فوايد مفاجأة للبصل للبشرة والشعر والصحة

ريهام محمود
ريهام محمود
في
بشرة
2281

البصل من الحاجات اللي بنستخدمها تقريبا في كل اكلاتنا بشكل يومي, لكن اللي يمكن كتير ميعرفهوش ان البصل مش بس مجرد مكون بيدي طعم حلو للاكل لكن ليه استخدامات كتير للبشرة والشعر والصحة, والنهاردة من خلال المقال بتاعنا هنتعرف على فوايد البصل للبشرة والشعر والصحة.

سواء البصل الني او المطبوخ الاتنين مليانين بالفوايد, البصل يعتبر مصدر غني جدا بالفيتامينات C, B6, والفولات والحديد والبوتاسيوم والمنجنيز اللي بيوفر حماية من نزلات البرد والانفلونزا.

البصل غني كمان بالكبريت والالياف والكالسيوم وفيتامين A وفيتامين B المركب, الفلافونويد, والبوليفينول, ومع ده هو منخفض الدهون والكوليسترول والصوديوم, تقريبا البصلة الصغيرة بتحتوي على 28 سعر حراري بس و 7 جرام من الكربوهيدرات.

والبصل بكل انواعه سواء الاحمر او الابيض او البصل الاخضر او الكرات وغيرهم من الانواع بيحتوي على ثاني كبريتيد الاليوم والاليل وهما مركبين كيميائيان بيتحولوا بعد الاكل لعنصر الاليسين, وحسب الدراسات العنصر ده ليه خصائص لمكافحة السرطان ومرض السكر, وممكن كمان يساعد في التقليل من تصلب الاوعية الدموية وانخفاض مستويات ضغط الدم.

البصل بيحتوي كمان على عنصر الكيرسيتين, ومضادات الاكسدة التانية اللي بتحارب الالتهاب, والميزة في البصل انه لما بيطبخ مش بيقلل من قيمة الكيرسيتين الموجود فيه لكن ببساطة بينقل مضادات الاكسدة للاكلة.

ومش البصل كخضار مفيد لكن كمان زيت البصل ليه فوايد لانه بيحتوي على خصائص مطهرة ومضادة للجراثيم, البصل لما بيتخلط مع الثوم في الاكل بيكون ليه فوايد اكبر كمان, الاتنين مع بعض معروفين انهم مضادات فعالة للاكتئاب ومسكنات للألم ومضادات للتخثر والالتهاب.

وعلى الرغم من ان البصل مش بيأدي لفقدان الوزن بشكل مباشر, الا انك لو استبدلتي الاطعمة اللي سعراتها الحرارية عالية بالبصل, ممكن يساهم في تقليل الوزن.

فوايد البصل للبشرة:

1- لبشرة مشرقة ومتوهجة:

البصل غني بالفيتامينات A, C, E وكلها بتساهم في صحة الجلد, وبتحمي البشرة من الشيخوخة المبكرة, وبما ان البصل يعتبر مطهر طبيعي قوي فهو ممكن يساعد على حماية البشرة من البكتيريا اللي ممكن تسبب مشاكل الجلد.

ممكن تعملي ماسك البصل كل اللي هتحتاجيه معلقتين كبار من دقيق الحمص, 1 ½ معلقة كبيرة عصير بصل, ½ معلقة صغيرة لبن, وذرة بسيطة من جوزة الطيب المطحونة, اخلطي المكونات مع بعض كويس ولو لقتيه سميك ممكن تزودي شوية لبن لحد ما توصلي لقوام مناسب, ولو ريحة البصل نفاذة اوي بالنسبة لك ممكن تضيفي كام نقطة من زيت اللافندر للخليط, افردي الخليط على البشرة وسيبيه لمدة 20 تقريبا او لحد ما ينشف, وبعدين شيليه من على البشرة عن طريقة التدليك بخفه في حركات دائرية على البشرة باستخدام اللبن, الماسك ده مش بس بيخلي البشرة مشرقة لكن كمان بيساعد على تقشيرها.

2- محاربة اثار الشيخوخة:

الفيتامينات المضادة للاكسدة A, C, E الموجودة في البصل بتحارب الضرر الناتج عن التعرض للاشعة فوق البنفسجية الضارة, وبتمنع الجذور الحرة المسببة للشيخوخة المبكرة, والبصل يعتبر من اغنى مصادر مضادات الاكسدة اللي هتخلي بشرتك خالية من التجاعيد, من ناحية تانية الفيتامينات والكبريت في البصل بيحمي بشرتك وبيحافظ عليها ناعمة ونضرة.

