9 طرق ازاي تتعاملي وتردي على الشخص قليل الذوق والتعليقات المستفزة

بقلمريهام محمود فيمنوعات visibility2206

من فينا متعاملش او ما ممرش عليه شخص قليل الذوق او مستفز وبيقول تعليقات تضايق؟ اكيد كلنا بنعاني من وجود الاشخاص دي في حياتنا وممكن حتى يكون صديق او حد قريب مننا ويحصل انه مره يقول حاجة مستفزة تضايقنا, زي مثلا انتي تختني, هو انتي لسه مشتغلتيش, وهكذا من الحاجات المستفزة اللي ممكن بتتقال منهم قبل ما يفكروا في تأثيرها على اللي قدامهم بس في النهاية هي بتضايق وتخليكي تحسي بمشاعر سلبية, والنهاردة من خلال موضوعنا هنساعدك انك تتعاملي مع الحاجات اللي ممكن تضايقك من خلال 9 طرق تردي بيهم على الشخص قليل الذوق.

اكيد لما تتعرضي لموقف مستفز من شخص ويقول حاجة تضايقك من حقك انك تردي وتدافعي عن نفسك, ولكن انتي تقدري تعملي ده بطريقة ايجابية ومهذبة وتردي بأسلوب ميطلعكيش انتي غلطانة بأي شكل وفي نفس الوقت تحسي انك قدرتي تدافعي عن نفسك وتكوني راضية عن ردك, لان مش كل الاشخاص بيكونوا شاطرين في ده وفي كتير من الاوقات بعد ما الموقف يعدي نقعد نقول بينا وبين نفسنا انا كان لازم اقول كذا او ارد بالرد الفلاني, اكيد كلنا مرينا باللحظات دي اننا نندم على ردود مقولنهاش بعد ما الموقف يعدي, عشان كده مهمتنا النهاردة اننا نقولك ازاي تردي في المواقف دي الردود الصح.

9 طرق تردي بيهم على الشخص قليل الذوق:

1- شكرا جدا:

لما يقابلك موقف مستفز او كلام يضايق كلمة “شكرا” لانها مش بس هتوضح للشخص اللي قدامك ان كلامه مأثرش فيكي, لكن كمان هتعكس ان شخص ناضج, لانك اخترتي انك متتعصبيش او تتجاهليه لكن رديتي الرد اللي مش هيطلعك غلطانة وهيقوي موقفك قصاد الشخص اللي استفزك, وفي العادة كلمة “شكرا” ممكن تكون دليل على موافقتك لرأي شخص ما, لكن في الحالة دي كلمة “شكرا” معناها انك بتصرحي بوقاحة الشخص اللي قدامك واختارتي ان هو ميأثرش عليكي, وفي الحالة دي هتلاقي الشخص اللي قدامك قفل الموضوع ومكملش لما يحس ان كلامه مش مأثر عليكي.

لما تيجي تختاري الرد في اي موقف, اختاري سعادتك وحطي قدامك عينيكي انك عايزة تفضلي مبسوطة, ده هيخليكي تحافظي على افكارك وتصرفاتك بشكل ايجابي, وتبيني للاشخاص اللي استفزوكي انهم ميقدروش ياخدوا قوتك وايجابيتك منك, وبالتالي الوضع هيتقلب عليهم وهما اللي هيستفزوا منك مش العكس.

طرق تردي بيهم على الشخص قليل الذوق
طرق تردي بيهم على الشخص قليل الذوق

2- انا بقدر وجهة نظرك:

طريقة الرد ده مش بس اسلوب ذكي في الرد, لكن كمان انتي هتبيني للشخص اللي قدامك انك عايزة تتواصلي معاه بنضج وبعقل كبير, مش هتنزلي لمستواه او طريقته, ولازم تحطي في بالك ان التعليقات المستفزة او اللي فيها قلة ذوق دي بتعكس مدى قلة ثقة الشخص ده في نفسه, عشان كده لازم تفتكري كويس انه لما شخص يحاول يستفزك هو كده عايز يشدك انتي لمنطقته, لكن انتي المفروض متسمحيش بده يحصل, بيني دايما انك هتستمري في المناقشة بكرامة واحترام, ده هيوصل الشخص انه يحترمك اكتر من خلال رد فعلك بالطريقة دي, ولو ده محصلش يبقى غيري طريقتك للنقطة الجاية.

