10 استخدامات لزيت جوز الهند لحل كل مشاكل الشعر

ريهام محمود
ريهام محمود
في
شعر
13270

زيت جوز الهند من الزيوت المعروفة من زمان ان ليه فوايد كتير جدا للشعر, لدرجة انك تقدري تتخلصي من كل مرطبات الشعر الغير طبيعية والسيروم ومنتجات تصفيف الشعر وتستبدليها بزيت جوز الهند بس, والنهاردة من خلال السطور الجايه هنعرف مع بعض استخدامات زيت جوز الهند للشعر, وازاي تدخليه في الوصفات الطبيعية لشعرك.

استخدامات زيت جوز الهند للشعر:

تعالوا نعرف الاول ليه زيت جوز الهند مفيد للشعر:

1- غني بمضادات الاكسدة القوية زي فيتامين E, K, اللي بتساعد على اصلاح الشعر وبناء الانسجة الصحية, وبيقلل من الالتهابات وبيصلح تلف الشعر الناتج عن كل منتجات الشعر المليانة بالمواد الكيميائية, وبيساعد على تنعيم الشعر وزيادة لمعانة.

2- بيحتوي على حمض الكابريليك وهو حمض دهني مشبع ليه خصائص مضادة للجراثيم, ومضادة للفيروسات, ومضادة للفطريات, ومضادة للالتهابات بتقتل البكتيريا والميكروبات اللي ممكن تسبب ضرر بالشعر وفروة الراس, وبيقتل الميكروبات اللي ممكن تسبب تساقط الشعر وتمنع نموه او تزود من قشرة الشعر.

3- بيحتوي على حمض اللوريك وهي دهون مشبعة صحية اللي بيساعد على تقوية الشعر وعلاج التساقط.

استخدامات زيت جوز الهند للشعر 1
استخدامات زيت جوز الهند للشعر 1

ازاي تستخدمي زيت جوز الهند للشعر بطريقة صح:

1- اول حاجة استخدمي كمية صغيرة من زيت جوز الهند على الشعر هتكون كافية جدا, لان الكمية الكبيرة منه ممكن تسد بصيلات الشعر وده اكيد مش مفيد للشعر وممكن يضره.

2- اخلطي زيت جوز الهند مع مكونات تانية, زيت جوز الهند بيزيد قوته وفعاليته لما تخلطيه مع مكونات تانية زي الزيوت الاساسية وزيت الخروع وزيت الزيتون وزيت الارجان وزيت الخردل, تقدري كمان تخلطيه مع مكونات زي العسل, البيض, الافوكادو, لما تخلطيه مع مكونات مختلفة ده هيدي شعرك فوايد اضافية وهيرطبه اكتر.

3- قبل ما تستخدميه اعملي اختبار حساسية, زي ما بنقول مع كل المكونات الطبيعية لازم تختبريها الاول عشان تعرفي مناسب ليكي ولا لا, اعملي اختبار بانك تحطي كمية صغيرة من زيت جوز الهند على جزء صغير من الشعر لان ممكن يكون في احتمال ان الشعر او فروة الراس متستجبش للزيت, عشان كده لازم تجربيه الاول قبل استخدامه.

استخدامات زيت جوز الهند للشعر 2
استخدامات زيت جوز الهند للشعر 2

وصفات طبيعية للشعر بزيت جوز الهند.

1- زيت جوز الهند لنمو الشعر:

المكونات:

من 1 – 2 معلقة كبيرة من زيت جوز الهند.

5 نقط من زيت الروزماري.

الطريقة:

سخني زيت الجوز في حمام مية سخنة, بعدها اخلطي معاه زيت الروزماري, وخدي الخليط وهو دافي حطيه على الشعر وفروة الراس ودلكيه لمدة من 5 – 10 دقايق, تقدري تسيبيه على الشعر كماسك طول الليل وتغسليه الصبح, او تسيبيه لمدة ساعة واحدة وبعدها اغسليه بشامبو طبيعي او عشبي خفيف, كرري الماسك من 2 – 3 مرات في الاسبوع.

