9 حيل بسيطة للحلاقة لبشرة ناعمة من غير اي مشاكل

ريهام محمود

في

16691

اختيار الحلاقة لازالة الشعر الزيادة تعتبر واحدة من الطرق السهلة والسريعة والمناسبة للبنات اللي بشرتهم حساسة من السويت او الشمع, لكن مع ذلك متعتبرش الطريقة الاكتر فاعلية في ازالة الشعر لو شعرك كثيف وخشن في مناطق معينة زي الساقين, في الحالة دي الحلاقة ممكن تسبب مشاكل وبثور في البشرة, لكن احنا نقدر نتفادى المشاكل دي بشوية حيل بسيطة, وده اللي هنعرفه النهاردة من خلال السطور الجايه هنقولك 9 نصايح لحلاقة الشعر الزائد عشان تحافظي على بشرتك ناعمة ومن غير ما يسبب لك اي مشاكل.

نصايح لحلاقة الشعر الزائد:

1- خلي الحلاقة اخر حاجة بعد الشاور:

حتى لو مش بتخلي الحلاقة اخر حاجة في الشاور, متحلقيش على بشرة جافة, اغسلي بشرتك الاول بمية دافية وخلي البشرة تمتص المية, لان المية هتساعد ان المسام تتفتح وتطري الجلد, وده هيخلي الحلاقة اسهل وناعمة, ومش هتسببلك اي مشاكل في بشرتك.

2- قشري بشرتك قبل الحلاقة:

عشان تضمني حلاقة من غير مشاكل يبقى لازم تنعمي بشرتك قبل ازالة الشعر, وده مش هيحصل غير بطريقة واحدة بس هي التقشير قبل الحلاقة, التقشير بيساعد على ازالة خلايا الجلد الميتة, وده هيخلي بشرتك ناعمة والمكنة تمشي عليها بسهولة, بس لو تعملي تقشير قبل الحلاقة يبقى متعمليش تاني بعد الحلاقة لان ده ممكن يسبب تهيج للجلد.

3- شوفي اتجاه الشعر:

لو هتستخدمي المكنة لحلاقة الشعر الزائد ممكن تضمني ان بشرتك هتفضل ناعمة ومش هيحصل اي مشاكل للجلد وتوصلي لافضل النتايج انك تبدأي الحلاقة في اتجاه نمو الشعر, وبعد كده بدلي اتجاه المكنة عكس اتجاه نمو الشعر, لكن لو بشرتك حساسة يبقى متستخدميش المكنة خالص عكس اتجاه نمو الشعر, خليها في اتجاه نمو الشعر بس.

4- استخدمي كريم الحلاقة:

على الرغم ان المية بس مع مكنة الحلاقة تديكي نتايج كويسة لو مستعجلة, لكن استخدام كريم الحلاقة مع المعنى اكيد هيكون افضل, لان الكريم هيمنع الاحتكاك وهيعتبر قاعدة للمكنة, وده بدوره هيقلل الاحمرار والتهيج والحكة بعد الحلاقة, يعني في كل الاحوال بننصحك باستخدام كريم الحلاقة, ولو في اي وقت مش متوفر عند كريم حلاقة, ممكن تستخدمي بلسم الشعر, او غسول البشرة يكون كريمي.

5- مرري المكنة مرة واحدة بس:

اكيد بنات كتير بيقعوا في الغلطة دي اثناء الحلاقة, وهو تمرير المكنة على نفس المنطقة اكتر من مرة عشان تتأكدي انك اتخلصتي من الشعر كله وان بشرتك ناعمة, لكن اللي بيحصل العكس تمرير المكنة اكتر من مرة ممكن يسبب ضرر وتهيج الجلد, وده هيأدي للاحمرار وجفاف الجلد, عشان كده بننصحك انك تمرري المكنة على نفس المنطقة مرة واحدة بس بالمكنة اللي بيكون فيها شفرتين او تلات شفرات, واضغطي بشكل خفيف جدا على المنطقة اثناء الحلاقة.

6- استخدمي المكنة الخاصة بالنساء بس:

مكنة الحلاقة الرجالي ممكن تكون ارخص في السعر لكن هتسبب لك ضرر, وده لانهم مش بيتوفر فيهم نفس المزايا اللي بتتوفر في مكنة الحلاقة النسائية, يعني مثلا مكنة الحلاقة النسائية بتيجي بشريط ترطيب اضافي بيساعد على الحفاظ على نعومة ونضارة البشرة, كمان بتيجي بمميزات تانية زي الرؤوس اللي بتكون بزاوية عشان تسهل الحلاقة في الاماكن اللي بيكون صعب الوصول ليها, وبتيجي كمان فيها وسائد واقية عشان متسببش اي ضرر للبشرة.. شوفي من هنا 17 وصفة طبيعية لعلاج الحبوب اللي بتسببها مكنة الحلاقة بعد ازالة الشعر.

7- احلقي مساحة صغيرة:

الحلاقة على مساحات كبيرة مرة واحدة ممكن يكون اسهل وبياخد وقت اقل, لكن مش بتشيل الشعر كله بكفاءة, لما تيجي تحلقي المرة الجاية جربي احلقي مساحات صغيرة مع الضغط الخفيف على الجلد, بالطريقة دي الحلاقة هتبقى دقيقة اكتر وهتديكي نتايج افضل, بالاضافة ان الشعر هياخد وقت اطول على ما يطلع تاني.

8- استخدمي زيت للجسم بعد الحلاقة:

زي ما الرجالة بيحتاجوا مرطب او لوشن بعد الحلاقة, انتي كمان محتاجة لترطيب البشرة بالزيت عشان يحافظ على نعومة البشرة, لان بعد التقشير والحلاقة البشرة ممكن يحصلها لها جفاف, لكن استخدام الزيت بعد الحلاقة هيمنع الجفاف ده, عشان كده الافضل تدلكي بشرتك باي نوع زيت او لوشن والافضل تكون بشرتك رطبة شوية قبل الزيت عشان تخليها ناعمة وبتلمع, ممكن تستخدمي لتدليك البشرة زيت الزيتون او زيت جوز الهند او زيت اللوز الحلو.. اعملي بنفسك لوشن بعد ازالة الشعر الزائد لبشرة ناعمة جدا.

9- استخدمي مكنة حلاقة جديدة بعد 3 مرات:

الشفرة لو باردة ممكن تسبب تهيج واحمرار الجلد, وانتي تقدري تتجنبي المشاكل دي لو اتخلصتي من مكنة الحلاقة بعد 3 استخدامات, واستخدام مكنة حلاقة جديدة, لانه لحد 3 مرات الشفرة بتكون حادة كفاية وهتديكي نتايج كويسة لكن بعد كده الافضل تغيريها.