طرق عمل مشروبات لعلاج حب الشباب

بقلمريهام محمود فيبشرة visibility529

علاجات حب الشباب كتير جدا سواء كريمات او مستحضرات او مشروبات وفي النهاية ليكي اختيار الطريقة اللي انتي عايزاها لعلاج حب الشباب, وواحدة من اكتر الطرق الفعالة لعلاج حب الشباب هي عن طريق استهلاك المشروبات اللي بتساعد على تغذية الجلد وعلاج حب الشباب من الداخل, والنهاردة من خلال موضوعنا هنقولك طرق عمل مشروبات لعلاج حب الشباب.

مشروبات لعلاج حب الشباب:

المكونين الاساسيين في كل الوصفات اللي معانا النهاردة هما البقدونس وعصير الليمون, مع اضافات تانية.

1- عصير الليمون والبقدونس الاساسي:

المكونات:

– 1 معلقة كبيرة عصير بقدونس.

– عصير ليمونة.

– كوباية مية باردة.

– ذرة ملح.

– التحليه سكر او عسل “حسب رغبتك”.

الطريقة:

في كوباية المية اعصري الليمونة, وضيفي عصير البقدونس والملح, وقلبيهم مع بعض كويس, وكده يبقى العصير جاهز للشرب, اشربي منه مرة واحدة في اليوم من 2 – 3 ايام في الاسبوع لافضل النتايج.

مشروبات لعلاج حب الشباب

2- عصير الليمون والبقدونس مع الجنزبيل:

المكونات:

– 3 اوراق بقدونس طازة.

– 1 ½ كوباية مية جوز الهند “لو مش متوفرة استخدمي مية عادية”.

– شريحة ليمون.

– قطعة جنزبيل 2 بوصة متقطعة شرايح.

الطريقة:

في برطمان اخلطي اوراق البقدونس وشرايح الليمون والجنزبيل وضيفي لهم مية جوز الهند او المية العادية حسب اللي هتستخدميه, اقفلي البرطمان وسيبي المكونات منقوعة لمدة ساعة, وبعدها اشربيه, كرري المشروب ده يوميا لحد ما تلاقي نتايج ملحوظة منه.

مشروبات لعلاج حب الشباب

3- شاي البقدونس وعصير الليمون:

المكونات:

– ¼ كوباية اوراق بقدونس.

– 2 معلقة صغيرة عصير ليمون.

– كام نقطة خل.

– كوباية مية.

الطريقة:

في حله صغيرة او كنكه حطي المية وضيفي لها الخل واوراق البقدونس, حطيهم على النار وسيبيهم يغلوا مع بعض لمدة 6 دقايق تقريبا, وفي الاخر خالص بعد ما ترفعي الخليط من على النار ضيفي عصير الليمون وقلبي الخليط كويس, بعدها صفية واشربي منه مرة واحدة يوميا لافضل النتايج.

مشروبات لعلاج حب الشباب

4- سموزي الليمون والبقدونس:

المكونات:

– اوراق بقدونس ملأ الكف.

– 1 ثمرة خيار.

– ليمونة.

– قطعة جنزبيل 1 بوصة تقريبا.

– سبانخ ملأ الكف.

– ثمرة برتقان.

– كوباية مية.

– مكعبات تلج.

الطريقة:

قطعي الليمون والجنزبيل والبرتقان والخيار لقطع صغيرة, حطي كل المكونات في الخلاط بالترتيب ده: برتقان, ليمون, بقدونس, سبانخ, جنزبيل, مية, ومكعبات التلج.

اضربي كل المكونات مع بعض بسرعة عالية لمدة 30 ثانية, وبعدين بسرعة منخفضة لمدة 30 ثانية كمان, وكده يبقى المشروب جاهز صبيه في كوباية واشربيه, اشربي منه مرة واحدة كل يوم لحد ما تظهر نتايج ملحوظة.

مشروبات لعلاج حب الشباب

5- عصير الليمون والبقدونس مع التفاح:

المكونات:

– 2 كوباية بقدونس مفروم.

– 2 كوباية خيار مفروم.

– 3 معالق كبيرة عصير ليمون.

– 1 ثمرة تفاح مفرومة.

– 1 عود كرفس.

– ¼ معلقة صغيرة جنزبيل بودر.

– كوباية مية.

الطريقة:

في الخلاط حطي البقدونس والخيار وعصير الليمون والتفاح والمية والجنزبيل والكرفس, اضربيهم مع بعض لحد ما يبقى الخليط ناعم, ولو عايزاه ساقع اوي ضيفي مكعبات التلج في الخلاط مع باقي المكونات, والكمية دي تتقسم على مرتين, اشربي منه مرة واحدة في اليوم مرتين في الاسبوع لافضل النتايج.

مشروبات لعلاج حب الشباب

3 طرق سهلة لعمل غسول للبشرة لعلاج حب الشباب