ايه اللي هيحصل لبشرتك لو استخدمي روتين “Ubtan” لمدة شهر!

بقلمريهام محمود فيبشرة visibility1229

روتين “Ubtan”هو روتين هندي للعناية بالبشرة من الطب الهندي القديم, ويعتبر الروتين ده اساسي لاي عروسة هندية قبل يوم فرحها عشان تخلي بشرتها مشرقة ومنورة في وقت سريع, وتقريبا بيستخدموه كل الفنانات الهنديات, والنهاردة هنعرف مع بعض ايه هو روتين Ubtan للبشرة وازاي نعمله.

ايه هو روتين Ubtan للبشرة؟

هو تركيبة طبيعية للعناية بالبشرة وتعتبر من الروتين الاساسي للرجالة والستات في الهند, وهو بيتكون من مكونات طبيعية متوفرة في البيت, ومكوناته الرئيسية الكركم, خشب الصندل مطحون, ودقيق الحمص, وكل عنصر من العناصر دي مليان بالفوايد للبشرة اللي بتخليها صحية ومشرقة ونضرة, وتقدري تستخدمي الخلطة دي كسكراب للبشرة, او ماسك, او حتى غسول للبشرة, ومهما كانت الطريقة اللي هتستخدميها بشرتك هتستفاد بيها.

روتين Ubtan للبشرة

ازاي تعملي ماسك Ubtan:

المكونات:

1 معلقة كبيرة من دقيق الحمص.

1 معلقة كبيرة من خشب الصندل بودر “متوفر عند العطار”.

½ معلقة صغيرة كركم بودر.

من 2 – 3 معالق كبيرة لبن.

طريقة التحضير:

– هاتي بوله او طبق صغير اخلطي فيه كل المكونات مع بعض, قلبيهم كويس لحد ما يبقى عندك عجينة ناعمة من غير اي تكتلات, ممكن كمان تضيفي للمكونات كام نقطة من مية الورد بتدي لمعة حلوة جدا للبشرة.

ممكن كمان تضيفي عصير ½ ليمونة, و 1 ½ معلقة صغيرة من زيت فيتامين E, لزيادة فايدة الماسك.

– بفرشة او بايدك افردي الخليط على البشرة, واتجنبي منطقة حوالين العين.

– سيبي الماسك على بشرتك لمدة 5 دقايق على الاقل او لحد ما ينشف.

– اغسلي بشرتك بالمية الباردة ونشفيها ورطبيها بكريم مرطب.

– والماسك تقدري تستخدميه للوش وللجسم كله.

روتين Ubtan للبشرة

فوايد ماسك Ubtan:

نسبة كبيرة من العرايس الهنديات بيستخدموا الخلطة دي كغسول للبشرة بشكل يومي قبل فرحهم بشهر ولاحظوا مع الاستمرار في الاستخدام ان بشرتهم اتغيرت وبقت صحية ونضرة اكتر لانه ليه فوايد كتير للبشرة منها.

– بينضف البشرة بشكل طبيعي: ماسك الاوبتان يعتبر منظف طبيعي للبشرة, بيساعد على تنضيفها من كل الشوائب, لان اللبن اللي هو واحد من مكونات ماسك الاوبتان غني بفيتامين A وهو فيتامين مثالي لازالة الشوائب من الجلد وتنضيفة بشكل فعال.

– بيشفي البشرة: هل بتلاحظي كل فترة ان بشرتك باهتة وفيها شحوب او لونها مش موحد؟ او بتعاني من مشكلة حب الشباب باستمرار؟ ماسك الاوبتان ممكن يكون هو الحل لكل مشاكلك, لانه بيساعد على علاج تصبغ الجلد, ومش بس بيمنع وبيعالج حب الشباب لكن كمان بيعالج ندبات حب الشباب, والبقع الغامقة, وبيساعد على تفتيح البشرة.

– التقشير: يعتبر دقيق الحمص وهو واحد من مكونات الماسك مقشر طبيعي للبشرة, وبيساعد على ازالة خلايا الجلد الميتة.

– بيقلل من التهاب الجلد: مية الورد المستخدمة في الماسك بتساعد على تقليل التهاب الجلد, ومع الاستمرار في الاستخدام هتلاحظي التغيير على بشرتك, والتخلص من الاحمرار وحب الشباب.

– بيقلل من نمو شعر الوجه: لو بتعاني من شعر الوجه بشكل كثيف, ماسك الاوبتان هيخلصك من المشكلة دي, تدليك بشرتك بالماسك كل يوم في حركات دائرية من تحت لفوق هيقلل من شعر الوجه بالتدريج, ومع الاستمرار الشعر مش هيطلع تاني.

روتين Ubtan للبشرة

سواء كنتي عروسة او لا, انتظمي على ماسك الاوبتان عشان تحافظي على بشرتك صحية ومتوهجة ونضرة, وتحميها من مشاكل الجلد.

3 طرق سهلة لعمل غسول للبشرة لعلاج حب الشباب