8 غلطات بتعمليهم مع الروج السائل محتاجة تتجنبيهم عشان يطلع شكله مثالي

ريهام محمود
ريهام محمود
في
مكياج
3842

الروج السائل يعتبر من الحاجات التريندي بقالها فترة ومعتقدتش كمان انه هيخرج من موضة المكياج قريب, وبنات كتير بقوا يفضلوه عن الروج العادي, لكن اكيد مش هننكر انه بيسبب جفاف للشفايف وبيتشقق في اوقات كتير, اكيد كتير من البنات واجهوا المشاكل دي مع الروج السائل, عشان كده النهاردة هنشارك بنات حوا اكتر غلطات الروج السائل اللي ممكن تكوني بتقعي فيها عشان تتجنبيها ويطلع الروج والشفايف بشكل مثالي.

غلطات الروج السائل:

1- مش بتقشري الشفايف:

التقشير قبل الروج يعتبر خطوة مهمة جدا عشان تخلي الشفايف ناعمة وتجهزيها للروج, وفايدته بتكون اكبر مع الروج السائل المات بشكل خاص, لان المات بيبين اي عيوب او جفاف على الشفايف اكتر من الروج اللامع او العادي, عشان كده بننصحك انك تقشري الشفايف لمدة دقيقة او دقيقتين قبل وضع الروج السائل عشان تتخلصي من خلايا الجلد الميتة من على سطح الشفايف.

غلطات الروج السائل 1
غلطات الروج السائل 1

2- مش بترطبي الشفايف:

بالظبط زي ما بتستخدمي المرطب بعد تقشير البشرة, طبقي نفس الخطوة بعد تقشير الشفايف, بعد التقشير حطي زبدة كاكاو بمجرد ما تغسلي المقشر من على شفايفك.

غلطات الروج السائل 2
غلطات الروج السائل 2

3- بتحطي طبقات كتير:

الروج السائل مش هتكوني محتاجة معاه غير تطبيق طبقة واحدة بس على الشفايف, لان معظم انواع الروج السائل بيكون تقيل بشكل كبير جدا, عشان كده طبقة واحدة هتكون كافية جدا وهتديكي تغطية مثالية, لان الطبقات الكتير ممكن في النهاية تتشقق على الشفايف ويبقى شكلها كيكي.

غلطات الروج السائل 3
غلطات الروج السائل 3

4- بتحطيه بطريقة غلط:

ممكن تشوفي ان رسم الروج من فوق لتحت هو انسب طريقة, لكن ده مش مع الروج السائل, تعتبر افضل طريقة لتطبيقه انك تبدأي بالشفة اللي تحت الاول, لان في البداية اول ما بتخرجي الفرشة من الانبوبة بيكون عليها روج كتير عشان كده الافضل انك تبدأي بالشفة اللي تحت عشان يكون عندك مساحة اكبر للغلطات, وبمجرد ما تملي الشفة اللي تحت, استخدمي باقي اللون اللي موجود على الفرشة تملي بيه الشفة اللي فوق, ابتدي من النص للجوانب.. شوفي من هنا ازاي تحطي الروج السايل زي المحترفين بخطوات بسيطة.

غلطات الروج السائل 4
غلطات الروج السائل 4

5- مش بتستخدمي قلم لتحديد الشفايف:

هل سألتي نفسك ليه الروج السائل في اول اليوم بيكون شكله حلو ومثالي وعلى اخر اليوم بيسيح من على حدود الشفايف وبيعمل خطوط؟ ده ممكن يكون سببه انك مستخدمتيش قلم تحديد الشفايف, لان قلم التحديد هيساعد انه يحافظ على الروج السائل جوه حدود الشفايف, وكمان لو مليتي شفايفك كلها بقلم التحديد ده هيعتبر كريم تمهيدي او برايمر للروج هيحافظ عليه لفترة اطول, وهيخليه يتوزع على الشفايف بشكل متساوي اكتر.

غلطات الروج السائل 5
غلطات الروج السائل 5

6- مش بتحددي الشفايف بشكل صح:

بعد ما تحددي الشفايف, استخدمي فرشة شفايف عشان تدمجيه في اتجاه منتصف الشفايف عشان تعملي تأثير اومبري, وبالطريقة دي مش هيبقى باين انك محددة شفايفك وفي نفس الوقت مستفادة بيه انه هيحافظ لك على الروج, اختاري قلم تحديد نفس لون الروج او اقرب درجة ليه.. شوفي من هنا طريقة تحديد الشفايف زي المحترفين.

غلطات الروج السائل 6
غلطات الروج السائل 6

7- بتفركي شفايفك مع بعض:

اكيد كلنا في الروج العادي بنعمل الحركة دي بعد ما نحط الروج بنفرك الشفايف في بعض عشان نملى الشفايف بشكل مثالي ونوزع اللون بشكل متساوي, لكن لما نيجي مع الروج السائل الحيلة دي متنفعش معاه, لان الروج السائل طبيعته انه بينشف بسرعة, وبيجي كمان مع فرشة هتخليكي توزعيه بشكل مثالي, وبالتالي انتي مش محتاجة تعملي حركة فرك الشفايف لتوزيع اللون.

غلطات الروج السائل 7
غلطات الروج السائل 7

8- بتحطي الروج السائل على الجزء الداخلي من الشفايف:

اكيد كل البنات اللي بيستخدموا الروج السائل بيلاحظوا انه بعد ما بيحطوه بفترة بيعمل خط غامق على الجزء الداخلي من الشفة, عشان بننصحك انك تتجنبي تحطي كمية روج كتير في المنطقة دي ممكن تدمجي من اللون بصوباعك على المنطقة الداخلية للشفة, وتحطي طبقة من الروج المرطب من نفس لون الروج السائل اللي انتي حطاه ولو مش متوفر عندك روج مرطب بنفس اللون, ادمجي اللون بصوباعك بس بطريقة الطبطبة ده هيخلي مافيش روج كتير في المنطقة دي ومش هيعمل خط غامق عليها.

غلطات الروج السائل 8
غلطات الروج السائل 8

10 نصايح ازاي تحطي الروج المات زي المحترفين

ازاي تحطي الروج المات زي المحترفين
ازاي تحطي الروج المات زي المحترفين

مقالات متعلقه

3 حاجات ضروري تعمليهم دايما قبل ما تحطي الروج المات

3 حاجات ضروري تعمليهم دايما قبل ما تحطي الروج المات

حيل للروج هتخليه يثبت معاكي لفترة اطول

حيل للروج هتخليه يثبت معاكي لفترة اطول

8 حيل مكياج هتبين شفايفك اكبر وشكلها ممتليء

8 حيل مكياج هتبين شفايفك اكبر وشكلها ممتليء