أسوأ 10 غلطات ممكن تعمليها مع شعرك! وازاي تتجنبيها

ريهام محمود
ريهام محمود
في
شعر
2352

اكيد كل بنت بتحلم بشعر صحي وناعم وقوي, وبرغم ان الطريقة الاساسية عشان توصلي لده هو التغذية المتوازنة والعناية المناسبة والمستمرة للشعر, الا ان في حاجات ممكن تكوني بتعمليها وانتي مش واخدة بالك ممكن تأثر على صحة شعرك, والنهاردة من خلال المقال بتاعنا هنقولك أسوأ غلطات بتعمليها مع شعرك وايه الحل ليها وازاي تتجنبيها.

أسوأ غلطات بتعمليها مع شعرك:

1- بتستني فترة طويلة على ما تقصي الشعر:

لو شعرك اطرافة منقسمة ومقصفة وهايش ومجعد, وشكله مش مترتب ودايما فيه تشابك وعقد ومش بتعرفي تتعاملي معاه بسهولة, كده معناه انك اتأخرتي كتير على الميعاد اللي المفروض تقصي فيه شعرك, وخصوصا لو انتي عايزة شعرك يطول, فاللي هيساعدك على ده هو قص الاطراف بتاعته بانتظام في الحالة دي هيطول بشكل اسرع وصحي بأطراف سليمة ومش منقسمة ولا مقصفة.

الحل: انك تروحي تقصي الشعر بانتظام عند الكوافير.

أسوأ غلطات بتعمليها مع شعرك 1
أسوأ غلطات بتعمليها مع شعرك 1

2- بتصبغي شعرك بنفسك:

كتير مننا بيحب يصبغ شعره باستمرار كنوع من التغيير والنيولوك, لكن دايما بنقع في غلطة اننا بنصبغه بنفسنا في البيت مش عند حد متخصص, لو هتعمليه بنفسك يبقى لازم تكوني عارفة انتي بتعملي ايه ومتمكنة من الموضوع غير كده الافضل انك تروحي تعمليه في الكوافير, بدل ما يبوظ منك وهتضطري ساعتها في الاخر بردو انك تروحي للكوافير وساعتها هيكون الموضوع اصعب لانه هيصلح اللي انتي بوظتيه.

الحل: لو هتصبغي شعرك وانتي مش محترفة او مش متمكنة اوي من الموضوع يبقى الافضل تروحي للكوافير.

أسوأ غلطات بتعمليها مع شعرك 2
أسوأ غلطات بتعمليها مع شعرك 2

3- بتسرحي الشعر وهو مبلول:

الشعر لما بيكون مبلول بيبقى حساس جدا ومعرض اكتر للتكسر, لما تغسلي شعرك مرة تانية جربي ده بنفسك امسكي شعراية واحدة بس مبلولة وجربي اكسريها هتلاقيها اتكسرت بسهولة اكتر مقارنة بالشعر وهو ناشف, الفرشة بقى بتعمل نفس الموضوع لكن مش بتكسر بقى شعراية واحدة بتكسر مئات الشعرات مرة واحدة.

كمان الحرارة الناتجة عن السيشوار او المكوى بتخلي المية تتبحر بسرعة من الشعر, وده كمان بيسبب تكسر الشعر, ده غير انها بتقصف وبتتلف الشعر بشكل كبير.

الحل: سيبي شعرك ينشف قبل ما تستخدمي عليه الفرشة او الحرارة, وبننصح كمان باستخدام منتجات الحماية من الحرارة قبل السيشوار او المكوى.

أسوأ غلطات بتعمليها مع شعرك 3
أسوأ غلطات بتعمليها مع شعرك 3

4- بتستخدمي فرشة شعر مش نضيفة:

لما بتسرحي شعرك, كتير من جزيئات الجلد الميت بتتنقل للفرشة, حتى لو مش بتقدري تشوفيها بس هي بتكون موجودة, والجلد الميت يعتبر البيئة المثالية لنمو البكتيريا بكل انواعها, والبكتيريا دي ممكن تتنقل لفروة الراس لو مش بتغسلي فرشة الشعر بانتظام.

الحل: اغسلي الفرشة بانتظام, او حطي منديل على الفرشة دخليه في السنان بتاعتها قبل ما تسرحي شعرك, وبعد ما تسرحيه اتخلصي من المنديل وبكده تحافظي على الفرشة بتاعتك نضيفة.

أسوأ غلطات بتعمليها مع شعرك 4
أسوأ غلطات بتعمليها مع شعرك 4

5- بتغسلي شعرك كتير وبمية سخنة اوي:

الغدد الموجودة في فروة راسنا بتنتج زيوت طبيعية ضرورية لصحة الشعر, والمية السخنة والغسيل الكتير للشعر ممكن يزيل الزيوت دي, وده هيخلي الشعر جاف وهايش.

