نصايح صحية المفروض تمشي عليها خلال شهر رمضان

ريهام محمود
ريهام محمود
في
صحة
1479

في ناس كتير شهر رمضان بالنسبة لهم يعني اكل, لكن المفروض خلال شهر رمضان ان نظامنا الغذائي ميختلفش عن الايام العادية ويكون بسيط بقدر الامكان, المفروض انك تحافظي على وزنك الطبيعي من غير ما تتخني او تخسي, ولو انتي عندك وزن زيادة شهر رمضان هيكون فرصة انك تخسي فيه, والنهاردة من خلال السطور الجاية هنقولكم نصايح صحية لرمضان, وايه المفروض تاكلوه وايه اللي تحاولوا تتجنبوه, ولو بتعاني من اي مشاكل خلال فترة الصيام تحليها ازاي.

نصايح صحية لرمضان:

خلال ساعات الصيام لانها بتكون طويلة المفروض انك تاكلي الاطعمة بطيئة الهضم بما فيهم الاطعمة اللي بتحتوي على الالياف بدل الاطعمة السريعة, لان الاطعمة سريعة الهضم بتحتاج حوالي 8 ساعات على ما تتهضم, في حين ان الاطعمة السريعة بتتهضم خلال 3 – 4 ساعات بس.

والاطعمة اللي هضمها بطيء هي الاطعمة اللي بتحتوي على البذور والحبوب زي الشعير والقمح والشوفان والفاصوليا والعدس, والدقيق الكامل, والارز البني, والسميد.

والاطعمة الغنية بالالياف اللي كمان بيتم هضمها ببطء هي الاطعمة اللي بتحتوي على الرده والقمح الكامل والحبوب والبذور والخضروات زي الفاصوليا والبسلة والسبانخ وغيرها من الخضروات الورقية, وجميع انواع الفاكهة تقريبا سواء الطازة او المجففة وخصوصا المشمش المجفف والتين والخوخ واللوز وغيرها.

اما الاطعمة سريعة الهضم او الاحتراق هي اللي بتحتوي على السكر والدقيق والابيض اللي بتتسمى “بالكربوهيدرات المكررة”.

المفروض ان الاطعمة اللي بتاكليها تكون متوازنة بشكل جيد, وتحتوي على الاطعمة من كل مجموعة غذائية زي الفواكة والخضروات واللحوم, الفراخ, السمك, الخبز, الحبوب, منتجات الالبان, وحاولي تتجنبي الاطعمة المقلية لانها غير صحية اوتاكلي منها بشكل محدود جدا, لانها بتسبب عسر هضم, وحرقة القلب والمعدة, ومشاكل في الوزن.

الاطعمة اللي المفروض تتجنبيها خلال شهر رمضان:

– الاطعمة المقلية والدسمة.

– الاطعمة اللي بتحتوي على نسبة عالية من السكر.

– الافراط في الاكل وخصوصا السحور.

– شرب الشاي على السحور, لان الشاي ممكن يبقى مدر للبول اللي هياخد معاه الاملاح المعدنية المفيدة اللي جسمك هيكون محتاجها خلال اليوم.

– التدخين.

نصايح صحية لرمضان 1
نصايح صحية لرمضان 1

الاطعمة اللي المفروض تاكليها خلال شهر رمضان:

– الكربوهيدرات المعقدة خلال السحور, لانها  مش بتتهضم وبسرعة وهتستمر فترة طويلة وهتخليكي تحسي بجوع اقل, وهتلاقي الكربوهيدرات المعقدة متوفرة في الخضار وخصوصا الخضروات الخضرا والنشوية, الحبوب الكاملة والاطعمة المصنعة منها زي الخبز الاسمر, الفول, الفاصوليا, العدس.

– التمر يعتبر مصدر ممتاز جدا للسكر والالياف والكربوهيدرات والبوتاسيوم والمغنسيوم.

– اللوز غني بالبروتين والالياف مع كمية قليلة من الدهون.

– الموز مصدر غني بالبوتاسيوم والمغنسيوم والكربوهيدرات.

– المشروبات خلال شهر رمضان:

– حاولي تشربي اكبر قدر ممكن من المية وعصاير الفواكة ما بين وقت الفطار لحد السحور عشان جسمك يقدر يظبط مستويات السوائل.

نصايح صحية لرمضان 2
نصايح صحية لرمضان 2

مشاكل ممكن تعاني منها خلال شهر رمضان وحلها:

الامساك:

الامساك من المشاكل اللي ممكن يأدي لمشاكل تانية زي عسر الهضم والانتفاخ وممكن توصل للبواسير.

اسبابه: الامساك ممكن يحصل بسبب تناول كمية من الاطعمة المكررة زي اللي بتحتوي على السكر والدقيق الابيض, وقلة شرب المية, وعدم اكل كمية كافية من الالياف في نظامك الغذائي.

العلاج: اتجنبي الاطعمة المكررة, اشربي كمية مية كفاية, كلي الخبز اللي معمول من الدقيق الكامل, والارز البني.

عسر الهضم والغازات:

اسبابه: الافراط في الاكل, كل كمية كبيرة من الاطعمة المقلية والدسمة, اكل الاطعمة الغنية بالتوابل, واكل الاطعمة اللي ممكن تسبب غازات زي البيض والكرنب والعدس والمشروبات الغازية.

