حاجات محتاجة انك تغيريها عدد مرات اكتر عشان تحافظي على صحتك

ريهام محمود

في

1500

في حاجات كتير اوي بنستخدمها بشكل يومي تقريبا وبنسيبها تقعد عندنا فترة طويلة من غير ما نفكر نغيرها, ومش بنحط في بالنا اننا المفروض نغيرها على الرغم انها ممكن تكون مش مستهلكة لكن كل حاجة ليها وقت بعدها لازم تتخلصي منها, والنهاردة هنقولكم قايمة حاجات المفروض تغيريها اكتر عشان تحافظي على صحتك.

حاجات المفروض تغيريها اكتر:

1- فرشة الاسنان:

فرشة الاسنان من الحاجات اللي ممكن تقعد فترة طويلة من غير ما تستهلك او يحصلها اي حاجة, لكن حتى لو سليمة والشعيرات بتاعتها زي ما هي, المفروض انك تغيريها كل 3 – 4 شهور حتى لو مظهرتش عليها علامات تآكل, لان بكده انتي هتحافظي على صحة اسنانك لما تغيري فرشة الاسنان بشكل منتظم.

2- المكياج:

اي مكياج بيكون ليه فترة صلاحية, يعني لو عندك روج مثلا او اي منتج مكياج لسه مخلصتهوش لكن فترة صلاحيته خلصت يبقى لازم يترمي ومتستخدميهوش بعد انتهاء فترة الصلاحية حتى لو شايفة انه ريحته وشكله زي ما هو, لان استمرار استخدامه بعد انتهاء صلاحيته ممكن يعرضك للخطر ويسبب التهابات وضرر في الجلد.

3- فرشة الشعر:

فرشة الشعر يمكن مش هتقدري تشوفي بالعين المجردة كمية الغبار والبكتيريا المتكونة عليها مع الوقت خصوصا لو الفرشة عندك بقالها فترة كبيرة, وتعتبر فرشة الشعر وفرشة السيشوار هما المعرضين اكتر للتلف, عشان كده بننصحك انك لو شوفتي الكرات الصغيرة اللي بتكون في نهاية شعيرات الفرشة بدأت تقع منها تعرفي ان ده الوقت اللي المفروض تغيري فيه فرشة الشعر بتاعتك.

4- فرش المكياج:

بصرف النظر ان كتير من البنات بيهملوا تنضيف فرش المكياج بما فيه الكفاية, الا ان كمان الاحتفاظ بفرش المكياج لفترات اطول من اللازم ممكن يضر بشرتك, فلو لاحظتي ان الفرشة شعيراتها بدأت تقع او حروفها بدأت تتاكل, يبقى جيه الوقت انك تتخلصي منها وترميها.

5- مكنة الحلاقة:

هل تعرفي ان مكنة الحلاقة القديمة او اللي الموس بتاعها بارد ممكن تسببلك ضرر اكتر من الجديدة؟ وممكن كمان تسببلك عدوى بسبب الغبار والبكتيريا المتراكمة عليها مع الوقت, عشان كده تعتبر الفترة المثالية لتغيير مكنة الحلاقة هي بعد كل 5 – 10 استخدامات, ولو ده ممكن يكون مكلف شوية بالنسبة لك ممكن تغيري الموس او الراس بتاعتها بس بعد كل 5 – 10 استخدامات بدل ما تغيري المكنة كلها.

6- المخدات:

المخدة ممكن تكون ارض خصبة لكتير من الجراثيم, لانه بيتجمع عليها العرق واللعاب والغبار, وعلى الرغم من غسيل المخدة يعتبر حل للمشكلة دي الا انها مش بتساعد على الحفاظ على شكل المخدة, وده مهم جدا لانه بيوفر الدعم لرقبتنا اثناء النوم, عشان كده هيكون مثالي جدا تغيير المخدة بعد 1 – 2 سنة من الاستخدام المتواصل.

7- اسفنجة المطبخ:

الدراسات اثبتت ان اسفنجة المطبخ لما بتقعد فترة طويلة بتبقى ارض خصبة للبكتيريا اللي ثبت انها مسؤولة عن التيفويد والكوليرا وحتى كمان التسمم الغذائي, عشان كده بننصحك انك اكتر مدة تستخدمي فيها نفس السفنجة هي اسبوع واحد بس من غير يوم واحد زيادة وبعدها اتخلصي منها.

8- لوح التقطيع:

لوح التقطيع سواء الخشب او البلاستيك ليه فترة صلاحية محددة, اول ما تلاحظي ان بدأ يظهر على السطح بتاعه تشققات بسبب الاستخدام المتكرر, يبقى جيه الوقت انك تغيريه, لان الشتققات دي ممكن يتكون فيها بكتيريا ممكن متقدريش تتخلصي منها بالغسيل, واللي ممكن تسبب امراض زي السالمونيلا, ومتحاوليش انك تستخدميها اي استخدام تاني, المفروض انك تتخلصي منها فورا للأبد.

بعد ما عرفتي قايمة الحاجات اللي المفروض تغيريها, بننصحك انك تخليها جزء من عملية التنضيف وروتينك بشكل موسمي او سنوي, وافتكري انك تكلفة تغيير الحاجات دي مهما كانت مش هتساوي حاجة قصاد صحتك.