علامات تقولك انك في علاقة غير صحية وانك لازم تفكري فيها من جديد

بقلمآية حسان فيوجع قلب visibility1678

لو دورنا وبصينا حوالينا، عمرنا ما هنلاقي حد سعيد في حياته بشكل كامل وخصوصا في العلاقات اللي بترهقنا وبنبقى بنعافر وبنبذل مجهود كل يوم عشان تكمل وتستمر، لكن أحيانا كتير لو ماحسبناهاش صح هتبقى المعافرة دي في السكة الغلط، وعشان تعرفي الموضوع يستاهل تحاربي عشانه ولا لاء في المقال ده هنقولك على علامات لو لاحظتيها اعرفي انك خلاص مش لازم تكملي، اعرفي معانا ايه هي علامات تقولك انك في علاقة غير صحية وانك لازم تفكري فيها من جديد

علامات تقولك انك في علاقة غير صحية وانك لازم تفكري فيها من جديد

كل حاجة بتعمليها بحساب

لو شريكك او الشخص اللي انتي مرتبطه بيه حساس بزيادة للدرجة اللي بتخليكي مش على طبيعتك معاه وده بيخليكي دايما واخده حذرك وكل كلمة بتقوليها او تصرف بتعمليه بتفكري فيه الاول وبتعمليه بحساب يبقى اتاكدى انه ده شخص ضاغط على اعصابك جدا وان دي علاقة مش طبيعية، ومهم تفكري فيها. 

العلاقة بتستهلك وقتك ومشاعرك وفلوسك ونفسيتك 

العلاقات الصحية مش المفروض تبقى كل الشغل اللي فيها من طرف واحد، التعب والمجهود لازم يبقى بشكل متبادل بينكم انتوا الاتنين عشان تبقى الكفتين متعادلتين مش واحدة زايدة عن التانية، فلو لقيتي ان الاهتمام كله وكل محاولات انجاح العلاقة والمجهود من ناحيتك بس، او من ناحيتك بزيادة وان ده بيستنزف من وقتك ومشاعرك ونفسيتك وكمان فلوسك، تبقى دي علامة سيئة. 

مابيشجعكيش تتقدمي 

لو مابيشجعش طموحك ايا كان الطموح ده في هواية او شغل او استثمار وبيفضل يحبط فيكي ويتخانق معاكي على الشغل والوقت والخروجات وكل حاجة وحسيتي انه عائق في سبيل تحقيق ذاتك وطموحك بدل ما يكون دافع ليكي ومابيشجعكيش تتقدمي، يبقى ده كمان جرس انذار مهم. 

لما تبقي مش حاسه انك مستقلة 

طالما مابيشجعكيش و بيكسر من طموحك، مع الوقت وبالتبعية هتخسري استقلالك وتبقي تابعة ليه واعتمادك في الحياة بشكل كامل هيكون عليه، يعني لا هتلاقي مكان تروحيه ولا فلوس ليكي ولا اي شئ يخصك. ودي بتعتبر واحدة من أهم العلامات

علاقة غير صحية

 طيب لو لاقيتي العلامات دي موجودة تعملي ايه؟ 

لو لاقيتي العلامات دي موجودة يبقى لازم تفكري في علاقتك وتعيدي تقييمها من جديد، لكن مش من الضروري تهدي كل حاجة في ثانية من غير محاولات للتصليح من حال العلاقة دي، افتكري دايما الدافع اللي خليكي ترتبطي من الاساس وحاربي عشانه، وافتكري دايما انك قبل ما تاخدي اي قرار بانهاء العلاقة او الارتباط لازم تكوني عملتي كل اللي عليكي عشان ما يبقاش في جواكي ولا ذرة ندم. 

اتكلمي معاه عن اللي بيضايقك 

التواصل .. التواصل، أهم وأول علاج لأي مشكلة، اعرفي دايما انك لو مابتقوليش اللي مضايقك أول بأول ان هو مش هيعرفه لوحده، لازم تتكلمي معاه عن اللي مضايقك وتتناقشي فيه وتصرحي بمشاعرك أول بأول عشان تتجنبي التراكمات اللي بتسبب تقل في القلب وبلادة في المشاعر، لازم تتكملوا مع بعض عن اللي مضايقك .

اشتغلي على  تعزيز ثقتك بنفسك 

ادخلي في نشاطات وشغل يخليكي تحسي بنجاحك واستقلاليتك وبالتالي هيعزز ثقتك بنفسك وتخليكي تحسي انك ناجحة ومحبوبة وليكي هدف وأهمية في الحياة، لما احساسك ده  يتغير هتتغير معاها حاجات كتير هتخليكي تقدري تفكري وتاخدي قرار صحيح ومدروس. 

اتكلمي مع أهلك وأصحابك 

في مرحلة ما ممكن تضطري تنهي العلاقة دي، في الوقت ده لازم تتكملي مع أهلك وأصحابك والناس اللي حواليكي عشان يبقوا الحيطة اللي تتسندي عليها وماتقعيش، وعشان يقدموا لك الدعم النفسي اللي هتحتاجيه. 

حاولي تتكلموا مع بعض

حوشي فلوس 

حوشي فلوس واحتفظي لنفسك بذمة مالية منفصلة “حتى لو مبلغ بسيط” عشان تبقى دايما جاهزة لأي حاجة و لتنفيذ أي قرار. 

كل الحلول فشلت؟ جه وقت اك تسيبيه وتتخطيه  

لو جربتي كل الحلول المتاحة وبرضه العلاقة مش مكتوبلها تنجح والطرق بقت مسدودة، يبقى للأسف جه الوقت اللي تنهي فيه العلاقة دي وتبدأي تدوري على بداية جديدة وفريش، وعشان تبدأي من جديد لازم تقفلي كل الأبواب على القديم.. 

اقطعي اي صلة توصلك بيه 

اقطعي أي صلة تربطك بيه لفترة لا تقل عن 6 شهور ، التليفون والواتس آب وكل السوشيال ميديا، وماتتردديش على الأماكن اللي هو بيروحها ولا تحاولي تسألي عن أخباره، البعد وقطع الصلة هو أهم وأصعب خطوة لازم تخديها، لكنها هتهون عليكي كتير قدام. 

سيبيه

خدي وقتك في انك ترتاحي 

ماتستعجليش على اي ارتباط او علاقة جديدة مهما كانت الاغراءات قدامك ومهما عدا عليكي وقت، لازم تاخدي الوقت اللي تشفي فيه من القديم وترتاحي وتبقى نفسيتك مستعدة لارتباط جديد وتحديات جديدة.

استكشفي هوايات جديدة 

استغلي وقت الراحة في انك تكتشفي وتعرفي هوايات جديدة، تقضي فيها وقتك وتطلعي فيها طاقة وتطوري من نفسك ومن شخصيتك/ ومين عارف ممكن كمان تتحول لبيزنس يبقى هدف مهم ليكي.

move on

طوري من نفسك قبل ما تدخلي في علاقة جديدة 

العيب اكيد فينا زي ماهو من شريكك، شوفي غلطاتك كانت فين وحاولي تعرفيها عشان تتجنبيها بعد كده، مهم تطوري من نفسك قبل ما تدخلي اي علاقة جديدة. 

اعرفي معانا كمان 10 اسرار لعلاقة صحية مع شريكك