اعملي بنفسك ورق امتصاص الدهون من البشرة Blotting paper في البيت

بقلمريهام محمود فيبشرة visibility378

لو بشرتك دهنية وبتفرز دهون كتير وبتيجي على نص اليوم تلاقي بشرتك بتلمع والمكياج ساح منك, يبقى اكيد انتي هتكوني محتاجة ورق امتصاص الدهون من البشرة Blotting paper, والنهاردة من خلال موضوعنا هنقولك ازاي تعمليه بنفسك في البيت بطريقة سهلة ومش مكلفة.

تعالوا نعرف الاول ايه هو ورق امتصاص الدهون من البشرة:

للبنات اللي ميعرفوش ايه ورق امتصاص الدهون هو منتج بيساعد على امتصاص دهون البشرة الزيادة, وبيساعد على تثبيت المكياج فترة اطول, وفي ماركات كتير هنلاقيها منزله منه زي كلين اند كلير او نيكس وغيرها من الماركات, لكن للاسف انه مش متوفر اوي في مصر او في المنطقة العربية عموما, وبيكون الطريقة الوحيدة انك تشتريه اون لاين, ده غير انه ممكن يكون مكلف وزيادة على ميزانيتنا, عشان كده النهاردة هنقولك اكتر من طريقة لعمل ورق امتصاص الدهون بحاجات بسيطة ورخيصة.

ورق امتصاص الدهون

طريقة عمل ورق امتصاص الدهون من البشرة Blotting paper:

1- الطريقة الاولى:

الحاجات اللي هتحتاجيها:

ورق شفاف “من المكتبة”.

بودرة سايبة او مضغوطة او بودرة تلك.

الطريقة:

هاتي ورق الشفاف العادي اللي بنستخدمه في الرسم, هتلاقيه متوفر في اي مكتبة, هاتي الورقة اتنيها وقصيها بالمقص قطع متساوية على شكل مستطيل, وهتلاقي الورقة ليها ناحيتين ناحية خشنة وناحية ناعمة احنا هنستخدم الناحية الخشنة شوية.

بعد ما تقطعيهم كلهم, هاتي البودرة اي نوع هتستخدميه لو بودرة مضغوطة خدي منها بالبلندر او بالسفنجة وابدأي امسحي على الجنب الخشن من الورقة كويس, ولو بودرة سايبة او بودرة تلك رشي على الورقة وبعدين نفضيها من البودرة الزيادة.

بعد ما تخلصي كل الورق, حطيهم في اي ظرف عندك عشان تحفظيهم, وتقدري تحطيهم في شنطتك من غير ما يتقطعوا, وتستخدمي منهم خلال اليوم طول ما انتي بره.

وكده يبقى ورق امتصاص الدهون بتاعك جاهز, كل ما تحسي ان بشرتك افرزت دهون زيادة او بتلمع طلعي منه ورقة واضغطي بيها على البشرة هتمتص كل الدهون وهتشيل اللمعة.

ورق امتصاص الدهون

2- الطريقة التانية:

الطريقة التانية بنفس الطريقة اللي فاتت لكن بدل الورق الشفاف, هنستخدم المناديل العادية, هنقطعها باي شكل واي حجم احنا عايزنيه ونحط عليها بودرة اي نوع متوفر عندك, واحفظيها في اي علبة فاضية عندك, ممكن تقصيها مدورة وتحفظيها في علبة بودرة فاضية, او عليه كريم فاضية اغسليها كويس ونضفيها وحطي فيها المناديل.

ورق امتصاص الدهون

3- الطريقة التالتة:

الطريقة التالتة هي باستخدام ورق المناديل السميك اللي بيكون في الكافيهات والمطاعم بينزل مع المشروبات والاكل زي اللي بيبقى في ستارباكس وغيرها, النوع ده ممكن نستخدمه كمان بنفس الطريقة نقطعه بالحجم والشكل اللي احنا عايزينه, ونحط عليه بودرة ونحفظة في اي علبة فاضية او ظرف, ونستخدمه خلال اليوم.

ورق امتصاص الدهون

تكنيك الجامسو Jamsu لتثبيت المكياج فترة طويلة

تكنيك الجامسو لتثبيت المكياج