طريقة عمل القطايف الحادقة بحشوات مختلفة

ريهام محمود
ريهام محمود
3113

كلنا اكيد متعودين اننا نعمل القطايف كصنف حلو بالمكسرات والشربات, لكن بما اننا في شهر القطايف فاحنا ممكن ننوع فيها ونعملها بطرق مختلفة وجديدة, والنهاردة هنقولك طريقة عمل القطايف الحادقة بحشوات مختلفة, تقدري تقدميها كطبق جانبي على سفرة الفطار.

طريقة عمل القطايف الحادقة:

القطايف باللحمة المفرومة:

المكونات:

½ كيلو قطايف.

¼ كيلو لحمة مفرومة.

½ بصلة صغيرة مفرومة.

ملح – فلفل.

شوية جبنة موتزاريلا.

طريقة التحضير:

في طاسة حطي شوية زيت صغيرين على النار, وضيفي لهم البصل المفروم وقلبيه لحد ما يدبل ويصفر, وبعدين ضيفي اللحمة المفرومة, وقلبيها وسيبيها لحد ما تنزل العصارة بتاعتها وتشرب المية, وبعدين رشي عليها الملح والفلفل, وسيبيها لحد ما تستوي, وبعدين ارفعيها وسيبيها لحد ما تبرد.

خدي من اللحمة بالمفرومة بالمعلقة وابدأي احشي القطايف بتاعتك ورشي رشة جبنة موتزاريلا وبعدين اقفليها كويس.

في طاسة فيها زيت سخن ابدأي حمري القطايق لحد ما تاخد اللون الدهبي.

طريقة عمل القطايف الحادقة 1
طريقة عمل القطايف الحادقة 1

القطايف بالجبن المشكلة:

المكونات:

½ كيلو قطايف.

½ كوباية جبنة رومي مبشورة.

½ كوباية جبنة شيدر مبشورة.

½ كوباية موتزاريلا مبشورة.

½ كوباية زيتون اسود متقطع.

طريقة التحضير:

في طبق اخلطي تشكيلة الجبن والزيتون وقلبيهم مع بعض, وبالمعلقة خدي من خليط الجبن وابدأي احشي القطايف, واقفليها كويس, وحمريها في الزيت بالطريقة العادية.

طريقة عمل القطايف الحادقة 2
طريقة عمل القطايف الحادقة 2

قطايف بالجبنة والبقدونس:

المكونات:

½ كيلو قطايف.

بقدونس مفروم.

جبنة “اي نوع حسب رغبتك”.

ملح – فلفل.

زعتر “وممكن تضيفي اي توابل تختاريها حسب ذوقك”.

طريقة التحضير:

في طبق اخلطي الجبنة مع البقدونس والملح والفلفل والزعتر, وبالمعلقة خدي من الخليط واحشي بيها القطايف واقفليها كويس وحمريها في الزيت.

طريقة عمل القطايف الحادقة 3
طريقة عمل القطايف الحادقة 3

قطايف بالفراخ:

المكونات:

½ كيلو قطايف.

¼ كيلو فراخ مسلوقة ومتقطعة صغير.

بصلة مفرومة.

فلفل رومي متقطع.

بقدونس مفروم.

جبنة شيدر شرايح.

طريقة التحضير:

هاتي طاسة حطي فيها شوية زيت على النار, ضيفي البصل وقلبيه لمدة دقيقة وبعدين ضيفي الفلفل الرومي قلبيهم مع بعض لحد ما يدبلوا, وبعدين ضيفي الفراخ وقلبيهم مع بعض كويس, خدي من الخليط بالمعلقة واحشي القطايف واقفليها كويس, رضي القطايف في صينية وحطي فوق كل واحدة شريحة جبنة شيدر, ودخليها الفرن لحد ما الجبنة تسيح على القطايف.

تقدري تنوعي في الحشوات غير اللي احنا قولناها زي ما انتي عايزة وحسب اختياراتك, ممكن تحشيها بسطرمة, خضروات مسلوقة.

طريقة عمل القطايف الحادقة 4
طريقة عمل القطايف الحادقة 4

طريقة عجينة القطايف:

لو حابه تعملي عجينة القطايف بنفسك في البيت هنقولك طريقتها.

المكونات:

1 ¼ كوباية دقيق.

½ كوباية لبن دافي.

1 معلقة صغيرة خميرة.

2 معلقة صغيرة بيكنج بودر.

1 معلقة كبيرة سكر.

1 كوباية مية.

طريقة التحضير:

دوبي السكر في اللبن الدافي وضيفي لهم الخميرة, وسيبيهم لمدة 5 دقايق على الاقل لحد ما الخميرة تتفاعل.

اخلطي الدقيق مع البيكنج بودر, وبعدين ضيفي لهم خليط الخميرة.

ضيفي المية للخليط وقلبيهم كويس مع بعض, وسيبي العجينة لمدة ساعة لحد ما تتخمر.

حطي على النار طاسة حديد او تيفال والافضل تكون سمكية عشان العجينة متتحرقش منك, وصبي معلقة كبيرة من الخليط في الطاسة, وسيبيها لحد ما القطايف تحمر من جنب واحد بس من غير ما تقلبيها وطلعيها, كرري نفس الطريقة لحد ما تخلصي كمية العجينة اللي عندك.

 لما القطايف تعمل من فوق فقاقيع وهي على النار كده تعرفي ان الخليط بتاعك ناجح ومتخمر كويس, وضروري تخلي الحرارة مش عالية عليها عشان متحمرش من تحت وتبقى نيه او سايلة من فوق.

طريقة عمل القطايف الحادقة 5
طريقة عمل القطايف الحادقة 5

بالفيديو والخطوات: طريقة عمل قواقع المكرونة المحشية بالفراخ مع الجبنة البارميزان

قواقع المكرونة المحشية بالفراخ
قواقع المكرونة المحشية بالفراخ

مقالات متعلقه

اخسري وزنك في رمضان مع 6 نصايح غذائية سهلة

اخسري وزنك في رمضان مع 6 نصايح غذائية سهلة

طريقة عمل الكنافة بالقشطة

طريقة عمل الكنافة بالقشطة

افكار ستايلات لرمضان تضيفيهم لدولابك

افكار ستايلات لرمضان تضيفيهم لدولابك