افكار مختلفة لاستخدام اللون الاسود في ديكور الحمام
لو كنتي من عشاق اللون الاسود في الديكور والاثاث, النهاردة هنقولك افكار لديكور الحمام باللون الاسود, وهنقولك نصايح ازاي تدخليه فيي ديكور الحمام بطريقة صح.
نصايح لاستخدام اللون الاسود في ديكور الحمام:
– اللون الاسود هو لون الشياكة والفخامة الغموض, لكن اللون الاسود مش بننصحك بيه لو حمامك مساحته صغيرة, لان اللون الاسود مش بيعكس الاضاءة وبالتالي هيبين شكل الحمام اصغر, لكن لو حمامك صغير وعايزة تستخدمي اللون الاسود هل في حل في الحالة دي؟ الحل انك تدخلي اللون الاسود في قطع الحمام زي الحوض والبانيو والتواليت كلها او قطعة واحدة منهم بس, لكن لازم تحطي جنبه حاجة باللون الابيض عشان يكسر اللون ويسيطر على اضاءة الحمام, ويبقى في تناسق بين اللونين يدي شكل افضل للحمام.
– اما بقى لو مساحة حمامك واسع في الحالة دي تقدري تعملي الديكور باللون الاسود براحتك, لانه في الحالة دي هيتناسب مع حجم الحمام واللون الاسود بيدي فخامة واناقة للحمامات الواسعة, وتقدري كمان تختاري قطع الحمام باللون الاسود, او تنسقي بين اللون الاسود والابيض مع بعض, او تستخدمي اللون الاسود للحيطان ولقطع الحمام وتختاري اكسسوارت ملونة زي الصبانة وكاس فرش الاسنان وسلة المهملات وغيرها من اكسسوارات الحمام, عشان تعملي تناسق في الالوان والحمام ميبقاش مقفول او غامق اوي.
– اتجنبي استخدام اللون الاسود في السقف لو سقف الحمام مش مرتفع, لان ده هيبين قصر الحيطان وعدم ارتفاع السقف, وهيدي الحمام مساحة اصغر من مساحته الطبيعية.
– ولو الحمام مساحته صغيرة تقدري تعملي الارضية باللون الاسود هيكون مناسب ومش هيأثر على المساحة.
تعالوا نشوف مع بعض بالصور افكار لديكور الحمام باللون الاسود:
تدرج الوان دهانات الحوائط احدث موضة في الديكور
