نصايح للعناية ببشرتك خلال شهر رمضان عشان تحافظي عليها صحية

ريهام محمود
ريهام محمود
في
بشرة
1821

البشرة خلال شهر رمضان ممكن تتعرض للجفاف ويبقى شكلها باهت وشاحب ومش صحي, بسبب حرارة الجو والصيام ولان الجسم بيفقد فيتامينات ومعادن مهمة خلال فترة الصيام وده بينعكس بشكل سلبي على البشرة, لكن احنا بنقولك متقلقيش انتي تقدري تحافظي على بشرتك صحية من خلال نصايح العناية بالبشرة في رمضان وماسكات طبيعية هنعرفها مع بعض من خلال السطور الجاية.

نصايح العناية بالبشرة في رمضان:

1- اشربي مية كتير:

المية ثم المية ثم المية, هتحتاجي تشربي اكبر قدر ممكن من المية من بعد الفطار لحد وقت السحور, ومن الناحية المثالية المفروض الكمية متقلش عن 2 لتر في اليوم, عشان تتجنبي جفاف الجلد وخصوصا في فصل الصيف, والجفاف ممكن يخلي بشرتك شكلها مجهد وباهت, اتأكدي من شرب عصاير الفاكهة الطبيعية, وانواع مختلفة من شاي الاعشاب, عشان تحافظي على رطوبة الجلد.

العناية بالبشرة في رمضان 1
العناية بالبشرة في رمضان 1

2- رطبي بشرتك مرتين في اليوم:

من المهم جدا انك تهتمي بترطيب بشرتك بشكل زيادة خلال شهر رمضان, اتأكدي انك بتستخدمي كريم مرطب مناسب للوش ولوشن للجسم بعد الشاور وقبل النوم, ولو خارجة الصبح حاولي دايما تبقي في الضل ومتنسيش الصن بلوك عشان تحمي بشرتك من الاشعة فوق البنفسجية الضارة, واحتفظي في شنطتك بميست للبشرة عشان تنعشي بشرتك من وقت للتاني طول ما انتي بره, وخبراء العناية بالبشرة بينصحوا باستخدام مية الورد كميست طبيعي للبشرة تعتبر اختيار ممتاز جدا هتساعدك على تهدئة بشرتك وهتوفرلها الترطيب اللازم طول اليوم.

العناية بالبشرة في رمضان 2
العناية بالبشرة في رمضان 2

3- اتجنبي المكياج التقيل:

في بنات مش بيستغنوا عن المكياج في رمضان وبيحطوا تقريبا كل حاجة ماعدا الروج, عشان كده بننصحك لو انتي بتحطي مكياج خلال فترة النهار في رمضان اتجنبي المكياج الكتير وانك تحطي طبقات كتير من الفونديشن او الكونسيلر على البشرة لانه مع الحرارة والجفاف المكياج التقيل ممكن يسبب تلف البشرة, وبدل ده اختاري المنتجات الخفيفة اللي بتنور البشرة وبترطبها في نفس الوقت زي ال BB كريم, وزبدة الكاكاو مع عامل حماية من الشمس SPF.

العناية بالبشرة في رمضان 3
العناية بالبشرة في رمضان 3

4- كلي اكل صحي:

لازم تتأكدي انك بتاخدي العناصر الغذائية المناسبة في الفطار والسحور, لان ده بينعكس على بشرتك, واتأكدي ان نظامك الغذائي فيه كل العناصر والفيتامينات اللي محتاجها جسمك والعناصر الضرورية لاصلاح وتجديد البشرة وكمان الشعر والضوافر, وكل ما اهتميتي بنظامك الغذائي خلال شهر رمضان بشرتك هتبقى صحية اكتر.

العناصر الغذائية الاساسية اللي هتساعدك على الحفاظ على بشرة صحية:

فيتامين A: يعتبر واحد من اهم الفيتامينات لصحة الجلد, لانه بيساعد على منع جفاف الجلد وبيخلي البشرة ملمسها ناعم, ومن اكتر الخضروات الغنية بفيتامين A هو الجزر وبيتوفر كمان في المشمش والسبانخ والخضروات الورقية الخضرا, عشان كده بننصحك انك تدخلي عصير الجزر الطازة في قايمة العصاير بتاعتك على الاقل مرة واحدة في الاسبوع, واضافته للسلطة على الفطار بالاضافة للاطعمة التانية زي السبانخ والملوخية طبق رئيسي.

فيتامينات B: نقص الفيتامين ده ممكن يأدي لجفاف الجلد, وظهور التجاعيد المبكرة والشيخوخة المبكرة, ومن المصادر المهمة الغنية بفيتامين B هي اللحوم والبقوليات والحبوب الكاملة, عشان كده بننصحك انك تدخلي اللحمة والفراخ والسمك في وجبتك الرئيسية لانهم يعتبروا من اغنى المصادر بالفيتامين, واستفيدي من الحبوب الكاملة عن طريق استبدال الخبز الابيض بخبز القمح الكامل, ومتنسيش تضيفي شوربة العدس والفاصوليا لقايمة اكلك في الفطار.

فيتامين E: يعتبر كمان من الفيتامينات الاساسية, اللي بتساعد على تقليل التجاعيد وبيعزز تجديد الخلايا, وهنلاقي فيتامين E في المكسرات والزيوت النباتية اللي بنستخدمها في الطبخ.

