30 علامة على سوء المعاملة العاطفية من اللي حواليكي مينفعش تتجاهليهم
سوء المعاملة العاطفية من اللي حواليكي من اكتر الحاجات اللي ممكن تقلل من ثقتك واحترامك لنفسك, على الرغم انه مختلف تماما عن الاذيه البدنية ويعتبر اذيه من نوع مختلف الا انها بيأثر بشكل سلبي جدا على الشخص, والنهاردة هنعرف مع بعض علامات سوء المعاملة العاطفية من اللي حواليكي اللي المفروض متتجاهليهاش اطلاقا, وازاي تستعيدي ثقتك في نفسك.
غالبا كده لما هنقول سوء معاملة عاطفية ممكن اول حاجة هتيجي على بالكم ان سوء المعاملة جايه من الشريك في العلاقة العاطفية, لكن سوء المعاملة العاطفية دي ممكن تيجي من اي شخص سواء بنت او راجل, وبتبقى بين الاصدقاء والوالدين والاقارب والمعارف وحتى الاطفال.
ايه هو الاعتداء العاطفي او سوء المعاملة العاطفية؟ ده بيندرج تحته التهديد من شخص بشكل منتظم, الاهانة اللفظية, النقد المستمر بشكل سلبي, التخويف, فرض الرأي, التنمر, وغالبا المسيء او الشخص اللي بتصدر منه الاساءة بيكون متحكم في الضحية ومسيطر عليه, وفي كتير من الحالات بيكون اسباب الاذيه العاطفية هي ترسبات نفسيه عند الشخص المسيء من الطفولة وحاجات كان بيتعرض ليها وهو صغير اثرت عليه, الاشخاص اللي من النوعية دي ميعرفوش يبنوا علاقات صحية ايجابية, على العكس دايما بيكونوا حاسين بالخوف والاذيه والغضب والعجز وبيطلعوه على اللي حواليهم عشان يعوضوا النقص اللي عندهم.
وعادة بيكون عند الشخص اللي بيسيء للي حواليه معدلات عالية من اضطرابات الشخصية زي اضطراب الشخصية النرجسية, واضطرابات الشخصية الحادة, واضطرابات الشخصية العدوانية للمجتمع, والايذاء العاطفي ممكن انه ميتطورش للايذاء البدني, ولكن من ناحية تانية الايذاء البدني بيكون مصحوب دايما وبيسبقه الايذاء العاطفي.
ومعظم ضحايا الايذاء العاطفي او النفسي بيقدروا يكيفوا نفسهم مع المعاملة السيئة في بعض الاوقات, لكن مع ذلك الاذية العاطفية على المدى الطويل ممكن تأدي لصدمة عاطفية خطيرة زي القلق, الاكتئاب, واضطراب ما بعد الصدمة.
علامات سوء المعاملة العاطفية:
1- الشخص المسيء او المعتدي, هتلاقيه دايما بيحب اذلالك والسخرية منك قدام الناس.
2- بيتم تجاهل, او رفض افكارك او احتياجاتك او اقتراحاتك بشكل مستمر.
3- بيستخدموا دايما “السخرية” عشان يخلوكي تحسي بالضيق او تكرهي نفسك.
4- في العادة هتلاقي الشخص اللي بيسيء ليكي هيحاول يوصلك انه اهانته او سخريته ليكي دي حاجة عادية وانتي اللي حساسة زيادة عن اللزوم.
5- هتلاقي الشخص المسيء دايما بيعاملك زي الطفلة وبيحاول يتحكم فيكي.
6- دايما هتلاقيهم بيوجهوا لك نقد سلبي على اي حاجة بتعمليها ويلوموكي على اي تصرف.
7- غالبا هتحسي انك محتاجة تاخدي اذن من الشخص المسيء عشان تروحي اي مكان او تعملي اي حاجة او تاخدي اي قرار.
8- الشخص المسيء هيحاول يتحكم ويسيطر على فلوسك.
9- دايما هيسخروا منك ويقللوا من احلامك وطموحاتك وانجازاتك.
10- دايما هيخلوكي تحسي انك دايما غلط, وهما اللي على طول صح.
11- دايما هيعاملوكي بقلة احترام سواء باللفظ او بلغة جسدهم.
12- الاشخاص اللي بيسيئوا ليكي هتلاقيهم دايما بيركزوا على عيوبك وغلطاتك.
