طريقة عمل بطاطس هاسلباك Hasselback بالجبنة والثوم
البطاطس واحدة من الاكلات اللي مافيش حد فينا تقريبا مش بيحبها, وبناكلها بطرق مختلفة سواء مقلية, او بطاطس مهروسة, بطاطس في الفرن, بطاطس جراتان وطرق تانية كتير ليها, والنهاردة هنقولك على طريقة سهلة ولذيذة جدا هي بطاطس Hasselback بالجبنة والثوم.
بطاطس Hasselback بالجبنة والثوم:
المكونات:
6 حبات بطاطس من متوسطة لحجم كبير.
½ كوباية زيت زيتون.
¼ جبنة بارميزان مبشورة.
6 فصوص ثوم مفرومة ناعم.
½ معلقة صغيرة بابريكا.
1 معلقة صغيرة زعتر.
2 معلقة كبيرة بقدونس مفروم + كمية للتزيين.
ملح – فلفل.
من 113 – 170 جرام جبنة متقطعة شرايح رقيقة “ممكن تستخدموا جبنة موتزاريلا, شيدر, اي نوع جبنة تفضلوها”.
طريقة التحضير:
1- اول حاجة حطي الرف في نص الفرن, وسخني الفرن على درجة حرارة 230 درجة, وحطي عليها ورق خبز او ورق فويل او ورق زبدة, وسيبيها تسخن لحد ما تحضري البطاطس.
2- هاتي البطاطس اغسليها كويس جدا, وقطعيها من فوق شرايح رفيعة لحد قرب اخر البطاطسية بحيث ان الشرايح كلها تبقى شابكة في بعض, وممكن عشان تتقطع معاكي بشكل مظبوط تجيبي معلقتين خشب حطيهم على جوانب البطاطساية من الناحيتين وقطعي واول ما السكينة تخبط في المعلقة توقفي, بالطريقة دي التقطيعات هتطلع معاكي مظبوطة من غير ما الشرايح تنفصل عن بعضها.
3- هاتي طبق اخلطي فيه زيت الزيتون مع الجبنة البارميزان والثوم والبابريكا والزعتر والبقدونس والملح والفلفل, وقلبيهم مع بعض كويس.
4- رصي البطاطس على رف الفرن على ورق الخبز او ورق زبدة, وبعدين ادهني البطاطس كلها بالفرشة بخليط الزيت اللي حضرتيه, غطي البطاطس من فوق بالورق الفويل عشان متنشفش والثوم ميتحرقش.
5- سيبي البطاطس في الفرن لمدة 25 دقيقة, وبعدين طلعيها, هتلاحظي ان شرايح البطاطس اتفتحت.
6- حطي شرايح الجبنة بين شرايح البطاطس, ورجعيها في الفرن تاني مكشوفة, لمدة من 20 – 25 دقيقة كمان, او لحد ما تبقى هشة ولونها دهبي وفي نفس الوقت ناعمة من جوه.
7- طلعي البطاطس من الفرن ورشي عليها بقدونس مفروم, وقدميها وبالهنا والشفا.