روتين العناية بالمنطقة الحساسة عشان تحافظي عليها صحية

ريهام محمود

في

37605

الجلد في منطقة البكيني يعتبر من اكتر انواع البشرة حساسية وبيتأثر باي حاجة بسرعة, وممكن لو مارسنا عادات غلط في العناية بالمنطقة دي تسبب التهيج والالتهاب والحكة وخصوصا عند ازالة الشعر, عشان كده الروتين الصح للعناية بالمنطقة دي واستخدام المنتجات المناسبة هيحافظ عليها صحية بشكل عام, وده اللي هنعرفه النهاردة من خلال المقال بتاعنا هنقول لكل بنات حوا روتين العناية بالمنطقة الحساسة.

روتين العناية بالمنطقة الحساسة:

1- نضفي المنطقة بصابون خفيف:

مركز الصحة بجامعة الينوي الامريكية بينصحوا باستخدام الصابون الخفيف, وتجنب تماما استخدام الصابون القاسي المليان بالعطور والاصباغ, بدل كده استخدمي الصابون المصنوع مخصوص للبشرة الحساسة, واتجنبي كمان فقاعات الشاور المعطرة, والعطور, ومنتجات النضافة المعطرة لانها ممكن تسبب تهيج وعدوى في المنطقة, ممكن تستخدمي للمنطقة غسول زي سيتيال, او كير فري, او سيباميد.

2- قشري المنطقة كل اسبوع بالليفة والصابون خصوصا وقت ازالة الشعر:

التقشير بيساعد على ازالة الجلد الميت الموجود على سطح منطقة البكيني, وممكن كمان يساعد على تقليل مشكلة نمو الشعر تحت الجلد, ومش مطلوب لتقشير المنطقة الحساسة استخدام كريمات او الفرك بقوة, الليفة مع الغسول هتكون كافية للتقشير الاسبوعي, وللتنضيف اليومي استخدمي ايدك بس مع الغسول.

3- اختاري طريقة ازالة الشعر المناسبة لنوع بشرتك:

لو بشرتك حساسة ومعرضة للشعر اللي تحت الجلد في الحالة دي الحلاقة مش هتكون مناسبة ليكي, لانها ممكن تأدي لظهور الشعر تحت الجلد وتهيج المنطقة, وتعتبر مزيلات الشعر زي الكريم او اللوشن هي انسب واامن الطرق للبشرة الحساسة اللي مش هتسبب مشاكل للجلد, وبشكل عام يعتبر الشمع من افضل وسائل ازالة الشعر برغم انه ممكن يكون مؤلم عن الوسائل التانية لكن نتايجة افضل وبتقعد فترة اطول, وممكن تستشيري دكتور الجلدية لازالة الشعر بالليزر عشان تتخلصي من الشعر الزايد بشكل دايم.

قبل حلاقة المنطقة الحساسة بننصحك تقعدي شوية في حمام مية دافية, لان المية الدافية بتساعد على ترطيب بصيلات الشعر, وده هيخلي الحلاقة اسهل, وهيقلل من المشاكل اللي ممكن تحصل في البشرة بعد ازالة الشعر.

4- اتجنبي الشعر تحت الجلد في منطقة البكيني:

الشعر اللي تحت الجلد هو بيكون عادة الشعر اللي بينمو بشكل مش صح او بيتجعد تحت الجلد, وغالبا بيكون مكانه ملتهب وبيتكون نتؤات او بثور, ومشكلة الشعر تحت الجلد تقدري تتجنبيها عن طريق التقشير, ولو بتستخدمي مكنة حلاقة لازالة الشعر في المنطقة اتأكدي انك تستخدمي مكنة جديدة والحلاقة في اتجاة نمو الشعر.

ومن الحاجات المفيدة جدا ويمكن كتير ميعرفش المعلومة دي ان الشاي الاسود مضاد للالتهابات, ممكن استخدامه على منطقة البكيني يساعدك في التخلص من الالتهابات ونتؤات وبثور المنطقة الحساسة بشكل سريع, اعملي الشاي بالطريقة العادية وسيبيه يبرد وبقطنة طبقيه على منطقة البكيني.

جل الالوفيرا كمان من الحاجات المرطبة والمهدئة لمنطقة البكيني.

في كريمات كمان مضادات حيوية ضد الالتهاب زي كريم نيوسبورين وكريمات الهيدروكورتيزون مفيدة في علاج والوقاية من بثور منطقة البكيني, وكريم Bikini zone اللي معمول مخصوص لمنطقة البكيني عشان يوقف ويعالج التهيج بشكل فوري, وممكن استخدامه بشكل مستمر يساعد في منع التهيج على طول.