13- دايما هتلاقيهم بيرموا اللوم عليكي في اي موقف غلط.
14- لما حد يضحك عليهم او يسخر منهم مش بيسامحوا ومش بيتقبلوا ابدا ان حد يضحك عليهم او يضحكوا على نفسهم.
15- مش بيتحملوا اي نقص في الاحترام من اللي حواليهم.
16- الشخص المسيء غالبا بيعتذر بصعوبة جدا لحد, وبيحاولوا دايما يرموا اللوم على اللي حواليهم ويخلقوا اعذار لتصرفاتهم.
17- دايما هتلاقيهم بيتجاهلوا احتياجاتك, وبيتخطوا حدودك الشخصية.
18- هيلوموكي على تعاستهم وصعوبات حياتهم او مشاكلهم بشكل عام.
19- الشخص المسيء ممكن يديكي اسم غير اسمك او يسميكي بلقب مش حلو.
20- الاشخاص المسيئين دايما بيبقوا غير متاحين عاطفيا, يعني متقدريش تلجأي لهم في اي مشكلة ليكي.
21- هتلاقيهم غالبا بيحاولوا لفت الانتباه او اي حاجة هما عايزينها بالغضب او الانسحاب.
22- الاشخاص المسيئين مش بيظهروا اي تعاطف ناحيتك باي شكل.
23- بيتجنبوا تحمل المسئولية الشخصية, وبيلعبوا دايما دور الضحية ويرموا اللوم عليكي في اي موقف.
24- دايما الشخص المسيء هتلاقيه بيستخدم اسلوب الهجر او الاهمال لتخويفك او عقابك.
25- مش بيهتموا ولا حتى بيلاحظوا مشاعرك.
26- مش بيشوفوكي كفرد وليه شخصية مستقلة ولكن امتداد لنفسهم مش اكتر.
27- غالبا الشخص المسيء بيستخدم علاقتة بيكي كوسيلة ضغط للتحكم والسيطرة عليكي, يعني لو معملتيش كذا هسيبك او هبعد عنك.
28- غالبا هتلاقيهم بيقولوا معلومات شخصية عنك للي حواليهم.
29- لما هتيجي تواجهيهم بتصرفاتهم واساءتهم العاطفية ليكي هينكروها.
30- هيقولوا ملاحظات سلبية وتهديدات بطريقة غير مباشرة لتخويفك او السيطرة عليكي.
التعرف على علامات سوء المعاملة العاطفية تعتبر اول خطوة لاستعادة السيطرة على حياتك, وانهاء الاساءة العاطفية, وانك تبدأي تتخلصي منها.
لان الضغط الناتج عن سوء المعاملة العاطفية على المدى الطويل ممكن يأدي لصدمة عاطفية او مرض او قلق او اكتئاب, عشان كده متسمحيش ابدا انه يستمر, حتى لو ده معناه انك تحطي حد لعلاقتك مع الشخص ده سواء شريك حياتك او صديق او قريب, وممكن لو حالتك النفسية سيئة اوي تستشيري دكتور يساعدك انك تتخلصي من مخاوف والم انهاء علاقتك, واستعادة ثقتك في نفسك.
هل ممكن ان الشخص المسيء يتغير؟ ممكن يتغير في حالة انه اعترف بسلوكه وتصرفاته والاسباب اللي خلته يوصل للمرحلة دي, ولو عايز التغيير فعلا هيبقى ممكن انه يتغير, ومع ذلك معظم الاشخاص المسيئين مش بيحبوا يفقدوا القوة اللي بيحسوا بيها لما بيسيئوا لحد, وبالتالي نسبة الاشخاص المسيئين اللي عايزين فعلا يتغيروا بتبقى قليلة جدا.
ايه اللي محتاج يعمله الشخص المسيء عشان يتغير:
– الاعتراف الكامل بكل حاجة عملها.
– يعوض الشخص اللي اساء ليه عاطفيا.
– يوقف رمي اللوم والاعذار على تصرفاته.
– يوقف سلوك السيطرة والتحكم.
– تحمل المسئولية عن تصرفاته.
– لازم يحط في باله ان التغلب على اساءة المعاملة عملية طويلة وممكن تحتاج لوقت طويل اوي عشان الشخص يخرج منها, ومش بيقدر يتخلص منها في وقت قصير.
– الاعتراف بالمواقف اللي اتسببت انه يعامل اللي حوالية بطريقة سيئة.
– ميفكرش انه لازم في بعض الاوقات يتعامل بطريقة سيئة مع اللي حواليه, وان ده مش مقبول باي شكل.
– تطوير السلوكيات الجيدة في الشخصية زي الاحترام والدعم والاهتمام بمشاعر اللي حواليه.
– تغيير رد الفعل في المواقف الحادة او في المشاكل والجدل.
– تغيير ردود الفعل على غضب وطلبات الشريك.
– قبول نتايج وعواقب الافعال من غير رمي اللوم على الشريك او الطرف التاني من غير احساس الاسف على نفسهم.
مع ذلك لو الشخص المسيء مش عايز يتغير وانتي في نفس الوقت مش عايزة تنهي العلاقة, هنقولك شوية نصايح تساعدك على استعادة ثقتك بنفسك, والسيطرة على حياتك على المدى القصير:
حطي احتياجاتك اولا: اتوقفي عن محاولة حماية وارضاء الشريك باي شكل, اهتمي اولا بنفسك واحتياجاتك, حتى لما يحاول الشخص المسيء انه يسيطر عليكي وعلى حياتك تاني.
حطي حدود واضحة: قولي لشريكك او الشخص المسيء ليكي ايا كانت صلته قربه ليكي انه يبطل يقولك اسماء او القاب مش كويسة او انتي مبتحبيهاش, او انه يصرخ فيكي ويبقى وقح معاكي, لو الشخص المسيء بدأ بسلوكيات مش مقبولة, سيبي المكان او اطلعي من الاوضة, روحي عند صديقة ليكي, عشان توصلي له انك مش هتتساهلي او تتسامحي معاه بعد كده.
ما تبالغيش في التبرير لنفسك: ماتحاوليش تبالغي في انك تبرري تصرفاتك او تقعدي تعتذري وتقولي اعذار كمحاولة منك انك تهدي الشخص المسيء من ناحيتك, لما يحاول انه يكسب في جدال بالحجة او بالصوت العالي, خليكي هادية وانسحبي بعيد عنه.
افهمي انك مش هتقدري تصلحي الشخص المسيء: لو الشخص المسيء مبينش انه عايز فعلا يتغير من نفسه, فانتي بالتأكيد مش هتنجحي في تغييره مهما عملتي, وممكن ده كمان في النهاية يخليكي تحسي بشعور سيء ناحية نفسك انك مش قادرة تغيريه.
متلوميش نفسك: الاشخاص اللي اتعرضوا لاساءة عاطفية من اللي حواليهم ممكن ياخدوا وقت طويل على ما يستوعبوا انهم مش مسئولين عن تصرفات الشخص المسيء ليهم وان مش هما السبب, وبيفضلوا يفكروا انهم ممكن يكونوا عملوا حاجة غلط خلت شريكهم يعاملهم بالطريقة دي, لكن لازم تعرفي انها مش غلطتك ومتلوميش نفسك.
اطلبي الدعم: ممكن الكلام مع شخص مقرب ليكي يكون مفيد جدا بالنسبة لك ويساعدك, حاولي تقضي اكبر وقت ممكن مع الاشخاص اللي بيحبوكي وبيخلوكي سعيدة, واقل وقت ممكن مع الشخص المسيء.
حطي خطة خروج: ممكن اطفالك لو عندك او الموارد المالية بتاعتك تمنعك انك تبعدي عن شريكك المسيء ليكي في الوقت الحالي, لكن في نفس الوقت مينفعش تعيشي معاه للابد وهو بيسيء ليكي, عشان كده لازم تحطي خطة خروج لنفسك, ابدأي انك تحوشي فلوس على قد ما تقدري, حطي خطط للطلاق لو عايزة تنفصلي عنه بشكل نهائي, دوري على مكان جديد تسكني فيه.
في النهاية الايذاء البدني ممكن يكون صعب ومؤلم, لكن الايذاء العاطفي ممكن يكون مضر اكتر لانه بيفسد وبيقلل ببطء شعورك بقيمتك وتقدير نفسك, وده ممكن يأدي لألم عاطفي وندبات نفسية مدى الحياة.
علامات تقولك انك في علاقة غير صحية وانك لازم تفكري فيها من جديد
