد الملابس 3
افكار لتجديد الملابس 3

شوفوا الخطوات بالفيديو:

4- اضافة شراشيب للجاكيت:

لو عندك جاكيت جينز زهقتي منه وعايزة تجددي شكله, ممكن تجيبي شريط شراشيب, وتخيطيه في الجاكيت من ورا وعلى الكمين عند الخياطة بلون خيط زي لون الجاكيت.

5- اضافة تطريز للجاكيت:

ممكن كمان تجددي الجاكيت الجينز بشكل تاني باضافة تطريز, ممكن تكتبي اي جملة انتي عايزاها على الجاكيت من ورا, وابدأي اشتغليها بخيط التطريز, اختاري اللون حسب لون الجاكيت بتاعك.

افكار لتجديد الملابس 6
افكار لتجديد الملابس 6

6- اعملي كم جرس للتيشرت:

ممكن تغيري كم التيشرت بتاعك وتعمليه كم جرس بطريقة سهلة.

افكار لتجديد الملابس 7
افكار لتجديد الملابس 7

شوفوا الطريقة بالفيديو:

7- اعملي سكارف من البلوفر القديم:

انتي ممكن تستفيدي بنفس البلوفر وتطلعي منه قطعتين اول قطعة انك تقصي الكمام وتستخدميها كاكسسوار تحت البوت وعشان تدفي رجلك اكتر في الشتا, والقطعة التانية هي السكارف قصي البلوفر من تحت الكم وكده يبقى طلع عندك انفنيتي سكارف من باقي البلوفر.

8- جددي البنطلون الجينز:

ممكن نجيب الركامة اللي بتتركب على الهدوم زي اللي في الصورة كده او اي شكل تاني واي لون احنا نختاره ودي ممكن نشرتيها من المحلات اللي بتبيع مستلزمات الخياطة او لو عندك حاجة قديمة مش بتلبسيها وفيها الركامة دي خديها منها وخيطيها على البنطلون, قصي الاول حتة على قد الجيب وخيطيها عليه, وبعدين خيطي على كل البنطلون من الجانبين لحد تحت.

9- اعملي التيشرت Off shoulder:

ممكن تجددي التيشرت العادي بتاعك وتحوليه اوف شولدر, هاتي التيشرت قصي الجزء اللي فوق منه وبعدين اتني الحرف وخيطيه, سيبيه فتحة صغيرة في الاخر, هاتي استك واشبكيه بدبوس ودخليه جوه الفتحة واسحبيه لحد ما تدخليه كله جوه واقفلي الفتحة, وكده يبقى التيشرت بتاعك اتحول اوف شولدر بطريقة سهلة وسريعة.

افكار لتجديد الملابس 12
افكار لتجديد الملابس 12

10- اعملي تطريز على الايس كاب:

ممكن تجيبي اشكال مطرزة جاهزة هتلاقيها موجودة عند محلات الخياطة او محلات الخردوات, اظبطي الشكل على المكان اللي عايزة تحطيها فيه, والزقيها عليه بغرا ملابس, وثبتيها حوالين داير بالخيط.

افكار لتجديد الملابس 13
افكار لتجديد الملابس 13

11- استخدمي ال Pom-pom على البلوفر:

ممكن تجددي البلوفر بطريقة سهلة جدا, هاتي Pom-poms بحجم متوسط وخيطية بشكل عشوائي على كم البلوفر كله.

افكار لتجديد الملابس 14
افكار لتجديد الملابس 14

12- حولي البنطلون الجينز لجيبة جينز:

لو عندك بنطلون جينز مش بتلبسيه ممكن تغيري من شكله وتحوليه لجيبة جينز, هاتي البنطلون قصية بالطول اللي انتي عايزاه, افتحيه من النص هاتيه على بعضه من قدام ومن ورا وخيطيه على المكنة.

افكار لتجديد الملابس 15
افكار لتجديد الملابس 15

13- جددي السنيكرز:

لو عندك سنيكرز ابيض عايزة تجدديه, هاتي خيوط الوان وخرز, وابدأي اعملي اشكال بالخيط والخرز على السنيكرز وكل واحدة ممكن تبتكر اشكال زي ما هي عايزة بالالوان اللي تختارها.

14- جددي البلوفر:

لو عندك بلوفر سادة عايزة تجدديه, ممكن تشغلي على كم البلوفر عند منطقة الكوع بالكورشية, بلون مختلف عن لون البلوفر اختاري اي لون يمشي مع لون البلوفر بتاعك.

افكار مبتكرة تجددي بيهم هدومك القديمة

افكار تجددي بيهم هدومك القديمة
افكار تجددي بيهم هدومك القديمة

مقالات متعلقه

ستايلات للبس العباية المفتوحة في رمضان

ستايلات للبس العباية المفتوحة في رمضان

موضة الفستان المضلع لموسم الشتا

موضة الفستان المضلع لموسم الشتا

افضل تنسيقات الوان لدولابك في الشتا

افضل تنسيقات الوان لدولابك في الشتا