طرق تردي بيهم على الشخص قليل الذوق

3- المناقشة دي انتهت:

لو لقيتي نفسك هتتعصبي اوي ومش قادرة تردي على شخص بطريقة مهذبة او لطيفة وانك هتبدأي تغلطي, بكل بساطة انهي المحادثة فورا, لان لو انتي بتتناقشي مع شخص قريب منك او يهمك يبقى اكيد هتكوني مش عايزة تخسريه في لحظة غضب, وفي نفس الوقت مش عايزة تستمري وتتظاهري ان تعليقات الشخص اللي قدامك او اسئلته مقبولة بالنسبة لك.

في الحالة دي اختاري اسرع طريقة بانك تنهي المناقشة ومتستمريش فيها, وساعتها هتكوني حافظتي على كرامتك واحترامك لنفسك من خلال انك تفاديتي خناقة حادة.

طرق تردي بيهم على الشخص قليل الذوق

4- هل شايف ان ده ضروري, وهل متوقع مني فعلا اجاوبك؟

الطريقة دي مناسبة بشكل خاص مع مجموعة, ده هيخلي الاشخاص اللي قدامك يراجعوا نفسهم وكلامهم اللي وجهوه ليكي, بدل الرد العنيف او الغاضب المتوقع منك, هتلاقيهم بهدوء راجعوا نفسهم وحاولوا يهدوا الموقف, ومستعدين انهم يتكلموا بعقل وبشكل لائق اكتر, الطريقة دي هتديهم فرصة انهم يراجعوا نفسهم ويعتذرولك كمان قدام اصحابك او عيلتك او زمايلك في الشغل.

اللي حواليكي محتاجين يعرفوا انك مستحيل تسمحي بطريقة مستفزة او كلام قليل الذوق او انهم يتعدوا حدودهم بأي شكل معاكي من غير مبرر, وانك هتلفتي انتباههم للتصرف الغلط اول ما يعملوه, اما في حالة لو ردوا على سؤال “هل متوقع مني اجاوبك” بــ “ايوه” يبقى هنا بقى تقدري ببساطة تقولي “اوكي” واضح ان ده مش يوم حظك وكملي مناقشتك.

طرق تردي بيهم على الشخص قليل الذوق

5- ده بيجرح مشاعري:

قوليها بطريقة ساخرة او زي ما تكوني بتهزري دي كمان من الطرق اللي ممكن تقولي بيها للشخص اللي قدامك انك اختاري عدم امتصاص سلبيته واسلوبه معاكي, وتعتبر طريقة فيها نضج في التعامل مع الاشخاص المستفزين او الغير مهذبين, وده ممكن يمنع الشخص ده انه يكررها تاني او انه يقول حاجة تضايقك بمجرد انه يحس انك متأثرتيش, وهنلاقي اشخاص كتير بيتبعوا اسلوب ” لو عايزة توصلي رسالة لحد بطريقة غير مباشرة قوليها في وسط الهزار”.

طرق تردي بيهم على الشخص قليل الذوق

6- انت صح:

ممكن يكون معظم الاشخاص صعب عليهم يقولوا الكلمتين دول, لكن في اوقات بتكوني مش عايزة تدخلي فيها في اي نقاش هتكون دي احسن طريقة انك تخلي الشخص اللي قدامك يفتكر انه صح في اللي قاله, وده هيخليه يختصر المحادثة او المناقشة لانه مافيش مجال انه يقول حاجة تانية بعد الكلمتين دول, انتي قولتي ان هو صح وانسحبتي من المحادثة, وعلى الرغم من انك ممكن متحسيش بقدر كافي من الراحة من خلال استخدام التكنيك ده في الرد, الا انك هتنهي متعة الشخص اللي قدامك لانه مقدرش يكمل ويقول كل اللي عنده وينال منك ويستفزك, اللي هو اصلا هدفهم من البداية.