تدليك بشرتك بعصير البصل هيساعد على زيادة الدورة الدموية وهيحسن المظهر العام لبشرتك, ويخلصك من التجاعيد وهيحافظ على شبابها.

3- علاج حب الشباب:

الخصائص المضادة للميكروبات, ومضادات الجراثيم, ومضادات الالتهابات في البصل تعتبر مطهر طبيعي قوي للبشرة هيحمي بشرتك من البكتيريا المسببة لحب الشباب والبثور وغيرها من الامراض الجلدية.

ممكن تخلطي 1 معلقة كبيرة من عصير البصل مع 1 معلقة كبيرة زيت زيتون, ادهني بشرتك بالخليط وسيبيه لمدة 20 دقيقة وبعدين اغسليه بالمية, وبغض النظر عن استخدامه كماسك اكل البصل نفسه هيديكي نتايج فعالة جدا في علاج حب الشباب, كمان دهن عصير البصل على البشرة مفيد جدا في علاج ندبات حب الشباب.

4- علاج البقع الغامقة وتصبغات الجلد:

عصير البصل ممتاز جدا لعلاج البقع الغامقة وتصبغ البشرة من خلال المغذيات النباتية ومضادات الاكسدة اللي موجودة في البصل واللي بتساعد على ازالة الشوائب وتنقية البشرة.

ممكن تعملي ماسك البصل عن طريق خلط كميات متساوية من عصير البصل واللبن وتقدري تضيفي كام نقطة من اي نوع زيت اساسي عشان الريحة, دلكي بشرتك بالخليط في حركات دائرية لمدة من 10 – 15 دقيقة, كرري الوصفة دي يوميا عشان توصلي لافضل النتايج.

5- علاج اللدغات واللسعات:

ممكن تستخدمي البصل لتهدئة لسعات ولدغات الحشرات, كل اللي هتعمليه حطي شريحة من البصل على مكان اللسعة او القرصة, الخصائص المضادة للالتهابات في البصل هتقل من الحروق والحكة والتورم الناتج من لسعات الحشرات والبق.

6- التخلص من الشامات:

تقدري تستخدمي عصير البصل للتخلص من الشامات, لان حموضة عصير البصل والمواد الكيميائية الموجودة فيه هتساعد على ازالة الشامات, كل اللي هتعمليه ادهني مكان الشامة بعصير البصل وسيبيه لحد ما البشرة تمتص عصير البصل كويس, هيخلصك من الشامة في خلال شهور.

فوايد البصل 1
فوايد البصل 1

فوايد البصل للشعر:

1- زيادة نمو الشعر:

السبب الاول في ان عصير البصل مفيد في نمو الشعر هو انه بيحتوي على الكبريت واللي موجود كمان في الاحماض الامينية والكيراتين “وهو بروتين مهم”, كمان الكبريت ضروري لتقوية الشعر, دهن عصير البصل على فروة الراس هيخلي شعرك اكتر كثافة وقوي, والكبريت كمان بيحفز على انتاج الكولاجين واللي بيساعد في انتاج خلايا الجلد الصحية ونمو الشعر.

تطبيق عصير البصل على فروة الراس والشعر ممكن انه يأدي لزيادة تدفق الدم لبصيلات الشعر, وده هيساعد على زيادة نمو الشعر وزيادة كثافته.

دلكي عصير البصل على الشعر وفروة الراس وسيبيه لمدة 15 دقيقة وبعدين اغسليه بالطريقة العادية بالشامبو والبلسم.

2- علاج قشرة الشعر:

عصير البصل يعتبر معالج لقشرة الشعر, لانه بيساعد على قتل البكتيريا المسببة لقشرة الشعر.

كل اللي هتحتاجيه لماسك البصل للشعر, 3 معالق كبيرة من بذور الحلبة انقعيهم في شوية مية طول الليل, وتاني يوم اطحنيها على شكل معجون وضيفي لها 2 معلقة كبيرة عصير بصل, اخلطيهم كويس مع بعض, حطي الخليط على فروة راسك وسيبيه لمدة 30 دقيقة وبعدين اغسليه بمية فاترة.

بالاضافة كمان لعلاج القشرة, البصل ممكن يساعد في علاج التهابات فروة الراس, وتحسين صحة فروة الراس, وترطيب الشعر.

هاتي ½ بصلة اطحنيها ناعم واخلطي معاها مية لحد ما تتكون عندك عجينة, حطيها على فروة الراس وسيبيها لمدة 20 دقيقة وبعدين اغسليها بالمية.

وممكن كمان تستخدمي الثوم بدل البصل, اخلطي عصير الثوم مع زيت جوز الهند, وطبقي الخليط على شعرك ودلكيه كويس, وسيبيه على الشعر لمدة 20 دقيقة وبعدين اغسليه بالشامبو بالطريقة العادية.

3- التخلص من الشعر الابيض:

رغم ان مافيش بحوث ولا دراسات على الموضوع ده لكن اللي استخدموه اكدوا فعاليته في علاج الشعر الابيض, حطي 5 بصلات في لتر مية واغليها لمدة 10 دقايق, سيبيه لما يبرد وبعدين صفيه, وحطي المية بتاعته على فروة الراس مع الشامبو, اولا هيدي لمعان لمعان للشعر وشعرك هيتحسن خلال شهرين, والشعر الابيض هيبدأ يختفي بالتدريج مع الاستخدام المستمر.

4- الحفاظ على لون الشعر:

تقدري تستخدمي عصير البصل على الشعر لو عايزة تعمليه بلون نحاسي وتدي لمعة للشعر, ولو عايزة تحافظي على لون شعرك الطبيعي, اخلطي البصل مع كمية كافية من زيت المسطردة وحطي الخليط على شعرك, سيبيه 20 دقيقة وبعدين اغسليه بالشامبو.

5- التخلص من حشرات الشعر:

الكبريت الموجود في البصل بيساعد على التخلص من حشرات الشعر, اطحني من 4 – 5 بصلات اعملي منهم عجينة, وبعدين اضغطي عليه بالمعلقة لحد ما تستخرجي العصير بتاعة, دلكي الشعر بعصير البصل, وغطيه بكيس بلاستيك, وسيبيه لمدة ساعتين تقريبا, وبعدين اغسلي الشعر بالشامبو والمية الفاترة ونشفي الشعر, وهاتي مشط سنانه ضيقة سرحي بيه الشعر عشان تتخلصي من الحشرات اللي في الشعر.

كرري العلاج ده لمدة 3 ايام ورا بعض, بعدها تقدري تكرريه مرة واحدة في الاسبوع لمدة شهرين.

فوايد البصل 2
فوايد البصل 2

فوايد البصل الصحية:

1- محاربة السرطان:

حسب الدراسات ان البصل الاحمر هو الاكثر فاعلية في تدمير خلايا سرطان الثدي والقولون, والبصل بيحتوي على مستويات عالية من الكيرسيتين والانثوسيانين وهما مركبين بيساهموا في خاصية تدمير الخلايا السرطانية, وبيخلي الخلايا السرطانية تقتل نفسها وبيمنع نموها, واثبتت الدراسات ان الاشخاص اللي بياكلوا كمية اكبر من البصل عندهم معدلات اقل من الاصابة بالسرطان, عشان كده بننصحك انك تدخليه في نظامك الغذائي بشكل يومي في اكلاتك.

2- تحسين صحة القلب:

الفلافونويدات اللي موجودة في البصل الاحمر بتساهم في تحسين صحة القلب, البصل كمان غني بالكبريتات العضوية اللي بتساعد في الوقاية من امراض القلب والاوعية الدموية, وبيحتوي كمان على الثيوسلفاتينات تعتبر مخفف طبيعي للدم وبتقلل من خطر الاصابة بالنوبات القلبية والسكتة الدماغية.

كمان عنصر الكيرسيتين الموجود في البصل بيوفر خصائص مضادة للاكسدة ومضاداة للالتهاب بتحسن صحة القلب.

البصل كمان ليه قدرة على تحسين مستويات الكوليسترول في الدم, وده في النهاية بيفيد القلب, مركبات الفلافونويدات الموجودة في البصل بتساعد على خفض مستويات الكوليسترول السيء عند الاشخاص اللي بيعانوا من السمنة المفرطة.

البصل كمان بيمنع الصفائح الدموية انها تلتصق في بعض اللي ممكن يأدي لتجلط الدم وفي النهاية لنوبات قلبية, كمان بيمنع ارتفاع ضغط الدم, وبالتالي تجنب خطر الاصابة بأمراض القلب, وتصلب الشرايين.

3- خفض السكر في الدم:

اثبتت الدراسات ان البصل ممكن يساعد على خفض مستويات السكر في الدم بسبب احتواء البصل على عنصر البوليفينول اللي بيلعب دور مهم في السيطرة على نسبة السكر في الدم.

