8 منتجات تجميل وعناية بالبشرة بتستخدميهم بشكل غلط

بقلمريهام محمود فيبشرة visibility491

احيانا بنكون بنستخدم منتجات تجميل وعناية بالبشرة كتير عشان نحافظ عليها, ومع ذلك ممكن نلاقي بشرتنا مش بتتحسن او جافة ومافيهاش ترطيب, هل ده معناه انك تتخلصي من كل المنتجات اللي عندك؟ اكيد لا لكن كل اللي هتعمليه هو تغيير الطريقة اللي بتستخدمي بيها بعض المنتجات, والنهاردة من خلال السطور الجاية هنقولك على 8 منتجات تجميل بتستخدميهم غلط.

منتجات تجميل بتستخدميهم غلط:

1- بتستخدمي الويبس لازالة المكياج بشكل يومي:

اكيد استخدام الويبس هي اسهل واسرع طريقة لازالة المكياج, لكن مينفعش انك تستخدميها طول الوقت وبشكل يومي, اولا لانها مش بتنضف البشرة كويس, والاكتر من كده انها مصنوعة من مادة خشنة بتسبب تهيج وجفاف وتمدد الجلد, عشان كده بننصحك انك تستخدمي الويبس لازالة المكياج في حالة واحدة بس ان مافيش مية متوفرة او غسول, للعناية اليومية وتنضيف البشرة ضروري تستخدمي غسول  رغوي او جل.

منتجات تجميل بتستخدميهم غلط

2- بتستخدمي سيروم البشرة لوحده:

السيروم المفروض تستخدميه قبل الكريم المرطب مش لوحده, والافضل انك تستخدميه بالليل قبل النوم, خصوصا لو السيروم بيحتوي على مادة الريتينول, لان بالليل هتدي فرصة اكتر ان البشرة تمتص كل العناصر المغذية اللازمة, وكمان لو استخدمتي Sheet mask فوق السيروم هيخليه فعال اكتر, وفي فصل الصيف بننصحك تبعدي عن منتجات الريتينول الا مع الصن بلوك لان مادة الريتينول بتخلي البشرة حساسة جدا من اشعة الشمس واللي ممكن تسبب حروق الشمس للبشرة.

منتجات تجميل بتستخدميهم غلط

3- بتستخدمي بيوتي بلندر جافة في توزيع المنتجات:

البلندر او اي نوع اسفنج بيستخدم في توزيع المكياج على البشرة, لازم يكون رطب قبل الاستخدام, لانه لما بيكون جاف بيشرب كمية كبيرة من المنتج ومش بيوزعه على البشرة بالتساوي, ممكن ترطبيه بالمية او ترشي عليه مثبت مكياج.

منتجات تجميل بتستخدميهم غلط

4- مش عارفة الفرق بين الكونسيلر ومصحح البشرة:

ممكن يكون في كتير من البنات بيخلطوا بين منتجات التجميل, عشان كده هنوضح الفرق بين منتجين بنات كتير ممكن يكونوا بيخلطوا بينهم وهما الكونسيلر والمصحح, الكونسيلر هو بيستخدم بس لمنطقة تحت العين والمنطقة القريبة من العين, لكن المصحح بيستخدم لاخفاء عيوب البشرة سواء بقع او تصبغات, ولما تيجي تستخدمي الكونسيلر لازم بشرتك تكون مترطبة قبلها, والمصحح طبقيه على البشرة بطريقة التدليك, عشان يندمج على البشرة كويس ويبان طبيعي اكتر.

منتجات تجميل بتستخدميهم غلط

5- بتستخدمي غسول البشرة مرة واحدة بس في اليوم:

غسول البشرة مش بيستخدم لازالة المكياج بس, لكن عشان تستفيدي منه بشكل كامل يبقى لازم تستخدميه مرتين في اليوم مرة بالليل ومرة الصبح, بالطريقة دي هتقدري تتخلصي من الدهون الزيادة والاوساخ وخلايا الجلد الميت والعرق اللي موجودة على الجلد, والافضل انك تستغني عن طريقة الفرك واستخدام انواع الغسول اللي بتحتوي على احماض, لانها ممكن تكون قاسية على البشرة وخصوصا البشرة الحساسة.

منتجات تجميل بتستخدميهم غلط

6- بتسيبي ماسك البشرة مدة طويلة زيادة عن اللزوم:

متسيبيش ماسك البشرة فترة طويلة او من بالليل للصبح الا اذا كان هو ماسك ليلي مخصوص او مكتوب عليه انه ممكن يتساب طول الليل, لكن غير كده المفروض ان الماسك ميتسابش فترة طويلة على البشرة لان ده ممكن يأدي لمشاكل في الجلد, المفروض انك تشيلي الماسك قبل ما ينشف اوي, لانك لو سبتيه هيبدأ الماسك يمتص الرطوبة من الجلد وهيخلي بشرتك جافة اكتر, ونفس الكلام ينطبق على ماسك الطين, المفروض تحطي منه طبقة سميكة عشان الرطوبة تتبخر من البشرة بشكل ابطأ وتحافظي عليها بقدر الامكان, وتشيليه من على بشرتك وهو لسه رطب او لزج.

منتجات تجميل بتستخدميهم غلط

7- بتستخدمي منتجات بتحتوي على الكحول:

كل منتج من منتجات البشرة بيكون داخل فيه مكونات مختلفة حسب وظيفة كل منتج, ومستحضرات العناية اللي بتحتوي على الكحول لو انتي بتستخدميها كتير, هيبدأ الجلد انه ينتج دهون زيادة كرد فعل للمواد الكيميائية اللي موجودة في المنتج, وكمان متستخدميش المنتج على الوش كله بدل كده حطيه على مناطق محددة اللي فيها مشاكل بس او اللي محتاجة تستخدمي عليها المنتج.

منتجات تجميل بتستخدميهم غلط

8- مش بتغسلي مية ميسيلار من البشرة:

مية ميسيلار هي اللي بتستخدم في ازالة المكياج, وهي تعتبر مستحضر عادي للبشرة الفرق الوحيد بينها وبين اي مستحضر تاني انها مش بتحتوي على كحول, بتحتوي على مكونات تانية نشطة, ولو متغسلتش بالمية هتفضل كل الاوساخ والميكروبات متجمعة على الجلد, لو سبتي مية ميسيلار فترة طويلة على الجلد هيخلي المية تأثيرها زي الصابون على البشرة وممكن تسبب تهيج.

منتجات تجميل بتستخدميهم غلط

اعرفي ايه هي قواعد الاهتمام بالبشرة في فترة العشرينات

اعرفي ايه هي قواعد الاهتمام بالبشرة في فترة الشعرينات
اعرفي ايه هي قواعد الاهتمام بالبشرة في فترة الشعرينات