فيتامين C: الفيتامين ده بيلعب دور مهم جدا في الحفاظ على صحة وتوهج ونضارة البشرة, ومن العصاير الغنية بفيتامين C اللي بننصحك تدخليها في نظامك الغذائي في رمضان عصير البرتقان والفراولة وعصير البطيخ.

مضادات الاكسدة: بالاضافة لمضادات الاكسدة اللي قولناها من فوق في فيتامين A, C, E, كمان السيلينيوم والزنك يعتبروا من مضادات الاكسدة اللي بتلعب دور مهم في حماية خلايا الجلد والحفاظ على صحة الجلد, والسيلينيوم والزنك موجودين بشكل رئيسي في اللحوم والمأكولات البحرية, عشان كده بننصحك تزودي من السي فود في وجبة الفطار.

الاحماض الدهنية الاوميجا3: الاحماض دي بتلعب دور رئيسي في الحفاظ على صحة ونضارة البشرة, والاحماض دي تعتبر الاحماض الدهنية الاساسية ولان الجسم مش بيقدر يصنعها بنفسه فهيكون ضروري انك تحصلي عليها من الاكل وخصوصا الاسماك, عشان كده بننصحك طبق السمك يكون اساسي في وجبة الفطار مرتين في الاسبوع, لكن الافضل شوي السمك بدل قليه.

في النهاية متنسيش انك تدخلي في نظامك الغذائي بشكل يومي الفواكة والخضروات الطازة بجميع انواعها لانها غنية بالفيتامينات والمعادن الضرورية لصحة بشرتك ورطوبتها.

العناية بالبشرة في رمضان 4
العناية بالبشرة في رمضان 4

ماسكات للعناية بالبشرة والحفاظ على نضارتها خلال شهر رمضان:

– ماسك البقدونس والروزماري “اكليل الجبل”:

اخلطي 100 جرام من اوراق البقدونس مع 100 جرام روزماري وانقعيهم في شوية مية مغلية لمدة ربع ساعة لحد ما لونها يبقى مايل للاخضر, سيبيها تبرد وصفيها, ادهني الخليط على بشرتك وخصوصا منطقة الخدين بشكل يومي, مع الانتظام هتلاحظي الفرق بنفسك.

– ماسك الزبادي والخيار:

اخلطي حبة خيار متقطعة مع معلقة كبيرة نشا وعلبة زبادي واضربيهم مع بعض في الخلاط, حطي الخليط على بشرتك وسيبيه لمدة ½ ساعة وبعدين اغسلي بشرتك, كرري الوصفة بشكل يومي لبشرة مشرقة ونضرة.

– ماسك الموز والزبادي:

اخلطي ثمرة موز مهروسة مع 2 معلقة كبيرة زبادي وربع معلقة خميرة, افردي الخليط على البشرة وسيبيه لمدة ½ ساعة وبعدين اغسليه بمية باردة, ويفضل استخدام الماسك ده خلال فترة النهار اثناء الصيام.

– ماسك اللوز:

انقعي كام حبة لوز في شوية لبن لمدة كام ساعة, وبعدين اطحنيهم كويس لحد ما يبقى عندهم خليط ناعم, حطيه على البشرة لمدة ½ ساعة وبعدين اغسليه بمية باردة, كرري الماسك بشكل يومي للبشرة الجافة وللبشرة الدهنية مرتين بس في الاسبوع, هيساعد على نضارة وتفتيح البشرة وتنعيمها.

– ماسك الخيار والليمون:

اخلطي معلقة كبيرة من عصير الخيار, مع معلقة صغيرة عصير ليمون, معلقة صغيرة كركم, ومعلقة صغيرة جليسرين “لو بشرتك جافة”, ادهني الخليط على البشرة حتى منطقة تحت العين وسيبيه لمدة 15 دقيقة وبعدين اغسليه بمية باردة, كرري الماسك يوميا.

– ماسك العسل والليمون:

اخلطي 2 معلقة كبيرة عسل مع 2 معلقة صغيرة عصير ليمون, ادهني البشرة بالخليط وسيبيه لمدة ½ ساعة, وبعدين اغسليه هتلاحظي نضارة فورية للبشرة.

– ماسك الكركم واللبن:

اخلطي 3 معالق كبيرة لبن مع معلقة كبيرة عصير ليمون وشوية كركم صغيرين, افردي الخليط على البشرة وسيبيه لما ينشف وبعدين اغسليه بمية باردة, الماسك ده فعال جدا في تفتيح لون البشرة واستعادة نضارتها.

– ماسك الشوفان والطماطم:

اخلطي 2 معلقة كبيرة شوفان مطحون مع معلقة كبيرة عصير طماطم و 2 معلقة كبيرة زبادي, افردي الخليط على البشرة وسيبيه لمدة 20 دقيقة وبعدين اغسلي البشرة بالمية الباردة, الماسك بيساعد على تقشير الجلد الميت وازالة الاتربة المتراكمة على البشرة.

العناية بالبشرة في رمضان 5
العناية بالبشرة في رمضان 5

5 خلطات لعلاج تقشف الشفايف وللحفاظ علي نضارتها

خلطات لعلاج تقشف الشفاة
خلطات لعلاج تقشف الشفاة

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير