نصايح ازاي تتغلبي على خوفك من الوقوع في الحب

بقلمآية حسان فيحب visibility737

مفيش شك ان الوقوع في الحب حاجة تخوف وبتتطلب شجاعة ومصارحة كبيرة مع نفسك ومع شريكك، وخوفنا ده كتير بيمنعنا ويضيع علينا فرص كتير خصوصا لو كنا مرينا قبل كده بتجارب سيئة أو شفناها بتحصل قدامنا،عشان كده في المقال ده هنقدملك شوية نصايح بسيطة تخلي الموضوع أسهل عليكي،  اعرفي معانا نصايح ازاي تتغلبي على خوفك من الوقوع في الحب

نصايح ازاي تتغلبي على خوفك من الوقوع في الحب

1- خليكي صريحة مع نفسك في سبب خوفك 

اقعدي وواجهي نفسك بالحقيقة، انتي ليه خايفة تحبي وترتبطي؟ هل ده بسبب تجربة فاشلة مريتي بيها وعلمت فيكي وخوفتك، أو هل بتحسي ان فكرة الارتباط نفسها بتخنقك وتحسسك انك هتبقي في مسؤولية ودايرة مقفولة وده برضه بيخوفك؟ الأسباب ممكن تكون مختلفة ومتعددة لكن المهم انك تعرفي المشكلة فين عشان تعرفي تحليها، وعموما ماتخليش الخوف يمنعك عن حاجة ممكن تكون هي الأفضل اللي هتحصل في حياتك، الحب ممكن يألم لكن ممكن كمان يشفي. 

خليكي صريحة مع نفسك في سبب خوفك

2- حسي بمشاعرك 

الخطوة التانية هي انك تحسي بأي مشاعر بتمري بيهال، الخوف و القلق والتوتر كلها مشاعر لازم تحسي وتمري بيها عشان تاخد وقتها وبعد كده تقدري تتخلصي منها، لأن  pain demands to be felt  زي الجملة المشهورة ما بتقول، حسي بالمشاعر دي واتخلصي منها بانك تتكلمي عنها مع أهلك وأصحابك، أو حتى بانك تكتبيها على الورق، ولو كل ده ماجابش نتيجة يبقى لازم تطلبي مساعدة من حد محترف زي طبيب أو أخصائي نفسي تتكلمي معاه عشان يساعدك تتخلصي من المشاعر دي اللي بتمنعك من انك تبدأي من جديد، الخطوة دي من أهم الخطوات اللي مهم تعمليها عشان تتغلبي على خوفك من الوقوع في الحب.

3- اختاري شريكك صح

الحب أعمى صحيح، بس ده مايمنعش انك تبصي كويس على الشخص اللي حاسه انك ميالة له و تقربي منه عشان تتأكدي لو كنتوا مناسبين فعلا لبعض، اسألي نفسك، بتحترميه وهو بيحترمك وبيشجع طموحك؟ بيخاف عليكي وبيعاملك كويس؟ مابيبخلش عليكي؟ وغيرها من الأسئلة اللي لازم تشوفي إجاباتها بصدق عشان يبقى إختيارك صحيح، وإلا يبقى بتعرضي نفسك لألم جديد. 

اختاري شريكك صح

4- افهمي انه عادي تبقى ضعيفة أو خايفة 

صعب جدا ان اي حد يعترف لنفسه انه خايف أو ضعيف، عشان كده لازم تبقي فاهمة كويس أنه عادي تحسي بالخوف والضعف وان دي مشاعر ماتقللش منك بالعكس دي مشاعر طبيعية كل البشر بيمروا بيها وبتتطلب شجاعة حقيقية لمواجهاتها وتخطيها، أهم حاجة وانتي في مرحلة الشفاء والتخطي ماتدخليش في أي إرتباط جديد لأن الفترة دي بتبقي فيها هشة جدا وده ممكن يخلي إختيارك يبقى غلط كبير. 

افهمي انه عادي تبقى ضعيفة أو خايفة

5- افهمي ان الوقوع في الحب بياخد وقت 

كل حاجة في الدنيا بتاخد وقت، مفيش حاجة بتحصل في يوم وليلة، وكمان كله في أوانه حلو عشان كده لو لسه الحب مادقش على بيبان قلبك ماتزعليش وماتستعجليش وتقولي اشمعنى انا، هياخد وقته وهيجيلك وانتي مستعدة وفي الوقت المظبوط اللي ينفعك عشان تقعي فيه في الحب، اصبري وماتستعجليش على حاجة، السحر هيحصل في ميعاده واعرفي ان الوقوع في الحب بياخد وقت زيه زي أي حاجة تانية في الدنيا.

ازاي تتغلبي على خوفك من الوقوع في الحب
افهمي ان الوقوع في الحب بياخد وقت

اعرفي معانا كمان نصايح وأفكار إزاي تحسني التواصل بينك وبين شريكك