افكار وعادات صحية لازم تغيريها

ريهام محمود

في

573

لما نتكلم عن العادات الصحية اللي متعلقة بالحفاظ على صحتنا, اكيد كلنا بنمشي ورا العادات اللي سمعناها من اللي حوالينا او قريناها في اي مكان, وبغض النظر عن مصدر المعلومة بنمشي عليها على افتراض انها صح ومفيدة لينا, لكن مش دايما العادات دي بتكون صحية, والنهاردة من خلال موضوعنا هنقولك افكار و عادات صحية لازم تغيريها.

عادات صحية لازم تغيريها:

1- شرب عصير الفاكهة:

لما بنعمل الفاكهة او الخضروات عصير, احنا كنا بنزيل كل الالياف منها, الالياف هي العنصر الاساسي في الفاكهة, ولو عصرناها كده بيضيع كل فايدة الفاكهة, عشان كده لو بتحبي الفاكهة يبقى الافضل تاكليها زي ما هي بدل ما تعصريها.

2- اكل بياض البيض بس وتجنب اكل الصفار:

اشخاص كتير ممكن يكونوا بيتجنبوا اكل صفار البيض لانه بيحتوي على الكوليسترول, وده اكيد ضار بالصحة, لكن الخبر الحلو بقى ان اكل صفار البيض مش بيسبب اي اختلاف في مستويات الكوليسترول في الدم, يعني تقدري تتخلصي من العادة دي وتاكلي صفار البيض وانتي مطمنة على صحتك.

3- بتاخدي فيتامينات بشكل يومي:

الايام دي بنلاقي اشخاص كتير جدا بياخدوا الفيتامينات بشكل يومي عشان يحافظوا على صحتهم, ويحافظوا على مستويات الفيتامينات في الجسم, لكن اللي في كتير ممكن يكون ميعرفهوش انها مش فعالة زي ما احنا متخيلين, وانه الافضل اكل الاطعمة الغنية بالفيتامينات بدل تناول الفيتامينات او المكملات الغذائية.

4- استخدام المطهر لتنضيف الايدين:

لو غسلنا ايدينا على فترات منتظمة خلال اليوم, مش هنحتاج استخدام معقمات او مطهرات للايد خالص, بالاضافة كمان ان في جراثيم مش بتموت باستخدام الصابون او المطهرات, عشان كده من الافضل تجنب استخدامها, وكل اللي نعمله بس اننا نغسل الايد بانتظام خلال اليوم ده هيكون كافي جدا.

5- استخدام Standing desk في الشغل:

اشخاص كتير في الشغل ممكن يختاروا استخدام ال Standing desk اللي بيكون الشغل عليه وانتي واقفة, لكن النوع ده من المكاتب مش بيقدم اي فايدة لحماية جسمك من الامراض, لكن مع ذلك هو ليه ميزة يعتبر مفيد في حرق السعرات الحرارية, وبالتالي لو انتي عايزة خسري وزن في الحالة دي هيكون مفيد ليكي, لكن غير كده يبقى استخدمي المكتب العادي وادي الساقين راحة من الوقوف بشكل مستمر.

6- الاعتماد على مؤشر كتلة الجسم لمعرفة مستوى اللياقة:

على الرغم ان مؤشر كتلة الجسم يعتبر واحد من الطرق اللي كتير من الدكاترة بيستخدموه عشان يحددوا مدى صحة الجسم, لكن هو مش المؤشر الوحيد, لانه بيتجاهل دهون الجسم ومحيط الخصر, ودول عاملين مهمين جدا عشان يتحدد منهم اذا كان الشخص بيعاني من اي امراض القلب او السكر.

7- بنحبس نفسنا لما حد يكح او يعطس جنبنا:

الشخص لما بيكح او بيعطس من غير ما يغطي الانف او الفم, البكتيريا بتنتشر في الهوا بسرعة تتراوح ما بين 80 – 300 كيلو متر في الساعة, ولو اي شخص حواليكي كح او عطس لو انتي كتمتي نفسك بس ومش مغطية الفم والانف مش هيحصل فرق كبير وممكن تصيبك عدوى بسبب السرعة اللي بتنتشر بيها البكتيريا في الهوا.

8- بتاكلي الاطعمة قليلة الدهون بس:

هنلاقي تقريبا معظم الاشخاص اللي ماشيين على نظام غذائي لانقاص الوزن بيعتمدوا على اكل الاطعمة قليلة الدهون, لكن حسب الابحاث والدراسات اللي تم اختبارها على الاشخاص اللي بياكلوا في نظامهم الغذائي اطعمة قليلة الدهون لاحظوا ان مافيش اختلاف في وزنهم, وفي الواقع ان المتخصصين بينصحوا انك تدخلي اكلات بتحتوي على دهون صحية في نظامك الغذائي من مصادر زي السمك, والمكسرات وغيرها من مصادر الدهون الصحية, عشان كده لو انتي ماشية على نظام غذائي قليل الدهون, يبقى غيري العادة دي.

9- استخدام غطا لقعدة التواليت لمنع انتشار العدوى:

غطا قعدة التواليت متوفر دلوقتي في اماكن كتير وهنلاقي اشخاص كتير بيستخدموه في التواليتات العامة وبنفكر انه بيمنع انتشار العدوى وبيحمي صحتنا, لكن هل تعرفي ان الفيروسات ومسببات الامراض معندهاش قدرة انها تعيش خارج جسم الانسان؟ فحتى لو استخدمي تواليت استخدمه شخص تاني الفيروسات مش هتقدر تصيب جسمك.

10- تجنب طرقعة مفاصل الصوابع:

اكيد سمعنا من زمان ان طرقعة الطوابع عادة سيئة ومضر جدا للمفاصل وبيضعفها, لكن اظهرت كتير من الدراسات الحديثة انها تعتبر طريقة جديدة بتساعد على تليين المفاصل, والاكتر من كده كمان انها تعتبر علامة ان المفاصل صحية.

11- عدم استخدام الميكروويف لتسخين الاكل:

اوقات كتير بنسمع او بنقرى معلومات وبنصدقها من غير ما ندور اذا كانت صح ولا لا, وواحدة من المعلومات دي هي استخدام الميكروويف لتسخين الاكل عشان بيدمر العناصر الغذائية اللي فيه, لكن ده مش صح خالص, الميكروويف بيستخدم موجات الطاقة لتسخين الاكل, بتدخل في جزئيات الاكل وده بيأدي لزيادة الطاقة في شكل حرارة, والعناصر الغذائية بتبدأ تتفكك, ولكن ده مش بيحصل عشان انتي بتسخني الاكل في الميكروويف, لانه هيحصل نفس الشيء لو سخنتي الاكل في الفرن او على البوتاجاز من فوق او على السخان الكهربائي, يعني الاكل بيفقد قيمته الغذائية من كتر التسخين بأي طريقة مش من استخدام الميكروويف نفسه.

12- استخدام خيط الاسنان قبل النوم:

الكام سنة اللي فاتوا انتشر استخدام خيط الاسنان اكتر, وكل المدونات والمقالات المهتمة بالصحة صرحوا انها عادة كويسة جدا وصحية, لكن الحقيقة ان مافيش دليل قاطع على فعالية الخيط في تنضيف الاسنان, يعني مافيش دراسة بتأكد فعاليتة لحد دلوقتي, عشان كده منقدرش اننا نعتبره عادة صحية.