دليل الحجاب: الستايلات المختلفة للفات الحجاب وازاي تلبسيها

بقلمريهام محمود فيموضة وأزياء visibility7162

لفات الحجاب دلوقتي بقت كتير جدا وفيها تنويع غير زمان واللفات التقليدية اللي اتعودنا عليها, هل تعرفي ستايلات لفات الحجاب المختلفة وايه اللي ممكن يكون مناسب ليكي اكتر؟ هو ده اللي هنعرفه النهاردة من خلال دليل ستايلات الحجاب هنقولك الستايلات المختلفة للفات الحجاب وازاي تلبسيها وايه نوع الاقمشة المناسبة لكل ستايل.

دليل ستايلات الحجاب:

1- الستايل الكلاسيك:

اللفة اليومية:

ده الستايل التقليدي المعروف اللي كلنا متعودين عليه من زمان, ومن الستايلات اللي بينفع معاها كل انواع الاقمشة, وبتمشي على كل اشكال الوشوش.

طريقة اللف:

بتخلي طرف اطول من الطرف التاني, وبتجيبي الطرف الطويل تلفيه على الراس بطريقة يكون فيها Volume يعني اللفة متبقاش محكومة اوي, ولو مش بتحبي ال Volume ممكن تخلي اللفة محكومة اكتر, وثبتيها من فوق ومن الجوانب بالدبابيس.

اللفة دي مناسب ليها السكارف المستطيل, وبتليق على اشكال الوشوش, ومناسبة جدا مع النضارة.

الاقمشة المناسبة ليها:

الجيرسيه, المودال, الفسكوز, الجورجيت, الشيفون, والساتان.

دليل ستايلات الحجاب

لفة The no-hassle tassle:

ده ستايل بسيط ولفته ناعمة جدا, والستايل ده ممكن تلفيه من غير اي دبابيس.

طريقة اللف:

خلي طرف من الطرحة اطول من التاني, واشبكيها بدبوس, هاتي الطرف الطويل لفيه على الراس, ولفي باقي الطرحة حوالين الرقبة, والطرف القصير نازل على الكتف, وممكن تلفي الطرف الطويل كله حوالين رقبتك وتسيبي الجزء الاخير بتاعه ناز على الكتف, يعني الشكل بيعتمد على حسب اللي تفضليه اكتر.

واللفة دي ممكن تستخدمي معاها السكارف المستطيل والمربع, وبتليق على اشكال الوشوش, وبتطلع حلوة جدا لو استخدمي بروش لتثبيت الطرحة على الكتف.

الاقمشة المناسبة ليها:

الجيرسيه, المودال, الفسكوز, الجورجيت, الشيفون, الساتان, والحرير.

دليل ستايلات الحجاب

لفة ال casual chic:

كمان ستايل بسيط للفة واللي يعتبر من ضمن اللفات الكلاسيك, وطريقته سهلة وبسيطة جدا.

طريقة اللف:

خلي طرف من الطرحة اطول من التاني واشبكيها بدبوس, لفي الطرف الطويل حوالين الرقبة, وخلي الطرفين نازلين على الكتف قصاد بعض.

اللفة دي ممكن تستخدمي معاها السكارف المستطيل, وبتليق على كل اشكال الوشوش.

الاقمشة المناسبة ليها:

الجيرسيه, المودال, الفسكوز, الجورجيت, الشيفون, والساتان.

دليل ستايلات الحجاب

2- الستايل ال Tucked-in:

 لفة ال Melanie:

من اللفات الانيقة جدا, اللي بتكون مناسبة مع التوب اللي رقبته عالية, وشيميز بلياقة, والبليزر, ورقبة السلحفة.

طريقة اللف:

ممكن تتني السكارف المربع على شكل مثلث وخلي الطرفين متساويين اشبكيها بدبوس, ولفي الطرفين حوالين رقبتك, وثبتيهم بدبوس من ورا, وحطي الطرحة كلها جوه الشيميز او التوب.

استخدمي معاها سكارف مربع, وبتليق على كل اشكال الوشوش.

الاقمشة المناسبة ليها:

الشيفون, الساتان, والحرير.

دليل ستايلات الحجاب

لفة ال Parisian knot:

كمان من اللفات الانيقة جدا, المناسبة مع السكارف السادة او المطبوع.

طريقة اللف:

لفي الطرحة المربعة على شكل مثلث بطرفين مش متساويين, اشبكيه بدبوس, هاتي الطرف الطويل لفيه حوالين الرقبة وخلي اخر اللفة يكون طرف الطرحة من قدام, خدي طرف المثلث اللي ورا واربطيه مع طرف الطرحة اللي انتي لفتيه حوالين الرقبة واعمليهم عقدة في الجنب, والطرف القصير من الطرحة ممكن تدخليه في باقي الطرحة حوالين الرقبة, او تدخليه جوه الشيميز حسب ما تفضلي.

اللفة مناسب ليها السكارف المربع, وبتليق على كل اشكال الوشوش, وبتكون مناسبة مع التوب اللي برقبة مدورة.

الاقمشة المناسبة ليها:

الشيفون, الساتان, والحرير.

دليل ستايلات الحجاب

لفة ال Whimsical bow:

لو عايزة لفة مختلفة هتناسبك جدا اللفة دي, وكمان مناسبة جدا من التوب اللي برقبة مدورة.

طريقة اللف:

خلي طرف من الطرحة اطول شوية من التاني, لفي الطرفين حوالين الرقبة وخلي نهايتهم من قدام, واربطيهم مع بعض فيونكة على جنب.

استخدمي مع اللفة دي سكارف مستطيل, وبتليق على كل الوشوش.

الاقمشة المناسبة ليها:

الجورجيت, الشيفون, الساتان, والحرير.

دليل ستايلات الحجاب

3- ستايل ال Voluminous:

اللفات دي مناسبة للبنات اللي بيحبوا يعملوا Volume او يضيفوا حجم للطرحة.

لفة ال Side twist:

اللفة دي مناسبة جدا لاضافة حجم للفة الطرحة من غير ما تبقى مكلكعة من قدام, وبتطلع حلوة جدا مع النضارة, ومناسبة لو عايزة لفة مريحة وفي نفس الوقت عايزة تعملي لها اضافة تغيري من شكلها.

طريقة اللف:

خلي طرف من الطرحة اقصر من الطرف التاني, خدي الطرف القصير لفيه فوق الراس, هاتي الطرف الطويل لفيه على الراس فوق الطرف الاقصر, وثبتيها بالدبوس.

مناسب معاها السكارف المستطيل, وبتليق على كل اشكال الوشوش.

الاقمشة المناسبة ليها:

المودال, الفسكوز, والجورجيت.

دليل ستايلات الحجاب

لفة ال Loose drape:

مناسبة جدا ليكي لو بتدوري على تغطية اضافية, وفي نفس الوقت تبقى فضفاضة, واللفة دي مناسبة جدا مع بروش او عقد.

طريقة اللف:

خلي طرف من الطرحة اطول من التاني, لفي الطرف الاطول على الراس بحيث ميبقاش محكوم اوي ويبقى في شوية حجم اضافي من فوق ولفيها لفة كمان على الراس وخلي الطرف من قدام على الكتف, وثبتيها بالدبوس, والطرف القصير دخليه جوه الطرف اللي نازل على الكتف.

ممكن تستخدمي معاها سكارف مستطيل ومربع, بتليق على كل اشكال الوشوش, واللفة مناسبة جدا مع النضارات.

الاقمشة المناسبة ليها:

المودال, الفسكوز, الجورجيت, الشيفون, والساتان.

دليل ستايلات الحجاب

4- ستايل Over the shoulder:

اللفة التركي:

من اكتر اللفات المنتشرة بتركيا عشان كده اتسمت اللفة التركي, واتأكدي انك تستخدمي في الستايل ده القماش الساتان السميك سواء بيلمع او مات.

طريقة اللف:

هاتي سكارف مربع اتنيه على شكل مثلث, خلي الطرفين قد بعض, اشبكيها بدبوس, ولفي الطرفين عكس بعض حوالين الرقبة, واربطيهم مع بعض من ورا تحت طرف المثلث بتاع الطرحة بحيث تبقى الربطة مش باينة.

استخدمي معاها سكارف مربع, وبيكون افضل لو لبستي تحتها باندانا, واللفة بتليق مع كل اشكال الوشوش.

الاقمشة المناسبة ليها:

الساتان, والحرير.

دليل ستايلات الحجاب

لفة ال Throwback:

من ابسط واسهل اللفات ومريحة جدا في اللبس, ومش هتكوني محتاجة معاها غير دبوس واحد, ومناسبة جدا تلبسيها مع توب برقبة مدورة.

طريقة اللف:

خلي طرفين الطرحة طول واحد, اشبكيها بدبوس, خدي طرف رجعيه لورا, وخلي الطرف التاني من قدام زي ما هو, واختياري ممكن تستخدمي دبوس لتثبيت الطرحة على الكتف اكتر.

استخدمي معاها سكارف مستطيل ومربع, واللفة بتليق على كل اشكال الوشوش.

الاقمشة المناسبة ليها:

الجيرسيه, المودال, الفسكوز, الجورجيت, الشيفون, والساتان.

دليل ستايلات الحجاب

لفة ال Chic flare:

لو بتدوري على لفة انيقة وناعمة وبسيطة, اللفة دي هتكون مناسبة ليكي جدا.

طريقة اللف:

خلي طرف من الطرحة قصير اوي, والطرف التاني طويل اوي, خدي الطرف الطويل لفيه حوالين الرقبة, وخلي اخر الطرف اللي لفتيه يبقى حوالين الوش, ثبتيها بدبابيس, وخدي الطرف القصير لفيه حوالين الرقبة تحت باقي الطرحة.

استخدمي معاها سكارف مستطيل, والافضل تلبسي تحتها باندانا, واللفة دي بتليق على الوش البيضاوي والمدور واللي على شكل قلب والمربع.

