12 حيلة ذكية للموبايل مكنتيش تعرفيهم قبل كده
الموبايل في وقتنا ده تقريبا مبقاش حد يقدر يستغنى عنه, وبقى يسهل علينا حاجات كتير, وبرغم كده ممكن يكون في بعض الحاجات في الموبايل مش الكل يعرفها, وده اللي هنعرفه النهاردة من خلال موضوعنا هنقولك حيل للموبايل مكنتيش تعرفيها قبل كده.
حيل للموبايل:
1- وقفي خاصية “التدوير التلقائي”:
وقفي خاصية التدوير التلقائي في التليفون واستخدميها بس عند الضرورة لما تحتاجيها, لان تشغيل الخاصية دي بشكل مستمر بيأدي لاستخدام جهاز استشعار خاص اسمه مقياس التسارع وده بيستنزف شحن البطارية وبيخليه يخلص اسرع.
2- اتجنبي استخدام الموبايل اثناء الشحن:
كابل التليفون القصير ده اكيد مش عاملينة عشان يزعجوا المستخدم ويخلوه قاعد جنب التليفون وهو بيتشحن, لكن هدفه انك متستخدميش التليفون اثناء الشحن لان ده بيأثر على عمر البطارية.
3- غيري الموبايل “لوضع الطائرة” لشحنه اسرع:
تبديل الموبايل ل “وضع الطائرة” بيمنعه انه يبحث عن اشارة, وده هيخليه يشحن بشكل اسرع بكتير, وعلى رغم ان الموبايلات دلوقتي فيها ميزة الشحن السريع, لكن مع ذلك الطريقة دي هتفرق معاكي جدا لو عايزة تشحني التليفون بسرعة.
4- القطي لقطات مستمرة:
ميزة او خاصية “اللقطات المستمرة” اللي ممكن يكون في كتير ميعرفوهاش الخاصية دي بتخليكي تلقطي حوالي 20 صورة في الثانية الواحدة, كل اللي هتعمليه انك هتفضلي ضاغطة على زرار التصوير وشوفي اللي هيحصل عندك.
5- استخدام مفتاح مستوى الصوت في لقط الصورة:
احيانا بيكون صعب لقط الصورة بايد واحدة خصوصا لو بتلقطي صورة سيلفي وتليفونك حجمة كبير ممكن الصورة تطلع مهزوزة او التليفون يقع منك, في الحالة دي الخاصية دي هتكون مفيدة جدا ليكي, وهي استخدام مفتاح مستوى الصوت للقط الصورة.
6- لو ركنتي العربية في مكان جديد خدي صورة:
اكيد في كتير اتعرض للموقف ده انه يركن العربية في مكان جديد اول مره يروحه وينسى هو ركنها فين, عشان كده لو اي شخص ركن عربيته في مكان جديد اول مرة يروحه او مكان لسه مش حافظه, ممكن يلقط صورة بحاجة مميزة جنب مكان العربية عشان تفكره.
7- ازاي تحسني الصوت اثناء تسجيل فيديو:
ممكن تحسني جودة الصوت لاي فيديو عن طريق تغطية فتحة الميكروفون, والسبب ورا نجاح الحيلة دي انك بتغطي الفتحة بتاعته من اي دوشة في الخلفية وده هيخليكي تسمعي الصوت الرئيسي بشكل افضل, كل اللي هتعمليه بس غطي الميكروفون باستخدامك صوباعك اثناء تسجيل الفيديو.
8- استخدام النضارة كفلتر:
لو حاسه ان الاضاءة زيادة عن اللزوم في الصورة وشايفة انه ممكن يأثر على جودة الصورة او عايزة صورة بشكل مختلف, كل اللي هتعمليه انك تلقطي الصورة من خلال عدسة النضارة الشمس, بالطريقة دي هتقللي وهج الاضاءة وهيحسن الاضاءة ويظبطها ويخليها تطلع بشكل افضل.
9- الخلفية السودا للموبايل بتحفظ البطارية:
الخلفية اللي فيها الوان كتير وفاتحة واحدة من الطرق اللي بتستنزف البطارية بشكل اسرع, وعشان تتفادي ده بكل بساطة خلي خلفية الموبايل غامقة.
10- ازاي تنضفي شاشة الموبايل بشكل صح:
اظهرت الدراسات ان شاشة موبايلك فيها بكتيريا اكتر من اللي موجودة في قعدة التواليت, لكن الموبايل يوميا بيلمس اسطح كتير والايد اللي ممكن تكون مش نضيفة, لكن لحسن الحظ كل اللي انتي محتاجاه عشان تنضفي شاشة الموبايل هو خليط من 80% مية و 20% كحول, حطي الخليط في ازازة ببخاخ ورشي على الشاشة وامسحيها بمنديل او فوطة ناعمة.
11- تضخيم صوت منبه الموبايل:
لو نومك تقيل شوية ومش بتسمعي منبه الموبايل بسهولة وخايفة تروح عليكي نومة الصبح, يبقى الحيلة دي هتفيدك جدا, حطي الموبايل في كوباية او مج, بالطريقة دي صوت المنبه هيبقى اعلى.
12- اعملي ريستارت للموبايل على الاقل 3 مرات في الاسبوع:
مش المفروض ان التليفون يشتغل بأقصى سعة طول الاسبوع بشكل يومي وده السبب اللي ممكن يخليه يهنج في بعض الاوقات, عشان تشغليه بسلاسة اعملي ريستارت او اعادة تشغيل على الاقل 3 مرات في الاسبوع, بالطريقة دي هيتم اعادة ظبط التطبيقات, والموبايل هياخد استراحة ويرجع يشتغل معاكي احسن من غير ما يهنج منك.
نتمنى ان الحيل ده تفيدكم وتجربوها, واللي يعرف حيل غيرها جربها ممكن يشاركنا بيها.