10 طرق للتخلص من الطاقة السلبية في البيت

ريهام محمود

في

9209

الطاقة السلبية في البيت من الحاجات اللي مش هتقدري تشوفيها لكن هتحسي بيها لانها هتأثر عليكي وعلى كل اللي في البيت بشكل سلبي, ممكن تسبب الخناق المستمر, تقلل ثقتك من نفسك, وحتى ممكن انها تسبب اضطرابات عاطفية, عشان كده ضروري انك تتخلصي منها عشان ترجعي السلام والطاقة الايجابية للبيت وتتخلصي من كل المشاكل, والنهاردة من خلال المقال بتاعنا هنقولك 10 طرق للتخلص من الطاقة السلبية في البيت.

طرق للتخلص من الطاقة السلبية:

1- نضفي البيت:

الاوضة او البيت المكركب او اللي مش مترتب ومش متنضف ممكن يسبب عدم راحة ويخلي في طاقة سلبية في المكان, لكن الاوضة او البيت المترتب والنضيف بيكون مريح اكتر, عشان كده للتخلص من الطاقة السلبية, مهم انك تخلي كل ركن وزاوية في البيت نضيف بقدر الامكان, والاثاث نضيف, والمطبخ نضيف, وارمي كل الحاجات اللي مالهاش لازمة او القديمة ومش بتستخدميها.

2- بخري البيت:

لو عايزة تحسي بهدوء نفسي وتبعدي الطاقة السلبية عن البيت, جربي تبخري البيت بالاعشاب, ودي من الطرق القديمة اللي ثبت فعاليتها جدا, عشبة المرمرية من الاعشاب اللي ممكن تستخدميها تبخري بيها البيت, كل اللي هتعمليه هاتي حزمة مرمرية احرقيها وبخري بيها البيت كله, ده هيساعد على تحويل الطاقة السلبية لطاقة ايجابية, بالاضافة ان ريحة المرمرية مهدئة جدا.

3- اعادة ترتيب اثاث البيت:

واحدة من الاسباب اللي بتخلي الطاقة السلبية موجودة في المكان هو انك تتمسكي ان كل حاجة حواليكي تبقى زي ما هي من غير ما تغيريها, وبالتالي عشان تتخلصي منها ممكن تغيري اماكن اثاث البيت, لكن مع ده طبعا اتأكدي انك تغير اماكن الاثاث بطريقة تريحك وتناسب مساحة البيت, ممكن تجربي اعادة الترتيب ده مرة واحدة كل شهر هيكون كافي.

4- دخلي الشمس للبيت:

الهوا النقي واشعة الشمس تعتبر السم اللي بيقتل الطاقة السلبية اللي موجودة في البيت, لان الطبيعة في حد ذاتها فيها طاقة ايجابية, عشان كده بننصحك تفتحي ابواب وشبابيك البيت اول ما تصحي من النوم الصبح عشان تخلي الشمس تدخل البيت, وممكن انتي كمان تقعدي في الشمس شوية تاخدي حمام شمس هتخلصك من الاكتئاب والقلق وتزود جسمك بجرعة من فيتامين D.

5- رشي ملح البحر:

ملح البحر مليان بطاقة ايجابية, وممكن يساعد في طرد الطاقة السلبية من البيت بشكل فعال جدا, لو رشيتي شوية ملح في اركان البيت, وممكن تضيفي الملح للمية وترشي منها في اركان البيت كله, ممكن ترشي الملح في اوضتك من بالليل والصبح تتخلصي منه كله, ممكن حتى انك تحطي من ملح البحر في البانيو وتنقعي جسمك فيه شوية هيخلصك من التوتر والقلق وهيديكي حيوية وطاقة.

وعشان كده لو نلاحظ اننا لما بنقعد دايما قدام البحر بنحس براحة نفسية لانه بيسحب كل الطاقة السلبية من الجسم.

6- صقفي بصوت عالي:

التصقيف بصوت عالي ممكن انه يفرق الطاقة السلبية, وده لان اهتزازات وصوت التصقيف ليها صدى ايجابي بينتشر فورا مجرد ما تبدأي بالتصقيف, والحقيقة ان ممكن كمان يكون الاصوات العالية عموما ليها نفس التأثير زي صوت الرعد, الاجراس, الالعاب النارية, ليهم تقريبا نفس تأثير التصقيف, بس اتأكدي ان التصقيف يكون خفيف ونقي بدل التصقيف التقيل.

7- رشي زيوت اساسية:

سواء عايزة تتخلصي من الطاقة السلبية في بيتك او في مكتبك, الزيوت الاساسية ممكن يكون ليها تأثير فعال جدا في التخلص منها, الزيوت دي هتعمل جو منعش للبيت وهتخلصك من الطاقة السلبية, وهتدخل الطاقة الايجابية في نفس الوقت, بالاضافة انها مليانة بالخصائص الطبية المفيدة, يعني تعتبر طريقة رائعة جدا انك تخلي بيتك خالي من الطاقة السلبية وصحي في نفس الوقت بطريقة طبيعية بسيطة.

ومن الزيوت الاساسية اللي ممكن تستخدميها وترشيها في البيت, زيت المرمرية, زيت اكليل الجبل “الروزماري”, زيت اللافندر, زيت اللبان, زيت العرعر, زيت البابونج, زيت النعناع, زيت القرفة, زيت الليمون.

8- حطي زرع في البيت:

الطبيعة زي ما قولنا هي في حد ذاتها جواها طاقة ايجابية, وتعتبر من طرق علاج الطاقة السلبية, عشان كده بننصحك انك تدخلي مساحات خضرا في البيت وتحطي زرع في اركان البيت, هتخلصك من الطاقة السلبية وهتبقى ديكور حلو جوه البيت, ممكن تحطي ريحان, خيزران, اوركيد وغيرها من الاختيارات اللي ممكن تستخدميها.

9- حطي قطع كريستال في الديكور:

الكريستال مش بس هيخلصك من الطاقة السلبية, لكن كمان بتمنعها انها ترجع البيت تاني, بالاضافة لكده كمان ممكن يساعدك لمنع الطاقة السلبية اللي ممكن يدخلوها الناس اللي بيجوا عندك البيت, بانك تحطي قطع كريستال جنب مدخل البيت, او في مكان في وسط البيت, ومن انواع الكريستالات اللي ممكن تستخدميها التورمالين الاسود, الكوارتز الدخاني, العقيق الاسود, الاباتشي, وغيرها من انواع الكريستال اللي ممكن تحطيها كقطعة ديكور وفي نفس الوقت تخلصك من الطاقة السلبية.

10- رشي زعفران:

الزعفران من الاعشاب اللي ممكن تمنع كل انواع الطاقات السلبية والشريرة من البيت, حطي كام عود زعفران عند مدخل البيت اثناء غروب الشمس عشان تحققي اقصى قدر من التأثير, ممكن كمان تحطي شوية زعفران في مية وترشي بيها البيت كله عشان تنقيه من اي طاقة سلبية.

تقدري تستخدمي واحدة بس من الطرق دي او اكتر من طريقة مع بعض عشان يعملوا تأثير اقوى على الطاقة السلبية في البيت, كمان ممارسة التأمل بانتظام ليها تأثير فعال جدا في التخلص من الطاقة السلبية, ياللا جربي الطرق دي واتخلصي من الطاقة السلبية في بيتك بشكل فعال.