الاقمشة المناسبة ليها:

الفسكوز, الجورجيت, الشيفون, والساتان.

دليل ستايلات الحجاب

5- ستايل التربون:

التربون من اللفات الاساسية في بعض الثقافات, تعتبر من تقاليد الحجاب في افريقيا وكمان في اسيا مع اضافة حجم اكبر ليها, واللفة دي مثالية جدا للوش اللي بيكون الفك فيه قوي او بارز والجبهة منحنية.

لفة ال Side knot:

لفة العقدة تقدري تغيري في شكلها على حسب نوع القماش اللي مستخدماه في اللفة, تقدري تستخدمي قماش خفيف وناعم للوك بسيط وهادي, او قماش بحجم اكبر للوك اقوى.

طريقة اللف:

اتني الطرحة نصين بالطول, حطيها على راسك بحيث تبقى مغطية الاذن, خدي الطرفين اربطيهم مع بعض على ورا, هاتي طرف واحد منهم لقدام على الكتف, خدي الطرفين اربطيهم عقدة في الجنب.

استخدمي معاها سكارف مستطيل, بتليق على الوش المربع والمدور, ومناسبة جدا تتلبس مع النضارات.

الاقمشة المناسبة ليها:

المودال, الفسكوز, والحرير.

دليل ستايلات الحجاب

لفة ال Criss cross:

اللفة دي مناسبة جدا لو هتقضي يومك كله بره وعايزة لفة تثبت معاكي وتريحك طول اليوم.

طريقة اللف:

اتني الطرحة نصين بالطول, حطيها على راسك, وخلي الطرفين على ورا اربطيهم مع بعض, خدي طرف لفيه على قدام على الراس وحطي نهايته من ورا تحت الربطة, وخدي الطرف التاني لفيه على قدام على الراس زي الطرف الاول ودخلي نهايتة من ورا تحت الربطة, واتأكدي انك عاملة كروس من قدام في مقدمة الراس.

استخدمي معاها سكارف مستطيل, بتليق على الوش المربع والمدور, ومناسبة جدا تتلبس مع النضارات.

الاقمشة المناسبة ليها:

الجيرسيه, الفسكوز, والحرير.

دليل ستايلات الحجاب

لفة ال Refined turban:

من اللفات المميزة جدا اللي تقدري تلبسيها لخروجات بعد الضهر او مناسبة, او الصبح في خروجاتك اليومية على اللبس الكاجوال.

طريقة اللف:

قبل ما تربطي الطرحة اعملي شعرك كحكة متكونش عالية اوي ولا منخفضة اوي, هاتي الطرحة اتنيها نصين بالطول, حطيها على راسك وخلي طرف اطول من التاني بكتير, خلي الطرفين ورا, لفي الطرف القصير حوالين الكحكة بتاعتك وحطيه تحت الطرحة عشان تثبتيه, بعدين لفي الطرف الطويل حوالين الكحكة كذا لفة وحطيه تحت الطرحة من ورا وثبتيه بدبوس.

استخدمي معاها سكارف مستطيل, بتليق على الوش المربع والمدور, ومناسبة جدا تتلبس مع النضارات.

الاقمشة المناسبة ليها:

الجيرسيه, الفسكوز, والحرير.

دليل ستايلات الحجاب

لفة ال Rosie-the-Riveter:

للي بيحبوا اللفات المميزة والمختلفة اللفة دي هتكون مناسبة ليهم جدا.

طريقة اللف:

خلي طرفين الطرحة متساويين واربطيها على راسك بالعكس يعني الطرفين يكونوا من قدام واربطيهم ربطة واحدة في مقدمة الراس, اعملي الطرفين كروس او عكس بعض من قدام ولفيهم على ورا لفة كمان وساوي الطرحة من الجنبين كويس, اعمليهم كروس تاني من ورا وهاتيهم تاني على قدام, واعمليهم عقدة, والباقي من الطرحة دخليه تحت العقدة.

ممكن تستخدمي سكارف مستطيل ومربع, واللفة بتليق على الوش المربع والمدور, ومناسبة جدا تتلبس مع النضارات.

الاقمشة المناسبة ليها:

الفسكوز, والحرير.

دليل ستايلات الحجاب

لفة ال Top knot:

اللفة دي مناسبة ليكي لو بتحبي الستايل الجريء المميز.

طريقة اللف:

خلي طرفين الطرحة متساويين, لفيها على الراس بالعكس زي اللفة اللي فاتت خلي الطرفين من قدام, اربطيهم مع بعض ربطة واحدة من قدام, ولفي كل طرف حوالين العقدة, لحد ما يبقى عندك عقدة كبيرة فوق من قدام.

ممكن تستخدمي معاها سكارف مستطيل ومربع, بتليق على الوش المربع والمدور, ومناسبة جدا تتلبس مع النضارات.

الاقمشة المناسبة ليها:

الفسكوز, الشيفون, والحرير.

دليل ستايلات الحجاب

طرق لفات حجاب من غير دبابيس ونصايح ازاي تلبسيها

لفات حجاب من غير دبابيس
لفات حجاب من غير دبابيس