4- تحسين الهضم:

الالياف الموجودة في البصل المتمثلة في الانسولين بتساعد على تحسين الهضم, وتعتبر مصدر غذائي للبكتيريا المفيدة في الامعاء, وبيساعد الجسم على الحفاظ على مستويات متوازنة من البكتيريا الصحية.

والدراسات اثبتت ان البصل بيحتوي كمان على الياف تانية قابلة للذوبان بتساعد على منع وعلاج انواع مختلفة من الاسهال, والعناصر الكيميائية النباتية الموجودة في البصل ممكن انها تساعد على تقليل خطر الاصابة بقرحة المعدة.

كمان البريبايوتك الموجود في البصل بيساعد على تخفيف الامساك, ويقال كمان انها بتساعد في علاج الآم المعدة والديدان في المعدة.

لكن البصل احيانا بيسبب الصداع النصفي وانتفاخ البطن عند بعض الاشخاص, لو ده حصل الافضل استشارة دكتور.

5- الحفاظ على صحة العضم:

الابحاث اظهرت ان البصل ممكن يمنع هشاشة العظام المرتبطة بالعمر, لان في مركب موجود في البصل الابيض بشكل خاص ممكن انه يقلل هشاشة العظام, واثبتت الدراسات ان النساء اللي بياكلوا البصل كتلة عضمهم اكتر ب 5% من النساء اللي مش بياكلوا البصل, وان استهلاك البصل ليه تأثير مفيد على كثافة العضم عند النساء اللي فوق 50 سنة.

وعنصر الكيرسيتين الموجود في البصل ممكن يساعد على تقليل نشاط اللوكوترين والبروستاجلاندين والهيستامين اللي ممكن تسبب التهاب المفاصل والتهاب المفاصل الروماتويدي, عشان كده اكل البصل من الحاجات اللي ممكن تساعد على علاج آلام المفاصل.

فوايد البصل 3
فوايد البصل 3

6- منع الالتهابات والحساسية:

زي ما قولنا ان البصل بيحتوي على الكيرسيتين اللي بيساعد على منع الالتهابات وبيعالج الحساسية عن طريقة منع الخلايا من انتاج الهستامين, وبيساعد كمان في التقليل من احتقان الانف والبرد والانفلونزا.

البصل بيحتوي كمان على خصائص مضادة للجراثيم بتمنع البكتيريا المسؤولة عن الحساسية وتسوس الاسنان, وبيحتوي كمان على مضادات حيوية بتساعد على التئام الجروح.

7- تحسين الجهاز المناعي:

البصل بيحتوي على السيلينيوم اللي بيحفز وظيفة المناعة, وفي طريقة لاستخدام البصل اثبتت فعاليتها في العلاج, وهي بوضع نص بصلة في قدم الرجل من تحت ولبس شراب عليها والنوم بيها, الطريقة دي بتساعد على القضاء على العدوى وبترطب الجسم, وبتقوي جهاز المناعة, وممكن يكون السبب في ده ان القدم بتحتوي على النهايات العصبية لكل اعضاء الجسم, ووضع البصل اسفل القدم بينقل خصائصه المفيدة للاعضاء الداخلية.

ممكن كمان تحضري شاي البصل بغلي البصل وشرب المية بتاعته كعلاج فعال لنزلات البرد, ومنع الامراض, وممكن كمان تضيفي له اضافات تانية زي الجنزبيل للنكهة.

كمان خليط البصل والعسل من الخلطات اللي اثبتت فوايدها, قطعي البصل وحطيه في حله وضيفي له ½ كوباية عسل ابيض, وسخنيهم مع بعض على النار لحد ما البصل يبقى لونه شفاف ويطرى, خدي معلقة كبيرة من الخليط ده كل 3 – 4 ساعات, للوقاية, ولو بتعاني من الانفلونزا ممكن تاخدي منه معلقة او اتنين.

الخصائص المضادة للالتهابات الموجودة في البصل بتساعد في تحسين الربو.

8- علاج اضطرابات الاذن:

استخدام البصل لعلاج اضطرابات الاذن من العلاجات القديمة جدا, وبيتم تحضيره بتسخين البصل في الفرن لمدة 15 دقيقة لحد يطرى, وبمجرد ما يبرد اضغطي عليه طلعي منه العصير بتاعه, وحطي منه كام نقطة باستخدام قطارة في الاذن المصابة.

9- تحسين التنفس:

اثبتت الدراسات ان الاشخاص اللي بيعانوا من مشاكل في الجهاز التنفسي زي الربو والتهاب الانف التحسسي ممكن يستفادوا من البصل في علاج المشاكل دي, لان الخصائص المضادة للالتهاب الموجودة في البصل ممكن تساعد على تهدئة امراض الجهاز التنفسي, فلو بتعاني من مرض تنفسي بكل بساطة دخلي البصل في نظامك الغذائي “جنب الادوية” زي السلطة واي اكلات تانية.

10- تحسين النوم:

البصل بيحتوي على البريبايوتك اللي حسب الدراسات ممكن يساعد على تحسين النوم وتقليل التوتر, وبتأثر على وظائف المخ وبتحفز النوم.

11- تحسين صحة العين:

الكبريت الموجود في البصل بيساعد على تحسين صحة عدسة العين, وبيحفز انتاج بروتين اسمه “الجلوتاثيون” اللي يعتبر مضاد للاكسدة, وارتفاع مستوى الجلوتاثيون معناه انخفاض خطر الجلوكوما, الضمور البقعي, وعتمة عدسة العين.

والسيلينيوم الموجود في البصل بيدعم فيتامين E في العين اللي بيساعد على حماية خلايا العين.

البصل ممكن يساعد على علاج التهابات العين الشائعة زي التهاب الملتحمة والتهاب الجفن, واستخدام عصير البصل كقطرة للعين يعتبر علاج مفيد.

فوايد البصل 4
فوايد البصل 4

12- لصحة الفم:

البصل بيحتوي على الثيوسلفنات “مركبات الكبريت” اللي بتساعد على تقليل البكتيريا المسببة لتسوس الاسنان, واكل البصل بشكل ني هيكون افيد لصحة الاسنان.

كمان البصل زي ما قولنا غني بفيتامين C اللي بيحافظ على صحة الاسنان, وبيقال كمان ان البصل ممكن يساعد على تخفيف الم الاسنان.

ولكن الجانب السلبي الوحيد في البصل انه بيعمل ريحة كريهة للفم, عشان كده بننصحك بغسل الفم والاسنان كويس بعد اكل البصل, وممكن تاكلي بعده كام عود من البقدونس بيساعد على ازالة الريحة.

13- علاج الكوليرا:

اثبتت الدراسات ان البصل ليه تأثير فعال لمنع الميكروب المسؤول عن الكوليرا.

14- منع جلطات الدم:

البصل بيحتوي على مركب اسمه “روتين” اللي ممكن يساعد على منع تجلط الدم, وفي كتير من الدراسات اثبتوا ان مركب الروتين هو من المركبات الاكثر فاعلية المضادة للتخثر او التجلط.

15- بيزود الجسم بالطاقة:

الالياف الموجودة في البصل بتساعد على ابطاء عملية الهضم, وبتحافظ على استقرار مستويات الطاقة, والانسولين الموجود في البصل بيساعد في الحفاظ على مستويات قدرة التحمل.

فوايد البصل 5
فوايد البصل 5

16- تحسين الصحة الجنسية:

البصل هو واحد من الادوية العشبية المستخدمة في علاج العجز والضعف الجنسي, ومعروف ان شرب عصير البصل مع العسل الابيض بيزود الخصوبة عند الرجال.

17- تحسين صحة المخ:

الابحاث اثبتت ان مضادات الاكسدة الموجودة في البصل مرتبطة بالسموم الضارة في المخ وبتطردها من الجسم, ومركبات الكبريت في البصل ممكن تساعد على ابطاء فقدان الذاكرة المرتبط بالعمر, والافضل اكله ني مش مطبوخ عشان تستفيدي بكل العناصر اللي فيه, لان طبخه ممكن يخليه يفقد بعض الخصائص اللي بتساعد على تحسين الذاكرة.

18- علاج الحمى:

دخلي البصل في نظامك الغذائي هيساعدك على علاج الحمى, وكمان بيساعد على منع نزيف الانف وعلاجه.

19- تخفيف اعراض انقطاع الدورة الشهرية:

البصل مفيد في فترة انقطاع الدورة الشهرية لانه بيدعم الكبد, والبصل لانه غني بالكالسيوم هيكون مفيد جدا لان الجسم بيكون محتاج لكمية كافية من الكالسيوم في الفترة دي بشكل خاص.

فوايد البصل 6
فوايد البصل 6

استخدمي ورق الجوافة للتخلص من التجاعيد وحب الشباب والبقع الغامقة وحساسية الجلد

وصفات بورق الجوافة للبشرة
وصفات بورق الجوافة للبشرة

مقالات متعلقه

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا

7 ماسكات بالورد لبشرة نضرة وصحية

7 ماسكات بالورد لبشرة نضرة وصحية