افضل 5 طرق للتخلص من دهون الجسم بسرعة ومترجعش تاني

ريهام محمود
ريهام محمود
24238

سواء كنتي بتعاني من دهون في منطقة البطن او الفخدين او الذراعين, في كل الاحوال التخلص من الدهون مش مهمة سهلة, الموضوع محتاج مجهود ووقت عشان تتخلصي من الدهون وتوصلي للجسم اللي انتي عايزاه والاهم انك تحافظي على النتيجة اللي وصلتي لها, والنهاردة من خلال موضوعنا هنساعدك في المهمة دي وهنقولك طرق التخلص من الدهون بسرعة وفي نفس الوقت تحافظي على النتيجة ومترجعش تاني.

طرق التخلص من الدهون بسرعة:

1- الراحة والاسترخاء:

ايوه انتي قريتي صح, الراحة والاسترخاء واحدة من وسائل فقدان الدهون, لان النوم والراحة الكافية ضرورية لجسمك للاصلاح واعادة البناء والتجديد, لو انتي بتمارسي تمارين رياضية هيكون مهم جدا انك تاخدي كفايتك في النوم بالليل وتدي جسمك الراحة المناسبة, وحسب الدراسات اثبتوا ان الاشخاص اللي بيناموا 7 ساعات بيفقدوا وزن زيادة بنسبة 33% عن اللي مش بياخدوا كفايتهم في النوم, والدراسة اثبتت ان الشخص لما بينام 7 ساعات او اكتر بيتم تنظيم هرمونات الجسم.

طرق التخلص من الدهون 1
طرق التخلص من الدهون 1

2- اختيار المشروبات المناسبة:

المشروبات اللي بتشربيها خلال اليوم مهمة جدا, في البداية كده اول ما تصحي من النوم ابدأي يومك بكوباية مية على الريق, ولازم كمان تشربي كوباية مية قبل كل وجبة, لان شرب كمية كفاية من المية هتنمع الرغبة الشديدة في الاكل والسكريات والوجبات السريعة, لان في اشخاص كتير مش بيعرفوا يفرقوا ما بين احساس العطش والجوع والموضوع بينتهي انك تاكلي كمية اكل اكتر من المطلوب, اتجبني اي مشروب بيحتوي على الصودا او السكر, ولو انتي من الاشخاص اللي بيشربوا صودا دايت وعصاير فاكهة يبقى لازم تتوقفي عن العادة دي, لان عصاير الفاكهة بتبقى مليانة بالسكر, ولو عايزة فعلا تتخلصي من الدهون لازم توقفي المشروبات دي وتستبدليها بمشروبات صحية زي الشاي الاخضر, والمية مع شرايح الفاكهة, القهوة السودا من غير سكر, القهوة ليها قدرة على تسريع عملية التمثيل الغذائي والتخلص من دهون الجسم, وبتحافظ على عملية الحرق.

طرق التخلص من الدهون 2
طرق التخلص من الدهون 2

3- ضيفي الخل لنظامك الغذائي:

استهلاك حوالي من 1 – 2 معلقة كبيرة من الخل يوميا بيقلل من وزن الجسم ومحيط الخصر والدهون في البطن, وتم ملاحظة انه من خلال تناول الخل بيتطور شعور الشبع في الجسم وبيقلل من السعرات الحرارية بمقدار 275 سعرة حرارية, وسهل جدا انك تضيفي الخل لنظامك الغذائي, ممكن تشربي خل التفاح المخفف بالمية كمشروب خلال اليوم اكتر من مرة وقبل الوجبات لانه بيساعد على تقليل الشهية, بس ضيفي معلقتين كبار لكوباية مية واشربيها, او ممكن تضيفيه على اكلاتك.

طرق التخلص من الدهون 3
طرق التخلص من الدهون 3

4- ضيفي البروبيوتيك لنظامك الغذائي:

الكائنات الحية المجهرية او البكتيريا الجيدة اللي موجودة في الامعاء بتلعب دور كبير في كل حاجة في الجسم, والدراسات اثبتت ان زيادة تناول البروبيوتيك اما عن طريق المكملات الغذائية او عن طريق الاكل بيزود من عملية حرق الدهون,  ويقال ان واحدة من البكتيريا دي واسمها Lactobacillus فعالة في تخسيس الوزن, ولاحظوا ان الاشخاص اللي بياكلوا الزبادي اللي تعتبر واحدة من الاطعمة اللي فيها البكتيريا دي ان في انخفاض عندهم في دهون الجسم بنسبة 3 – 4%.

ومن الاطعمة الغنية بالبروبيوتيك اللي ممكن تدخليها في نظامك الغذائي بشكل يومي الزبادي, البطاطس الباردة, مخلل الكرنب, الشوكولاتة الغامقة, الثوم, الموز الاخضر او اللي مش مستوي, الجبنة, الزيتون المخلل والمخللات بشكل عام.

طرق التخلص من الدهون 4
طرق التخلص من الدهون 4

5- الرياضة واكل الحديد:

مش كفاية انك تعملي بس تمارين كارديو, لكن انتي محتاجة كمان لبناء كتلة عضلية, عشان كده انتي محتاجة لتمارين قوة كمان, لان تمارين القوة هتساعد على بناء الكتلة العضلية مكان الدهون اللي هتفقديها, وبالتالي هتحرقي سعرات حرارية اكتر, وثبت ان المزج بين تمارين الايروبكس وتمارين القوة مع بعض هيزود من فقدان الدهون.

بالاضافة للتمارين لازم تتأكدي انك بتدخلي كمية كافية من الحديد في نظامك الغذائي, لان نقص الحديد ممكن يأدي لضعف اداء الغدة الدرقية المسؤولة عن تنظيم عملية التمثيل الغذائي, عشان كده حاولي تدخلي في نظامك الغذائي الاطعمة الغنية بالحديد زي السبانخ, الفراخ, البنجر, الطماطم, اللحوم الحمرا, الكبدة, زبدة الفول السوداني, البيض, الحبوب الكاملة, البقوليات,الفواكة المجففة, الخوخ, والمأكولات البحرية زي الاسماك الدهنية السلمون والتونة والاطعمة البحرية زي بلح البحر والمحار.

طرق التخلص من الدهون 5
طرق التخلص من الدهون 5

وفي النهاية في طرق كتير اللي من خلالها تقدري تسرعي من عملية حرق الدهون في جسمك, لكن الخلاصة هو انك محتاجة تمشي على عادات صحية وتاكلي اكل صحي, وتحافظي على نفسك فدر الامكان انك تدخلي في حاجات ممكن تسبب زيادة في الوزن, حافظي على نظام غذائي صحي ومغذي وفي نفس الوقت قليل السعرات الحرارية.

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن