4 طرق لعمل الزبادي المثلجة بنكهات مختلفة بالخطوات والفيديو
اضافة شوية فواكه وكوكيز مكسر للزبادي ممكن تحول الزبادي وتغير طعمها تماما, والنهاردة جايبين لكل بنات حوا 4 طرق لعمل الزبادي المثلجة بنكهات مختلفة هتخلي طعمها مختلف تماما هتبقى كأنك بتاكلي ايس كريم ده غير انها هتزود القيمة الغذائية بتاعتها جدا.
طرق لعمل الزبادي المثلجة:
1- زبادي مثلجة بالاوريو الشوكولاتة:
الكمية دي تكفي 3 افراد
المكونات:
كوباية زبادي يوناني كبيرة او زبادي عادية.
4 كوبايات موز متقطع شرايح ومجمد.
6 معالق كبيرة عسل نحل.
2 معلقة كبيرة كاكاو.
2 معلقة صغيرة من مستخلص الفانيليا.
1 كوباية بسكويت اوريو مطحونة.
الطريقة:
في الخلاط اخلطي الزبادي, الموز, العسل, الكاكاو, الفانيليا, واضربيهم مع بعض كويس لحد ما يبقى الخليط عندك كريمي وسميك, انقلي الخليط في صينية كبيرة ورشي عليه كله من فوق البسكويت المهروس وغطيها, وحطيها في الفريزر لمدة ساعتين لحد ما يتجمد ويبقى زي الايس كريم.
2- زبادي مثلجة بالنعناع:
الكمية تكفي 4 افراد.
المكونات:
4 كوبايات زبادي كبيرة.
¼ كوباية عسل نحل.
2 معلقة صغيرة من مستخلص الفانيليا.
¼ معلقة صغيرة من مستخلص النعناع.
الطريقة:
في الخلاط اخلطي الزبادي, العسل, الفانيليا, ومستخلص النعناع, اضربيهم مع بعض كويس لحد ما يبقى عندك خليط ناعم, انقلي الخليط لصينية كبيرة وغطيها, وحطيها في الفريزر لمدة ساعتين لحد ما تتجمد.
3- زبادي مثلجة بتشيز كيك الفراولة:
الكمية تكفي 3 افراد.
المكونات:
1 كوباية زبادي كبيرة.
¾ كوباية جبنة كريمي.
4 كوبايات فراولة مجمدة.
6 معالق كبيرة عسل نحل.
2 معلقة صغيرة من مستخلص الفانيليا.
4 وحدات بسكويت سادة مطحون.
الطريقة:
في الخلاط اخلطي الزبادي, الجبنة الكريمي, الفراولة, العسل, والفانيليا, اضربيهم مع بعض كويس لحد ما الخليط يبقى كريمي وسميك, انقلي الخليط لصينية كبيرة ورشي عليه من فوق البسكويت المتكسر وغطي الصينية, وحطيها في الفريزر لمدة ساعتين لحد ما يتجمد.
4- زبادي مثلجة بالتوت الاحمر:
الكمية تكفي 3 افراد.
المكونات:
2 كوباية زبادي كبيرة.
3 كوبايات توت مجمد.
½ كوباية عسل نحل.
2 معلقة صغيرة من مستخلص الفانيليا.
2 معلقة كبيرة كاكاو.
الطريقة:
في الخلاط اخلطي الزبادي, التوت, العسل, الفانيليا, والكاكاو, اضربيهم مع بعض كويس لحد ما الخليط يبقى ناعم, انقلي الخليط في صينية كبيرة وغطيها, حطيها في الفريزر لمدة ساعتين لحد ما يتجمد.
الطرق بالفيديو:
طريقة عمل تشوكليت كيك البرطمان chocolate cake in a jar
