ازاي تستخدمي زيت جوز الهند لعلاج السيلوليت

بقلمريهام محمود فيتخسيس الوزن visibility1874

احنا اتكلمنا قبل كده عن السيلوليت واسبابه وقولنا على اكتر من طريقة لعلاجه, والنهاردة هنعرف مع بعض طريقة علاج السيلوليت بزيت جوز الهند, وازاي تستخدميه عشان ترجعي بشرتك ناعمة خالية من السيلوليت.

علاج السيلوليت بزيت جوز الهند:

1- استهلاك زيت جوز الهند:

واحدة من طرق استخدام زيت جوز الهند هي استهلاكه يوميا, ممكن تاخدي معلقتين كبار من زيت جوز الهند يوميا قبل التمرين او تستخدميه في الطبخ, ويمكن في كتير يكونوا مستصعبين فكرة اكل زيت جوز الهند لكن الموضوع مش صعب, وزي ما قولنا تقدري تستخدميه في الطبخ, او تضيفيه لمشروباتك واكلاتك.

تناول زيت جوز الهند هيساعد على عزيز عملية حرق الدهون وهيساعد على حرق السيلوليت والتخلص منه, ومعلقتين او تلاتة منه بالكتير مع الاكل هتكون كمية كافية جدا.

علاج السيلوليت بزيت جوز الهند

2- دهن المناطق اللي فيها سيلوليت بالزيت:

دهن المناطق اللي بتعاني فيها من السيلوليت تعتبر من اسهل الطرق, دلكي الاماكن اللي فيها سيلوليت يوميا بزيت جوز الهند, الجلد بيمتصه بسهولة وهيساعد على تكسير الترسبات الدهنية في الخلايا, ده غير انه بيغذي البشرة وبينعمها جدا.

علاج السيلوليت بزيت جوز الهند

3- استخدام فرشة جافة وزيت جوز الهند:

الطريقة دي من الطرق المنتشرة جدا لعلاج السيلوليت, وفي الطريقة دي بيتم دهن زيت جوز الهند على المناطق اللي فيها سيلوليت, وبعدين بتدلكيها بفرشة جافة, والافضل انك تختاري فرشة الجسم المصنوعة من مواد طبيعية وتتجنبي الانواع المصنوعة من الالياف الصناعية, ادهني زيت جوز الهند بعد ما تاخدي شاور سخن مباشرة وبعدين دلكي بالفرشة لتحفيز الجهاز اللمفاوي في الجسم.

الطريقة دي بتساعد كمان في التحلص من السموم والدهون المتراكمة في الخلايا عن طرق فتح مسام البشرة, الفرشة الجافة بتساعد كمان على التخلص من الجلد الجاف على الركبتين والكوعين والكاحلين, وده هيضمن شد الجلد وتدفق الدم لجميع اجهزة الجسم بشكل سليم.

الطريقة المثالية لاستخدام الفرشة:

ادهني جسمك كويس جدا بزيت جوز الهند, دلوقتي دلكي الجسم في حركات دائرية من اول القدمين وبعدين الساقين والصدر والبطن والذراعين, واتأكدي انك تحركي الفرشة عكس اتجاه عقارب الساعة على منطقة البطن, واتجنبي تفضلي رايحة جايه على نفس المنطقة كتير, او تدلكي بعنف اوي عشان متجرحيش نفسك او تسبب احمرار وحروق.

وممكن تعملي الطريقة دي مرتين في اليوم لحد ما توصلي للنتايج المطلوبة.

علاج السيلوليت بزيت جوز الهند

4- القهوة وزيت جوز الهند:

في طريقة تانية للتخلص من السيلوليت وهي مقشر القهوة وزيت جوز الهند.

المكونات:

¼ كوباية قهوة.

3 معالق كبيرة سكر.

من 2 – 3 معالق كبيرة زيت جوز هند دافي وسايح.