الماسك هيساعد على زيادة نمو الشعر, وترطيبه, ومنع تساقط الشعر.

2- زيت جوز الهند لعلاج قشرة الشعر:

المكونات:

من 1 – 2 معلقة كبيرة من زيت جوز الهند.

5 نقط من زيت شجرة الشاي.

1 معلقة كبيرة عصير ليمون.

الطريقة:

اخلطي زيت جوز الهند مع زيت شجرة الشاي وعصير الليمون, قلبيهم كويس مع بعض, حطي الخليط على فروة الراس ودلكيه لمدة 10 دقايق, غطي الشعر بكيس بلاستيك او طاقية الشعر وسيبيه ساعة, وبعدها اغسليه بشامبو خفيف, كرريه من 2 – 3 مرات في الاسبوع لنتايج سريعة.

ممكن كمان تضيفي معلقة كبيرة من جل الصبار لزيت جوز الهند عشان تزودي فايدته وتدي تغذية اضافية لفروة الراس, والصبار من المكونات الفعالة جدا لحل كل مشاكل الشعر, وبيساعد على علاج الشعر التالف والهيشان وبيديه لمعان.

3- زيت جوز الهند لاطراف الشعر المنقسمة والمقصفة:

المكونات:

من 1 – 2 معلقة كبيرة من زيت جوز الهند.

2 بيضة.

1 معلقة كبيرة عسل نحل.

الطريقة:

اخلطي البيض مع زيت جوز الهند كويس, وبعدين ضيفي لهم العسل وقلبيهم مع بعض, وحطي الخليط على فروة الراس والشعر, سيبيه على الشعر لمدة من 30 – 40 دقيقة وبعدها اغسليه بشامبو خفيف, كرريه مرة واحدة في الاسبوع.

الماسك ده هيوفر للشعر العناصر الغذائية اللازمة لتحسين الشعر الجاف والتالف وانقسام الاطراف, لان البيض بيحتوي على كمية كبيرة من البروتين اللي بتغذي الشعر وتعزز نموه, والعسل هيرطب فروة الراس ويخليها صحية.

4- زيت جوز الهند لتساقط الشعر:

المكونات:

من 1 – 2 معلقة كبيرة من زيت جوز الهند.

7 نقط من زيت الروزماري “اكليل الجبل”.

1 معلقة كبيرة من عصير الجنزبيل.

الطريقة:

هاتي قطعة جنزبيل صغيرة ابشريها واضغطي عليها طلعي منها العصير, اخلطي عصير الجنزبيل مع زيت جوز الهند وزيت الروزماري, حطي الخليط على فروة الراس, سيبيه لمدة من 20 – 30 دقيقة, وبعدها اغسليه بشامبو خفيف, كرري الوصفة من 2 – 3 مرات في الاسبوع.

الجنزبيل مفيد جدا لعلاج تساقط الشعر لانه غني بالبوتاسيوم والمغنسيوم وفيتامين E, وده بيخليه افضل علاج لتساقط الشعر, ولما تخلطي زيت جوز الهند مع الجنزبيل ده بيزود من فعاليته وبيخليه اقوى في علاج التساقط.

5- زيت جوز الهند لترطيب وتنعيم الشعر:

المكونات:

من 1 – 2 معلقة كبيرة من زيت جوز الهند.

1 معلقة كبيرة من زبدة الشيا.

1 معلقة كبيرة عسل نحل.

الطريقة:

اخلطي زيت جوز الهند مع زبدة الشيا وسيحيهم مع بعض على النار, ارفعيهم من على النار وسيبيهم يبردو وبعدين ضيفي لهم العسل, قسمي شعرك خصل ووزعي الخليط على الشعر كله وعلى فروة الراس, سيبيه لمدة ساعة وبعدين اغسليه بشامبو خفيف, كرريه مرة واحدة في الاسبوع على الاقل.