طرق تردي بيهم على الشخص قليل الذوق

7- دايما عندك حاجة سلبية تقولها؟

الرد ده هيكون مصدم بالنسبة للشخص اللي وجه لك كلام او تعليق مش مهذب او مستفز وهيخليه بدل ما يستفزك هيراجع نفسه, ويخليه يفكر مرتين قبل ما يختاروا مواضيع يفتحوها معاكي, وبالطريقة دي مش هتخليهم بس يركزوا على كل كلمة بيقولوها, لكن كمان هتجبريهم يعيدوا النظر في كل حاجة هيقولوها في المستقبل.

لما شخص يكرر سلوك سيء ناحيتك, يبقى لازم تلفتي انتباهه للسلوك ده, لان سلبي واسلوب الشخص ده ممكن تكون بتأثر على اشخاص تانيين غيرك, وبالتالي تنبيهم لسلوكهم المرفوض هيفيدك انتي وغيرك في المواقف المستقبلية مع الشخص ده.

طرق تردي بيهم على الشخص قليل الذوق

8- انا بحب نفسي وبحبك انت كمان:

الرد ده هيكون مناسب بس مع الاصحاب المقربين والعيلة والزوجة او الزوج, لان اكيد لو قولتي كده لرئيسك في الشغل مثلا اكيد هتلاقي نظرة غريبة ويمكن يتخصم لك من المرتب كمان :D , عشان كده استخدمي الطريقة دي حسب تقديرك وقرابة الشخص ليكي, لكن مع ذلك الطريقة دي فعالة انها توقف الاشخاص الغير مهذبين معاكي, لان دايما التهذيب والايجابية بتتغلب على السلبية, مش ممكن الضلمة تتواجد في مكان فيه النور, لما تعبري لشخص عن حبك لنفسك وللحياة وحبك ليهم, هتخليهم يفقدوا قوتهم بسرعة قدامك وهيحسوا ان تعليقاتهم السلبية مش ممكن تأثر عليكي وعلى حبك لنفسك وسعادتك ونظرتك الايجابية للحياة, لان تقريبا معظم الاشخاص مش متعودين على النظرة دي او على المشاعر دي من غيرهم, وممكن كمان يبقوا في حالة اندهاش شديدة من مدى الايجابية اللي انتي فيها هتخليهم ميعرفوش يتكلموا او يستجيبوا للحالة دي بشكل مناسب.

ودايما افتكري ان كلامك يقدر ينشر الطاقة الايجابية, وتشجيع اللي حواليكي انهم يبقوا ايجابيين.

طرق تردي بيهم على الشخص قليل الذوق

9- اضحكي:

رد الفعل ده هتخلي اللي قدامك يتحرج ويتكسف من نفسه انه اتكلم او اعلق اصلا من الاول, يعني لو مثلا شخص كرر تعليقة على زيادة وزنك اكتر من مره, بكل بساطة بصي له واضحكي, بالطريقة دي اولا هتعدي اللحظة اللي انتي فيها من غير مشكلة او عصبية, وتاني حاجة هتوصلي رسالة للي قدامك معناها انك مش بتدي فرصة للتعليقات السلبية او الغير مهذبة تأثر عليكي وعلى مزاجك او على نظرتك للحياة.

طرق تردي بيهم على الشخص قليل الذوق

خلاصة الكلام: تقدري تختاري طريقة الرد في اي موقف, عشان كده بنقولك اختاري السعادة وانك تفضلي مبسوطة ومافيش حاجة او حد يقدر يأثر على مزاجك.

ممكن تشاركونا طرقكم في التعامل مع الاشخاص السلبيين والتعليقات المستفزة.

اكتر 6 سلوكيات جذابة وازاي تكتسبيهم في شخصيتك

اكتر سلوكيات جذابة
اكتر سلوكيات جذابة