طريقة عمل النيوكي “الجنوتشي” الايطالي بصوص الطماطم بالخطوات والفيديو

بقلمريهام محمود فيمطبخ visibility227

النيوكي او الجنوتشي هي اكلة ايطالية مشهورة جدا, وكتير من اللي بيسافروا ايطاليا وبيجربوها بينصحوا باكلها لانها من الاكلات اللي طعمها لذيذ جدا وفي نفس الوقت تقدري تعمليها بنفسك في البيت بكل سهولة, والنهاردة من خلال موضوعنا هنقولك طريقة عمل النيوكي “الجنوتشي” بصلصة الطماطم.

طريقة عمل النيوكي:

مكونات العجينة:

1 ثمرة بطاطس مسلوقة.

من ¾ – 1 كوباية دقيق.

بيضة.

¼ معلقة صغيرة ملح.

فلفل اسود.

مكونات صوص الطماطم:

2 فص ثوم مفروم.

2 ثمرة طماطم كبيرة متقطعة مكعبات او طماطم تشيري.

زبدة.

طريقة عمل النيوكي
طريقة عمل النيوكي

طريقة التحضير:

1- اول حاجة هنحضر صوص الطماطم ونسيبه على النار على ما نجهز العجينة, هاتي طاسة حطي فيها حنة زبدة صغيرة, لما تسيح ضيفي لها الثوم المفروم وشوحيه شوية وبعدين ضيفي له الطماطم, وسيبي الصوص يستوي براحته على نار هادية.

طريقة عمل النيوكي
طريقة عمل النيوكي

2- دلوقتي هنبدأ نجهز العجينة, هاتي طبق كبير حطي فيه البطاطس واهرسيها كويس بالشوكة, وبعدين ضيفي لها البيضة وقلبيهم مع بعض كويس.

3- ضيفي الدقيق للبطاطس بالتدريج واعجني لحد ما العجينة تبقى متماسكة معاكي مش طرية اوي ولا ناشفة.

4- رشي الرخامة بالدقيق وهاتي العجينة قسميها قطع صغيرة, خدي كل قطعة افضلي ابرمي فيها على الرخامة وافرديها بالطول بحيث تبقى برفع صوباع الايد كده, وبعدين قطعيها قطع صغيرة كل قطعة قد عقلة الصباع.

طريقة عمل النيوكي

5- هاتي شوكة ادهنيها بالدقيق وامسكي قطع العجين علمي على كل قطعة بالشوكة, والحركة دي الهدف منها ان الصوص يمسك على العجينة.

طريقة عمل النيوكي

6- بعد ما تخلصي تقطيع العجينة كلها, حطي حلة فيها مية على النار, سيبيها تسخن وقبل ما توصل لدرجة الغليان على طول, نزلي فيها قطع العجين, هتلاحظي ان العجين كله نزل في الحلة من تحت, سيبيها على النار لمدة من 2 – 3 دقايق كده اول ما العجين يطفو على وش المية من فوق كده تبقى استوت, طلعيها من المية.

7- دلوقتي صوص الطماطم اللي احنا حضرناه في البداية هيبقى جاهز, حطي فيه قطع العجين وقلبيهم في الصوص لمدة من 2 – 3 دقايق, وكده يبقى طبق النيوكي جاهز عندك للتقديم, حطيه في طبق ورشي عليه من فوق ريحان او بقدونس وجبنة موتزاريلا.

طريقة عمل النيوكي

الطريقة بالفيديو:

طريقة عمل بطاطس هاسلباك Hasselback بالجبنة والثوم

بطاطس Hasselback
بطاطس Hasselback