افضل ستايلات شوز للعروسة للوك مثالي في ليلة العمر
اختيار شوز العروسة من التفاصيل اللي ضروري اي عروسة تهتم بيها زي اهتمامها باختيار الفستان وتسريحة الشعر والميك اب لان كله بيكمل بعضه عشان اللوك يطلع حلو في النهاية وتبقى طلتك مثالية في ليلة العمر, عشان كده النهاردة من خلال موضوعنا هنساعدك في المهمة دي وهنشوف مع بعض افضل ستايلات شوز للعروسة تختاري منهم اللي يناسبك.
هنلاقي ستايلات كتير مختلفة من شوز العروسة ما بين الجليتر, المرصع باللولي والاستراس, الشوز السادة, او اللي داخل في تصميمه دانتيل.
بالنسبة للالوان الايام دي خرجنا شوية من اللون الابيض التقليدي للشوز, وبقى في الوان تانية زي البيج, الفضي, الدهبي, النيود, الجولدن روز, وفي عرايس بيحبوا يختاروا الوان مطرقعة ومختلفة زي الازرق, والاحمر.
كمان الستايلات دخل فيها حاجات غير تقليدية غير اللي متعودين عليها, يعني زمان شوية كنا ملتزمين ان لازم الشوز يكون بكعب عالي اوي, دلوقتي الوضع اختلف شوية وبقى في ستايلات فلات لشوز العروسة للبنات اللي مش بتقدر تلبس الكعب العالي فترات طويلة وبتبقى عايزة حاجة تريحها.
من الستايلات المختلفة اكتر كمان ان بقى في سنيكرز مناسب انه يتلبس على فستان الفرح وده للعرايس اللي بيحبوا التغيير والتجديد والحاجات الغير تقليدية وبيختاروا افكار out of the box.
نصايح عند اختيار شوز الفرح:
الشوز اختياره مهم جدا في اليوم ده, متركزيش في اختيارك على الستايل واللون بس وتنسي راحتك, لانك هتلبسيه وقت طويل جدا, فأكيد لازم تعتمدي على شوز يكون مريحك وفي نفس الوقت شكله انيق.
لو انتي مش متعودة على لبس الكعب العالي, يبقى بننصحك انك تبعدي عن اختيار كعب عالي يوم الفرح, اختاري الشوز بالكعب اللي انتي متعودة دايما تلبسيه في الشوزات العادية بتاعتك, وممكن تختاري الكعب الودجز العريض لانه بيكون مريح اكتر من الرفيع.
كمان حطي في اعتبارك حاجة مهمة جدا وهي مكان الفرح, لو فرحك في مكان مفتوح على الشاطيء او في جاردن او في قاعة, اعملي حساب نوعية الارض اللي هتمشي عليها لان ده هيحدد الاختيار, عشان تقدري تمشي وترقصي وتتحركي براحتك من غير ما تحصل اي حوادث مش محسوبة.
خدي الشوز معاكي وانتي رايحة تعملي بروفة فستان الفرح عشان تحددي الطول المناسب على الشوز.
ممكن قبل الفرح تلبسي الشوز على شراب تقيل وتتمشي بيه في البيت عشان تعودي رجلك عليه لحد يوم الفرح وميتعبكيش او يسببلك جروح.