الطريقة:

اخلطي المكونات مع بعض لتشكيل عجينة, وخزنيه في اي برطمان زجاج, وسخنيه قبل كل استخدام على حمام مية سخنة, دلكي المقشر على المناطق اللي فيها سيلوليت, لمدة 15 دقيقة وبعدين اغسليه, استخدمي المقشر ده من مرتين لتلات مرات في الاسبوع لافضل النتايج, وهتلاحظي نتايج خلال اسبوع او اسبوعين.

زيت جوز الهند هيساعد على فتح المسام المسدودة وترطيب البشرة, والمقشر بشكل عام بيساعد على تحفيز تدفق الدم في الجسم بشكل سليم.

علاج السيلوليت بزيت جوز الهند

5- زيت جوز الهند والزيوت الاساسية:

الزيوت الاساسية من انواع الزيوت اللي بتساعد على التخلص من السيلوليت لما تخلطيها مع زيت جوز الهند, اخلطي زيت جوز الهند مع اي نوع زيت اساسي زي زيت اللافندر او الزيوت الحمضية زي زيت البرتقان او الليمون, وادهني الخليط على اماكن السيلوليت, الخليط ده ليه نتايج فعالة جدا وتأثير قوي جدا في اذابة الدهون الزيادة المتراكمة تحت الجلد.

علاج السيلوليت بزيت جوز الهند

طرق اضافية لعلاج السيلوليت:

جنب استهلاك وتطبيق زيت جوز الهند, في طرق تانية مساعدة ممكن تستخدميها عشان تديكي نتيجة اسرع ومضمونة ومنع تكرار المشكلة تاني.

– دخلي القلويات في نظامك الغذائي: دخلي الاطعمة القلوية زي الخضروات الورقية الخضرا والفواكه الطازة في نظامك الغذائي بشكل يومي, الاطعمة دي بتساعد على منع تكوين جو حمضي في الجسم اللي ممكن يسبب بعد كده تكوين السيلوليت.

– السوايل: اشربي مية كتير وعصاير فاكهة طازة, ده بيساعد على التخلص من السموم من خلايا الجسم, وهتكوني محتاجة كمان انك توقفي المشروبات اللي بتحتوي على كافيين ومشروبات الطاقة.

– الرياضة: التمارين الرياضية مهمة جدا لو عايزة تتخلصي من السيلوليت, ولو مش هتقدري تروحي جيم بشكل يومي ممكن تركبي عجل او تجري, او تعملي تمارين في البيت, وحاولي تركزي على التمارين اللي بتستهدف الساقين وعضلات البطن ومنطقة الحوض بشكل خاص.

– استشيري دكتور: تقدري كمان تستعيني بمساعدة طبية عشان يحطلك نظام غذائي صحي ومناسب تمشي عليه يساعدك على علاج السيلوليت.

علاج السيلوليت بزيت جوز الهند

تحذيرات عند استخدام زيت جوز الهند:

بعد ما عرفنا طرق استخدام زيت جوز الهند لعلاج السيلوليت, لازم نعرف كمان الاعراض الجانبية ليه.

– لاصحاب البشرة الحساسة, لازم تعملي اختبار حساسية لزيت جوز الهند على الجزء السفلي من المعصم او على القدم عشان تشوفي لو في اي رد فعل تحسسي منه, لو بشرتك بقت حمرا, او متقشرة, او حسيتي بحكة, يبقى من الافضل انك متستخدميش زيت جوز الهند.

– الكميات الكبيرة من زيت جوز الهند ممكن تأدي لارتفاع مستويات الكوليسترول, عشان كده بننصحك متبالغيش في الكمية وتستخدمي كمية بسيطة.

– السكراب او التدليك بشكل عنيف او مبالغ فيه ممكن يكسر طبقة البشرة الخارجية ويأدي لجفاف الجلد, عشان كده بننصحك انك تدلكي البشرة بشكل خفيف ولطيف.

علاج السيلوليت بزيت جوز الهند

6 تمارين هتساعدك تتخلصي من السيلوليت في اسبوعين بس

تمارين للتخلص من السيلوليت
تمارين للتخلص من السيلوليت