ازاي تخليه يشتاقلك وتبقي وحشاه وبيفكر فيكي دايما

ريهام محمود

في

54519

اي بنت مرتبطة اكيد تحب ان الشخص اللي هي مرتبطة بيه يشتاقلها وتوحشه وهي مش معاه, ويبقى عايز يقابلها بسرعة ويفكر فيها وهي مش موجودة, خصوصا لو انتي بتفكري فيه طول اليوم, لحسن الحظ ان في 5 طرق تخليه يشتاقلك وتوحشيه ويفكر فيكي على طول.

طرق تخليه يشتاقلك:

1- متبقيش دايما متاحة:

لو عايزة شخص يشتاقك فعلا, يبقى اول خطوة تعمليها انك متبقيش دايما متاحه قدامة وتقللي من الوقت اللي بتقضيه معاه, اكيد لو انتي بتحبي شخص هتبقي عايزة تكوني معاه صبح وليل ومتفوتيش اي لحظة, لكن لو انتي دايما موجودة مش هتديه فرصه انه يشتاقلك, لكن لو قللتي الوقت اللي بتقضوه مع بعض هتديه فرصه انه يفكر فيكي وتوحشيه, فلو انتي شخص على طول متاح احنا بنقولك لما يكون الموضوع متعلق بالعلاقات والرجالة يبقى ده الوقت انك تكسري القاعدة دي وتغيريها وتحاولي تعملي كنترول على نفسك اكتر وتقللي من وجودك قدامه.

2- خليكي غامضة:

انك تحافظي على شوية غموض في شخصيتك ده مش بس بيجذب الراجل ليكي اكتر لكن كمان بتخليه يشتاقلك, يعني مثلا لو خليتي شوية غموض على المكان اللي موجودة فيه وانك متقوليش كل التفاصيل الخاصة بيكي, ده هيخليه يقعد يفكر ويسأل نفسه وهتبقي شاغله تفكيره طول ما انتي مش معاه.

لما تكوني قادرة انك تعملي شوية غموض في حياتك, هتلاقيه بيشتاقلك وهيسأل نفسه طيب هي فين ومع مين وبتعمل ايه, ولما يتخيل كمان انك مع اصحابك ومبسوطة وبتضحكي, هتكون النتيجة انك هتوحشيه وهيتمنى انه يكون معاكي في المكان اللي انتي فيه.

3- خدي وقتك في الرد عليه:

لما يبعتلك مسج في اي وقت, هل تردي عليه على طول في نفس اللحظة؟ على الرغم من انك هتبقي عايزة تردي عليه بسرعة لانك بتحبيه, لكن احنا بنقولك ان الاستجابة السريعة دي مش بتقدملك اي مميزات لما يتعلق الموضوع انه يشتاقلك, لكن من ناحية تانية لو اخدتي شوية وقت على ما تردي عليه وتخليه يستنى الرد, الوقت ده ممكن يعمل حاجات كتير ويخليه يشتاقلك ويفكر فيكي وهو بيبص لموبايله ومستني منك رد, ومافيش قاعدة بتقول انك المفروض تردي بسرعة او في نفس اللحظة, خدي وقتك في الرد عشان توصلي له انك تستحقي الانتظار.

4- انهي كل حاجة بشكل مختلف:

لو بتدوري على طريقة ذكية وفي نفس الوقت تكون قوية تخليه يشتاقلك, يبقى دلوقتي جيه الوقت انك تسيطري بشكل اكبر الطريقة اللي بتنهي بيها محادثاتك النصية والهاتفية معاه وكمان حتى في مقابلاتك معاه, يعني مثلا لو بتتكلموا في التليفون خليكي انتي الشخص اللي ينهي المكالمة الاول مش هو, او لو مع بعض في مكان خليكي انتي كمان الشخص اللي يقرر انه يمشي الاول, لو عايزة شخص فعلا يشتاقلك, فالخدعة او الحيلة الاساسية انك تسيبيه دايما عايز اكتر ويفتكر وقتكوا مع بعض بعد ما تسيبيه.

لما تقدري تتحكمي في طريقتك معاه, في الوقت ده هتخليه يقعد يفكر فيكي بعد ما تسيبيه ودايما هتوحشيه لانك دايما الشخص اللي بينسحب او بينهي الاول.

5- خلي ليكي حياتك الخاصة:

الاهم من كل اللي فات, اللي ممكن يخلي الشخص اللي مرتبطة بيه يشتاقلك ان يبقى ليكي حياتك الخاصة, لو انتي شخص بيحط اصحابه وهواياته واهتماماته الخاصة على جنب عشان تقضي وقت اكتر مع الشخص اللي انتي مرتبطة بيه, يبقى جيه الوقت انك تغيري ده وتعيدي التفكير في استراتيجيتك معاه, لما تحبي شخص ده مش معناه انك تهملي كل الاشخاص اللي بتحبيهم او اهتماماتك, خصوصا ان حياتك الخاصة دي هي اللي بتكون شخصيتك وبتخليكي شخص جذاب للي حواليكي, فلو عايزة الشخص اللي انتي بتحبيه يشتاقلك اكتر, يبقى مهم انك تحافظي على هواياتك واهتماماتك واصحابك وتستمتعي بوقتك, وتقضي وقت بعيد عنه.

الراجل لازم يبقى اضافة لحياتك, ميبقاش هو المركز اللي بتدوري حواليه والتركيز كله معاه هو بس, فلو عايزاه يشتاقلك فعلا, يبقى ضروري تستمري انك تعملي الحاجات اللي بتخليكي انتي وتحافظ على شخصيتك المستقلة.