طرق وحيل ذكية ترجعي بيها هدومك القديمة جديدة تاني
اوقات كتير ممكن تحصل حاجات بسيطة تبوظ لنا هدومنا زي بقع او الهدوم تكش او لونها يبهت وغيرها من الحاجات اللي ممكن تقابلنا ومبنبقاش عارفين نتصرف فيها ازاي خصوصا لو قطعة هدوم بنحبها بنزعل عليها اوي, عشان كده النهاردة من خلال موضوعنا هنقولك طرق تصلحي بيها الهدوم وترجعيها جديدة تاني.
طرق تصلحي بيها الهدوم:
1- لتنضيف الشوز ال suede او جلد الغزال:
لو الشوز فيه بقعة او مش نضيف عشان تنضفيه استخدمي ليفة سلك افركي بيها البقعة كويس, وافركي باقي الشوز كله بالليفة, ولو بعد التنضيف الشوز مبلول ممكن تستخدمي سفنجة من اللي بنستخدمها في تنضيف الاطباق العادية عشان تمتص باقي المية اللي في الشوز.
2- للحفاظ على سوستة الهدوم:
مع استخدام السوستة لفترة طويلة بيحصل كتير انها ممكن تتفك وتبوظ, وعشان تمنعي ده يحصل ممكن تدهني السوستة بمقوي اظافر او سبراي مثبت الشعر.
3- ازالة الروايح الكريهة من الشوز:
اوقات كتير ممكن الشوز يبقى فيه ريحة كريهة بسبب البكيتريا لما بتتفاعل مع العرق, وعشان تتخلصي من الريحة ده ومتسببش ليكي اي مواقف محرجة, هتحتاجي انك تحطيها في مكان حرارتة منخفضة, لو اختيار انك تطلعيه في البلكونة هيكون صعب بسبب مثلا الجو, ممكن تحطي الشوز في كيس بلاستيك وتحطيه في الفريزر لمدة من 12 – 24 ساعة.
4- ازالة بقع مزيل العرق من الهدوم الغامقة:
اوقات كتير ممكن مزيلات العرق تسيب بقع على الهدوم وبتبان بشكل اكتر على شكل بقع بيضا مع الالوان الغامقة, تقدري تتخلصي من البقع دي بطريقة بسيطة جدا باستخدام الويبس, افركي بيه البقعة هتلاقيها اختفت.
5- استعادة الوان الهدوم الباهتة:
مع الاستخدام والغسيل الكتير ممكن الوان الهدوم تبهت ولونها ينطفي شوية, عشان ترجعي اللون تاني وتحافظي على الالوان لفترة اطول, ممكن تستخدمي الخل الابيض مع الملح العادي, الخل هيبقى مفيد جدا للهدوم لانسجة الهدوم, ضيفي كمية من الخل مع من 2 – 3 معالق كبيرة ملح وضيفيهم لمسحوق الغسيل, هيرجعلك الوان الهدوم.
6- الحفاظ على الصوف من فقدان لونه, والعته, والحكة:
مع تخزين الهدوم الصوف ممكن لونها يبهت او تتعرض للعته, وعشان تحافظي عليها حطي البلوفر الصوفر في كيس بلاستيك وحطيها في الفريزر, درجات الحرارة المنخفضة هتقتل العته, وتقدري تتخلصي من الحكة عن طريق بل البلوفر بالمية وبعدين حطيه في كيس بلاستيك وحطيه في الفريزر لمدة 10 ساعات, بعدها طلعية وحطيه تحت المية الدافية عشان يفك وتنشفيه.
7- اعادة اللون الابيض للملابس الداخلية:
الملابس الداخلية البيضا مع الاستخدام ممكن لونها يصفر, عشان تحلي المشكلة دي ممكن تستخدمي مية الاكسجين, ضيفيها للمية العادية اللي هتغسلي بيها الهدوم مع المسحوق, وانقعيه لمدة ساعتين, وبعدين اشطفيه بالمية.
8- عشان الهدوم متلزقش في الجسم:
بيحصل كتير ان ممكن الهدوم تلزق في الجسم خصوصا مع الخامات الناعمة زي الحرير والساتان, وعشان تحلي المشكلة دي استخدمي عنصر معدني, قبل ما تلبسي الهدوم ممكن تمرريها على شماعة معدن هتخلصك من المشكلة.
9- لازالة بقع التوت او الفاكهة:
الحيلة دي هتكون فعالة في حالة لو البقعة لسه جديدة, امسكي القماش شدية بايدك وحطي على البقعة مية مغلية وسيبيها لحد ما البقعة تختفي, وازالة البقع عادة من الاقمشة الطبيعية بيكون اصعب من الهدوم اللي مصنوع من خامات صناعية.
10- لازالة ريحة العفن:
الهدوم اللي بتتخزن في الدولاب لفترة طويلة ممكن يبقى ليها ريحة مش حلوة زي ريحة العفن, وعشان تتخلصي من الريحة دي هتحتاجي لتخفيف الكحول بالمية بنسبة 1:2 يعني المية تكون ضعف كمية الكحول, وحطي المحلول ده في ازازة ببخاخ ورشي بيه الهدوم.
11- التخلص من انكماش الهدوم:
الطريقة دي بتكون فعالة جدا مع البلوفرات بشكل خاص, ضيفي كمية من الشامبو او بلسم الشعر لمية دافية وممكن كمان تضيفي شوية من منعم الاقمشة, انقعي فيها الهدوم لمدة 30 دقيقة على الاقل وبعدين اشطفيها بالمية العادية.
12- ازالة علامة حرق المكوى من على الهدوم:
لو نسيتي المكوى على الهدوم او كانت سخنة زيادة عن اللزوم وسببت بقعة حرق, افركي البقعة بقطعة قماش مبللة ببروكسيد الهيدروجين “مية الاكسجين”, بس خلي بالك لو هتستخدميها على لون غامق اختبريه على جزء صغير الاول لان مية الاكسجين ممكن تأثر على بعض الخامات او الالوان وتخلي لونها يبهت.