8 اكسسوارات هتضيف للوك بتاعك وتظهره اكتر

بقلمريهام محمود فيموضة وأزياء visibility483

لو مليتي من كل اللبس اللي عندك في الدولاب وفي نفس الوقت اكيد مش هتقدري تجدديه كله, تقدري تحولي اللوك بتاعك بكل سهولة باضافات بسيطة زي الاكسسوارات, وده اللي هنعرفه النهاردة مع بعض هنقولك على 8 اكسسوارات هتظهر اللوك بتاعك اكتر.

اكسسوارات هتظهر اللوك بتاعك:

1- الـ Hoop or Dangle Earrings:

لو انتي عادة بتلبسي حلقان, جربي انك تغيري الستايل وتلبسي الحلقان الكبيرة الطوق تعتبر طريقة بسيطة جدا لتحويل مظهرك واللوك بتاعك بالكامل, ولو مش بتفضلي الحلقان الطوق الكبيرة ممكن تلبسي الحلقان الدلاية, هتضيف لك اناقة كلاسيكية للوك بتاعك لحد الحلقان بالستايل البوهيمي اللي هتضيف لك لوك جريء ومميز, ولو عاملة اكتر من خرم في الودن ممكن تجربي تمزجي ما بين الحلقان الطوق والحلقان الدلاية للوك مختلف.

اكسسوارات هتظهر اللوك بتاعك

2- السكارف:

السكارف من الحاجات اللي ممكن تعمل اضافة للوك بتاعك وتظهره اكتر, والسكارفات الصيفي الخفيفة ممكن تلبسيها بأكتر من طريقة, ممكن تتلبس حوالين الرقبة بالطريقة العادية, او تلفيها حوالين الوسط وتتلبس كحزام, او تلفيها حوالين المعصم وتلبسيها كأسورة, ولو انتي بتفضلي تلبسي السكارف حوالين الرقبة بس تقدري تنوعي في اللفة بتاعته وتلبسيه باكتر من شكل, يعني خليكي مبدعة ومبتكرة وجربي حاجات جديدة غير تقليدية بدل اللوك العادي اللي انتي متعودة عليه.

اكسسوارات هتظهر اللوك بتاعك

3- الـ Statement necklace:

العقد ال Statement من الحاجات اللي بتضيف كتير جدا للوك بتاعك وبتلفت النظر ليها, وهتكون اختيار رائع جدا لو عايزة تضيفي شكل مختلف للبس اللي مبيكونش فيه اي نقشة او اكسسوارات وبيبقى سادة خالص ومافيش حاجة تظهره, في الحالة دي تقدري تختاري اكتر من تصميم للعقد وتلبسيهم على الحاجات اللي مركونة عندك في الدولاب, العقد هيغيرلك شكلها بكل بساطة وهيعملك لوك جديد ملفت للنظر.

ممكن كمان تلبسي الستايل ده من العقد مع التوب بحرف V اختاري عقد قصير يكون على الرقبة مناسب لفتحة التوب بتاعك, ولو لابسة سويتر او تونيك ممكن تختاري عليه عقد طويل لحد منطقة الصدر او تحتها.

اكسسوارات هتظهر اللوك بتاعك

4- الـ Bady chain:

كمان من الاكسسوارات المميزة جدا اللي ممكن تغير اللوك بتاعك هي ال Body chain لو لابسة فستان او توب برقبة حرف V هتكون اختيار واضافة مميزة جدا هتغير اللوك بتاعك بسهولة.

اكسسوارات هتظهر اللوك بتاعك

5- الشرابات:

طريقة لبس الشراب على اللوك بتاعك ممكن تضيف له وتغير شكله, خلال موسم الصيف ممكن تلبسي الشراب على الشورت, الفستان, او الجيبة, ممكن تعتمدي على الشرابات بالالوان الزاهية عشان تدي اللوك شكل مختلف وتظهريه اكتر.

اكسسوارات هتظهر اللوك بتاعك

6- الحزام:

الحزام مش مجرد اكسسوار بيتلبس على البنطلون بس, لا انتي ممكن تستخدميه على لبسك كله بشكل عام عشان تظهريه اكتر وتجددي شكله, ممكن تغيري في شكل فستانك المفضل انك تضيفي له حزام بألوان زاهية حوالين الوسط, ممكن تختاري حزام رفيع او عريض حسب اللي بتفضليه اكتر, الحزام الملون او الحزام السلسلة هيكون اضافة حلوة جدا لاي لبس عندك شايفة انه شكله ممل او مفيهوش حاجة ملفتة تقدري بكل بساطة تظهريه بالحزام, وتقدري تستبدلي الحزام بسكارف زي ما قولنا في النقطة اللي فوق.

اكسسوارات هتظهر اللوك بتاعك

7- القبعة:

القبعة كمان من الاضافات اللي ممكن تغير اللوك بتاعك, ممكن في خروجاتك الصبح على اللبس الكاجوال تلبسي كاب البيسبول للوك كاجوال رياضي, ولو عايزة لوك انيق كلاسيك ممكن تعتمدي على القبعة الفيدورا, وهتلاقي ستايلات والوان كتير تقدري تختاري منها اللي يناسب لبسك.

اكسسوارات هتظهر اللوك بتاعك

8- نضارة الشمس:

نضارة الشمس تعتبر واحدة من الاكسسوارات الاساسية لموسم الصيف, وهي مش بس هتحميكي من الشمس لكن كمان هتظهر اللوك بتاعك, وتقدري كمان تستخدمي نضارة الشمس فوق راسك تلمي بيها الشعر للوك صيفي, ونضارة الشمس من الحاجات اللي تأكدي انها هتديكي شكل حلو ايا كانت الطريقة اللي لبساها بيها.

اكسسوارات هتظهر اللوك بتاعك

سواء كان عندك دولاب مليان باللبس الممل او بالالوان المحايدة او عندك لبس عايزة تجددي شكله, فالاكسسوارات المناسبة هتكون هي الطريقة المثالية لاضافة حياة على اللوك بتاعك وتغييره بطريقة بسيطة, من اول الاكسسوارات العادية البسيطة لحد المجوهرات, في اكسسوارات لكل ميزانية, يعني هتلاقي القطع المناسبة اللي تقدري تضيفيها للبسك.

دليل هيساعدك تختاري الاكسسوارات المناسبة مع لبسك وشكل وشك

اختيار الاكسسوارات المناسبة للبس
اختيار الاكسسوارات المناسبة للبس