الحل: مصففين الشعر بينصحوا بغسل الشعر مرتين في الاسبوع او تلات مرات لو شعرك دهني اوي, واغسليه بمية دافية بس.

أسوأ غلطات بتعمليها مع شعرك 5
أسوأ غلطات بتعمليها مع شعرك 5

6- مش بتستخدمي بلسم او بتستخدميه بدل الشامبو:

الشامبو والبلسم عبارة عن منتجات مختلفة كل واحد ليه فايدة مختلفة للشعر, ومينفعش واحد فيهم يحل مكان التاني, لان الشامبو فايدته هي تنضيف الشعر بس, لكن البلسم للترطيب.

الحل: انك تستخدمي الاتنين, الشامبو الاول, وبعدين البلسم.

أسوأ غلطات بتعمليها مع شعرك 6
أسوأ غلطات بتعمليها مع شعرك 6

7- بتستخدمي منتج غلط لشعرك:

دلوقتي موجود في السوق منتجات كتير للعناية بالشعر منها للشعر الخفيف والخشن والمصبوغ والتالف وغيرها كتير من الانواع, وكل واحد بيبقى فيه مكونات مختلفة حسب الغرض منه, عشان كده لازم تستخدمي المنتج المناسب لشعرك, يعني مثلا ليه تستخدمي شامبو للشعر الدهني وانتي نوع شعرك جاف في الحالة دي انتي محتاجة شامبو او منتج للشعر الجاف.

الحل: شوفي شعرك محتاج ايه بالظبط واستخدمي له المنتج المناسب ليه.

أسوأ غلطات بتعمليها مع شعرك 7
أسوأ غلطات بتعمليها مع شعرك 7

8- بتسرحي شعرك كتير وبتبدأي من الجذور:

لو سرحتي شعرك من الجذور, هتلاقي شعرك عمل عقد واتشابك في بعضه, ده غير انه هيسبب في نزول شعر كتير, لان الطريقة دي بتضعف الجذور, وتسريح الشعر زيادة عن اللزوم كمان بيعمل نفس المشكلة, عشان كده متسرحيش الشعر الا في حالة انه محتاج يتسرح بس.

الحل: ابدأي دايما بتسريح الشعر من الاطراف للجذور, وفكي العقد والتشابك واحدة واحدة بالراحة من غير مبالغة او شد بعنف.

أسوأ غلطات بتعمليها مع شعرك 8
أسوأ غلطات بتعمليها مع شعرك 8

شوفي من هنا طرق لمنع تشابك الشعر وازاي ترطبيه بطريقة صح.

9- ربط الشعر بقوة اغلب الوقت:

لو ربطتي شعرك بقوة او باحكام اوي اغلب الوقت, ده ممكن يأدي في النهاية لتلفه, لانك حرفيا بتسحبي الشعر من الجذور, فلو تسريحة ديل الحصان هي الستايل المفضل ليكي, فتجنبي انك تربطي الشعر بتوك معدنية, او بدل ما ترفعي الشعر بشكل يومي ممكن تبدلي كل يوم ما بين ديل الحصان العالي والمنخفض.

الحل: حاولي انك تربطي شعرك على فترات مش بشكل يومي.

أسوأ غلطات بتعمليها مع شعرك 9
أسوأ غلطات بتعمليها مع شعرك 9

10- بتعرضي الشعر للشمس كتير:

لو بتخططي انك تقضي وقت طويل في مكان مفتوح وهتتعرضي للشمس, دايما بتفتكري انك تستخدمي واقي الشمس عشان تحمي بشرتك لكن بتنسي تحمي شعرك, التعرض للشمس فترات طويلة مش بيضر بشرتك بس لكن شعرك كمان, فلو شعرك جاف ومتقصف واطرافه منقسمة يبقى في الغالب ان السبب هو التعرض للشمس كتير.. شوفي من هنا ازاي تحمي شعرك من الشمس بميست طبيعي مع عامل حماية تعمليه بنفسك في البيت.

الحل: لو هتقعدي فترة طويلة في الشمس ممكن تلبسي سكارف او قبعة.

أسوأ غلطات بتعمليها مع شعرك 10
أسوأ غلطات بتعمليها مع شعرك 10

وصفات طبيعية للتخلص من هيشان وتجعد الشعر

وصفات طبيعية لعلاج هيشان الشعر
وصفات طبيعية لعلاج هيشان الشعر

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

6 خرافات عن العناية بالشعر بنفتكر انها صح ومفيدة

6 خرافات عن العناية بالشعر بنفتكر انها صح ومفيدة