نصايح تطوير العلاقة بينك وبين والدتك وانتي في سن العشرينات

 علاقة اي بنت بأمها بتتطور وبتتغير من سن لسن، يعنى علاقتك بوالدتك  وانتى طفلة غير طبعا وانتى في سن المراهقة وبتتحولى لبنت كبيرة و طبعا بيبقى في تغيير جذري في مرحلة العشرينات وما بعدها، وطول السنين دي الخناقات والاختلافات مابتنتهيش، وكمان الزعل ممكن يكون بيكتر ، لكن الحقيقة هي ان اوقات الزعل والاختلافات دي هي اللي بتطور علاقتك بمامتك وبتقويها ولما بنكبر في السن وبندخل في مرحلة العشرينات علاقتنا بوالدتنا بتاخد شكل ومنحنى جديد خالص خصوصا مع درجة النضوج والاستقلالية اللي المفروض نكون بنوصلها، وعشان توصلي لتفاهم أكتر وعلاقة أقوى مع والدتك ، اعرفي في المقال ده نصايح تطوير العلاقة بينك وبين والدتك  وانتي في سن العشرينات

خدي بنصيحتها

طول عمرنا بنلجأ لنصيحة الأم في أي حاجة في حاجة في حياتنا سواء كانت مشكلة او لا، ومع تقدمنا في السن ساعات بنعتبر النمصيحة دي تدخل كبير في حياتنا بالذات لما بيبدأ الكلام بجملة “لازم تعملي كذا .. ” ، لكن الجميل في كونك دخلتي مرحلة العشرينات هو انك ممكن تسمعى نصيحة مامتك وتاخدي رأيها في كل حاجة و تنفذي النصيحة دي أو لا حسب وجهة نظرك انتي وحسب  الحالة اللي بقيتي عليها من الاستقلالية والدفاع عن النفس، عشان كده ممكن ببساطة تفكرى في رأي مامتك ولو لاقيتيه مش مناسب ليكى ممكن ماتنفذيهوش ومن غير مشاكل، بس مش هتبقى لغيتي دورها في حياتك ولما تاخدي رايها هتحسسيها باهمية وجودها معاكي وان رأيها ونصيحتها مهمة ليكي وبتنورلك الطريق.

اعرفي عنها اكتر و صاحبيها

في مرحلة العشرينات بتكوني كبرتي بالدرجة الكافية انك تفهمي والدتك على انها انسانة ليها كيانها وشخصيتها، وفي حاجات بتبسطها وحاجات بتنرفزها زيها زي اي بني آدم مستقل له تفاصيله الخاصة بيه، ولما بنكبر لازم نستوعب ده اكتر ونبدأ نشوف الام وكأنها انسان مستقل ممكن يزهق او يبقى عايز يتنفس ويحس باستقلاليته بعيد عن كل المسؤوليات اللي عليه، عشان كده في المرحلة دي لازم تحاولي تقربي من والدتك وتعرفي عنها اكتر كشخص مستقل وبعيد عن دور الأم، وتفهمي تفاصيلها وحياتها اكتر وكمان مهم جدا تحاولي تصاحبيها و تقربي منها وتسمعي لمشاكلها وتخليها تحس انك صديقة ليها بجد.

دوري على الحاجات المشتركة بينكم

مهم تدوري دايما على الحاجات المشتركة ما بينكم، انتي ست وهي كمان ست وبينكم كتير حاجات وخبرات مشتركة، ومعظم المواقف اللي هتعيشها هي ممكن تكون مرت بيها واكتسبت فيها خبرة بسبب فرق السن بينكم، كمان اتكلموا مع بعض هتلاقيكوا بتحبوا نفس أنواع الأكلن أو نفس أنواع المزيكا والأفلام، يعنى كل ما تقربي بينها حاولى تدري على الحاجات المشتركة بينكم، الحاجات دي هي اللي هتقربكم من بعض وتخليكم اصحاب أكتر. 

اتقبلي انها ممكن ساعات ماتفهمكيش

هي والدتك والمفروض تستوعبك وتفهمك وتحتويكي صحيح، لكن كمان دلوقتي الدور عليكي انك تستوعبيها وتفهميها وتحتويها، فلازم تتقبلي انه في فرق بين في طريقة التفكير والتصرف بينكم بحكم فرق الزمن والتطور اللي بقينا فيه، وكمان بحكم فرق السن وظروف التربية والخبرة، فلازم تفتكري دايما ان كتير من الحاجات اللي بالنسبة لك عادي ممكن تكون بالنسبة لها مش عادية أبدا، وان حاجات كتير في حياتك هي ممكن ماتقبلهاش ولا تستوعبها ولا تفهمها. 

افتكري دايما انك مش المتحكم الوحيد في العلاقة ما بينكم

في علاقتك بمامتك، وحتى في اي علاقة في حياتك افتكرى انه العلاقات دايما بيتحكم فيها طرفين و بتبقى ماشية في اتجاهين، عشان كده طولة البال والتفهم والتفاهم مطلوبين جدا لأن مش كل حاجة هتمشي على مزاجك ومش كل الامور هينفع تفكري فيها من وجهة نظرك انتى لوحدك، فافتكرى دايما انك مش المتحكم الوحيد في العلاقة ما بينكم وان دايما هيكون في اختلاف في وجهات النظر والاختلاف ده هو اللي هيطور اى علاقة بينكم ويقويها. 

اعرفي معانا كمان 10 طرق لجذب العلاقات الايجابية لحياتك