العلاج: متاكليش كميات اكل كبيرة, اشربي عصاير فاكهة والافضل شرب مية كتير, اتجنبي الاطعمة المقلية.

انخفاض ضغط الدم:

العرق المفرط, الضعف, الارهاق, نقص الطاقة, الدوخة, وخصوصا اول ما تصحي من النوم, بهتان الوش والشعور بالاغماء دي كلها من الاعراض المرتبطة بـ “انخفاض ضغط الدم” وده غالبا بيحصل في فترة بعد الضهر بشكل خاص.

اسبابه: مش بتشربي سوائل كفاية, وم بتاكلي كمية كافية من الملح في الاكل.

العلاج: حافظي على هدوئك متحاوليش تضغطي على نفسك زيادة, زودي من شرب السوائل والملح.

تحذير: لازم تتأكدي انك بتعاني من انخفاض ضغط الدم عن طريق جهاز قياس الضغط اول ما تحسي بالاعراض, ولو بتعاني من ارتفاع ضغط الدم هتكوني محتاجة تغيري علاجك خلال شهر رمضان بعد استشارة الدكتور.

الصداع:

اسبابه: عادة بيحصل بسبب الجوع وخصوصا لو بتعاني من ضغط الدم المنخفض, ولو حد بيدخن بيحصل بسبب سحب التبغ من الجسم, بسبب الاجهاد الزيادة, قلة النوم, والصداع على اخر اليوم ممكن يزيد ويسبب حالة غثيان قبل الفطار.

العلاج: تخفيض استهلاك الكافيين والتبغ من قبل رمضان بالتدريج, اشربي شاي الاعشاب او الشاي الخالي من الكافيين, ضبطي جدولك ونظام يومك خلال شهر رمضان عشان تقدري تنامي كفاية.

انخفاض السكر في الدم:

الضعف, الدوار, التعب, ضعف التركيز, التعرق بسهولة, عدم الاتزان, عدم القدرة على اداء الانشطة البدنية, الصداع, الخفقان, دي كلها من اعراض انخفاض السكر في الدم.

اسبابه لغير المصابين بمرض السكر: اكل كمية كبيرة من السكر, اكل الكربوهيدرات المكررة خاصة في وجبة السحور, بتخلي الجسم ينتج كمية كبيرة من الانسولين وده بيأدي لانخفاض نسبة الجلوكوز في الدم.

العلاج: قللي من الاكلات والمشروبات اللي بتحتوي على السكر.

تحذير: اللي بيعانوا من مرض السكر هيكونوا محتاجين انهم يظبطوا الادوية بتاعتهم بعد استشارة الدكتور.

تشنجات العضلات:

اسبابه: عدم تناول كمية كافية من الاطعمة اللي بتحتوي على الكالسيوم والمغنسيوم والبوتاسيوم.

العلاج: زودي من اكل الاطعمة الغنية بالكالسيوم والمغنسيوم والبوتاسيوم زي الخضروات والفواكة ومنتجات الالبان واللحوم والتمر.

تحذير: لو بتاخدي اي ادوية لعلاج ارتفاع ضغط الدم, او ادوية لمشاكل الحصوات والكلى, لازم تستشيري دكتور.

حرقة القلب والمعدة, التهاب المفاصل:

الحاجات دي ممكن تحصل بسبب زيادة مستويات الحمض في المعدة الفاضية اثناء فترة الصيام, اللي بيأدي لحرقان في منطقة المعدة وتحت الضلوع وممكن يمتد لحد الحلق, والاطعمة الغنية بالتوابل والقهوة والمشروبات الغازية ممكن تزود من سوء الاعراض دي وتزود المشكلة.

لازم الاشخاص اللي بيعانوا من قرحة هضمية او مشاكل في المعدة, يستشيروا طبيب وياخدوا ادوية للتحكم في مستويات الحمض في المعدة.

حصوات الكلى:

حصوات الكلى ممكن يعاني منها الاشخاص اللي مش بيشربوا سوائل كفاية, عشان كده ضروري جدا شرب سوائل زيادة لمنع تكوين الحصوات.

آلام المفاصل:

اسبابه: ممكن بسبب المجهود الزيادة خلال شهر رمضان والصلوات الزيادة زي صلاة التراويح, ممكن يحصل ضغط زيادة على مفاصل الركبة وخصوصا عند كبار السن اللي بيعانوا من التهابات المفاصل يأدي للالم, والتصلب, والتورم وعدم الراحة.

العلاج: انقاص الوزن عشان الركبة مضطرتش تتحمل ضغط زيادة, ممارسة تمارين للساقين من قبل رمضان عشان تكوني مستعدة للضغط خلال شهر رمضان, ويخلي المفاصل فيها مرونة اكتر وتبقي مستعدة للمجهود او الضغط الزيادة وتقدري تصلي صلواتك كلها بسهولة.

نصايح صحية لرمضان 3
نصايح صحية لرمضان 3

ايه الاكلات الصحية والاكلات اللي المفروض تتجنبيها في شهر رمضان

الاكلات الصحية لرمضان
الاكلات الصحية لرمضان

مقالات متعلقه

افضل 8 اطعمة صحية للفطار والسحور في رمضان

افضل 8 اطعمة صحية للفطار والسحور في رمضان

نصايح لصيام صحي في رمضان

نصايح لصيام صحي في رمضان

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب