8 حيل مكياج هتبين شفايفك اكبر وشكلها ممتليء
مافيش حاجة جذابة اكتر من الشفايف الممتلئة, واكيد كل بنت بتبقى عايزة شفايفها تطلع بشكل جذاب اكتر, ولو انتي شفايفك رقيقة او صغيرة, تقدري باستخدام ادوات المكياج تبيني شفايفك بشكل اكبر, وده اللي هنعرفه النهاردة من خلال السطور الجايه هنقولك 8 حيل مكياج هتبين شفايفك اكبر.
حيل مكياج هتبين شفايفك اكبر:
1- جهزي شفايفك:
كل ما كانت الشفايف ناعمة اكتر ومترطبة كويس كل ما المنتجات هتطلع عليها احلى, اول حاجة ابدأي بعمل تقشير للشفايف كل اللي هتعمليه اعملي خليط من زيت الزيتون والسكر وخدي منه على فرشة الاسنان وافركي الشفايف بالراحة في حركات دائرية عشان تتخلصي من كل الجلد الميت وبعدها اغسلي شفايفك بمية دافية, تاني خطوة بعد التقشير هي الترطيب حطي طبقة من زبدة الكاكاو.
2- استخدام الكونسيلر:
قبل الروج, استخدمي الكونسيلر او كريم الاساس عشان تعملي قاعدة او طبقة اساسية للروج, ده هيخلي الروج يطلع بشكل احلى وهيظهر لونه اكتر ويثبته فترة اطول, والميزة الاكبر انه هيدي شكل ممتليء لشفايفك, وتقدري كمان تستخدمي الكونسيلر حوالين الشفايف بعد ما تحطي الروج عشان تظبطي اي لغبطة او اي روج خرج بره حدود الشفايف وتخلي شفايفك بارزة اكتر.
3- اعملي كونتور للشفايف:
الكونتور في المكياج بشكل عام يعتبر واحد من اهم حيل المكياج اللي تقدري بيه تتحكمي في ابعاد الوش, تقدري تصغري الجبهة, تبرزي عضم الخدين, او تكبري الشفايف بعمل كونتور بلون فاتح تحت مركز الشفة اللي تحت, ومنتصف الشفة اللي فوق, ده هيعمل ظل للشفايف ويديها حجم اكبر, لكن اتأكدي من انك تمزجي الكونتور كويس.
4- استخدمي الهايلايتر على قوس كيوبيد:
الهايلايتر مش بس عشان نبرز بيه عضم الخد, لو اضفتي لمسة بسيطة من الهايلايتر على قوس كيوبيد هتبين شفايفك بشكل اكبر, وعادة الافضل انك تختاري هايلايتر باللون الشامبين لانه من اكتر الدرجات اللي هتبان طبيعية, تقدري تطبقي الهايلايتر بصوابعك او بفرشة صغيرة ناعمة, وممكن تضيفي لمسة كمان من الهايلايتر عند مركز الشفة اللي تحت عشان تديها لوك ممتليء اكتر.
5- التحديد بره حدود الشفايف:
واحدة من اسهل الطرق عشان تبيني شفايفك اكبر, انك ترسمي بقلم التحديد بره حدود الشفايف, تقريبا كل الميكب ارتيست بيعملوا الحيلة دي, ولكن لازم تكوني حريصة ان ميبقاش فيه مبالغة وتحددي بره الشفايف زيادة عن اللزوم لان كده الشكل في النهاية هيطلع مش طبيعي, اهم حاجة اختاري لون قلم يكون قريب من لون بشرتك عشان يبان طبيعي, وابدأي ارسمي الخط على شفايفك بالتدريج, وعشان تحددي شفايفك صح زي المحترفين امشي على الخطوات دي.
الخطوة 1 – التحضير: تقشير الشفايف.
الخطوة 2 – الاساس: حطي طبقة من كريم الاساس او الكونسيلر على الشفايف كلها.
الخطوة 3 – التحديد: ارسمي علامة X على قوس كيوبيد بقلم التحديد واخرجي بره حدود الشفايف بحاجة بسيطة واتأكدي انك متخرجيش بره حدود الشفايف اوي زي ما قولنا, واتأكدي ان الرسمة في الناحيتين متساويين.
الخطوة 4 – المليء: كملي باقي تحديد الشفايف, واملي الشفايف كلها بقلم التحديد, واستخدمي قلم تحديد يكون نفس لون شفايفك, او افتح بدرجة واحدة.
الخطوة 5 – الهايلايتر: حطي روج بلون فاتح, وحطي الهايلايتر في مركز او منتصف الشفة وامزجيها بصوباعك عشان تدي تظهري الشفة ممتلئة.
6- استخدمي الوان نيود:
الوان الروج النيود مش بس شكلها حلو على الشفايف, لكن كمان ليها ميزة تانية مهمة انها بتدي حجم اكبر للشفايف اكتر من الالوان الغامقة, ولو عايزة شكل ممتليء اكتر وحجم اكبر استخدمي لون نيود بيلمع, اللمعان هيبين شفايفك بشكل ممتليء اكتر, او ممكن تحطي لمسة ليب جلوس او ملمع شفايف على منتصف الشفايف وامزجيه.
7- استخدمي ملمع يزود حجم الشفايف:
عشان تكبري الشفايف بشكل فوري, ممكن تستخدمي زبدة كاكاو او ملمع شفايف للتكبير اللي بيحتوي على مكونات بتزود حجم الشفايف بشكل طبيعي زي الببتيدات, النعناع, او الكولاجين, وعادة بيستمر تأثيرها لمدة ساعة وبعدين بيروح, يعني لو عندك خروجة وعايزة حاجة سريعة عشان تزودي حجم شفايفك النوع ده هيكون مناسب ليكي جدا.
8- اعملي وصفات لتكبير الشفايف:
زيت القرفة: القرفة بتزود تدفق الدم بشكل طبيعي, عشان كده لو ضيفتي نقطة واحدة من زيت القرفة لملع الشفايف بتاعك, هيعملك ملمع شفايف هيدي شفايفك مظهر ممتليء بشكل فوري.
معجون الاسنان: يعتبر من اسرع الوصفات اللي ممكن تديكي شكل ممتليء لشفايفك, كل اللي هتعمليه حطي طبقة سميكة من معجون الاسنان على شفايفك وسيبيه لمدة 10 ثواني بس, وبعدين امسحيه, هيديكي شكل ممتليء وناعم للشفايف بشكل فوري.. تقدروا تشوفوا من هنا وصفات اكتر لتكبير ونفخ الشفايف.
16 حيلة لشفايف جميلة ومغرية !