استخدامات زيت جوز الهند للشعر 3
استخدامات زيت جوز الهند للشعر 3

6- زيت جوز الهند لحشرات الشعر:

المكونات:

1 كوب من زيت جوز الهند.

15 نقطة من زيت شجرة الشاي.

7 نقط من زيت اليانسون.

الطريقة:

سيحي زيت جوز الهند وضيفي له زيت شجرة الشاي زيت اليانسون, بعد غسل الشعر سرحي الشعر بمشط سنانة ضيقة, وحطي الخليط على الشعر وفروة الراس وغطيه بكيس بلاستيك وسيبيه لمدة من 20 – 30 دقيقة, وكرري الوصفة يوميا لمدة من 7 – 9 ايام لحد ما تتخلصي من المشكلة.

7- زيت جوز الهند لعلاج تشابك الشعر:

المكونات:

من 2 – 3 معالق كبيرة من زيت جوز الهند.

2 معلقة كبيرة بلسم.

15 نقطة من زيت اللافندر.

الطريقة:

هاتي ازازة ببخاخ حطي فيها كوباية مية مقطرة وضيفي لها زيت جوز الهند والبلسم وزيت اللافندر, اقفلي الازازة ورجيها كويس عشان تخلطي كل المكونات مع بعض, رشي الخليط على الشعر المتشابك وابدأي قسمي الشعر خصلات وسرحي كل خصلة بالراحة من الاطراف للجذور بمشط خشب سنانه واسعة.

زيت جوز الهند وزيت اللافندر بيمتازوا بخاصية الترطيب العميق للشعر وتنعيمه وده بيساعد ان التشابك يتفك بسهولة, وكمان هيحسن شعرك ويعالج الهيشان.

8- زيت جوز الهند لعلاج حبوب فروة الراس والحكه:

المكونات:

من 1 – 2 معلقة كبيرة من زيت جوز الهند.

7 نقط من زيت شجرة الشاي.

الطريقة:

اخلطي زيت جوز الهند مع زيت شجرة الشاي, ادهني فروة الراس بالخليط يوميا, زيت شجرة الشاي وزيت جوز الهند الاتنين فيهم خصائص مضادة للميكروبات بتساعد على قتل الميكروبات المسببة للحبوب والحكه, وزيت جوز الهند بيقشر الجلد, وزيت شجرة الشاي بينضف مسام فروة الراس, وكمان فعال جدا لنمو الشعر والقشرة.

9- زيت جوز الهند لعلاج هيشان وتجعيد الشعر:

المكونات:

2 معلقة كبيرة من زيت جوز الهند.

7 نقط من زيت خشب الارز “هنلاقيه عند العطار”.

الطريقة:

اخلطي المكونات مع بعض, خدي كمية صغيرة اوي من الخليط وادهني بيه الشعر من الجذور للاطراف, وسرحي الشعر بالطريقة العادية.

10- زيت جوز الهند Leave in conditioner:

المكونات:

من 2 – 3 معالق كبيرة من زيت جوز الهند.

¼ كوباية خل تفاح.

20 نقطة من زيت الروزماري.

½ كوباية مية مقطرة.

الطريقة:

سيحي زيت جوز الهند وضيفي له باقي المكونات, حطي الخليط في ازازة ببخاخ رجيها كويس عشان تخلطي المكونات, رشي الخليط من اول نص الشعر لحد الاطراف, وسيبيه ينشف على الشعر لمدة دقايق, وبعدها سرحيه بالطريقة العادية وسيبيه على الشعر.

استخدامات زيت جوز الهند للشعر 4
استخدامات زيت جوز الهند للشعر 4

وصفة صينية قديمة: سيروم هيساعدك على تحفيز نمو الشعر وعلاج الشعر التالف في وقت سريع

سيروم لعلاج الشعر
سيروم لعلاج الشعر

مقالات متعلقه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية