ماسكات الاصلاح الليلي عشان تقومي من النوم ببشرة مشرقة ومتجددة

ريهام محمود
ريهام محمود
في
بشرة
24127

شحوب البشرة, الاجهاد, انتفاخات الوجه, كلها من العلامات اللي ممكن تواجهك كل يوم الصبح, ومع ضيق الوقت الصبح اكيد مش بنقدر نعمل ماسكات طبيعية, عشان كده الحل ليكي في الحالة دي هي ماسكات الاصلاح الليلي وهي نوع الماسكات اللي بتحطيها طول الليل وتغسليها الصبح وبتعمل تغذية واصلاح للبشرة اثناء فترة النوم عشان تصحي الصبح ببشرة مشرقة وملمسها ناعم ومتغذية, تعالوا نتعرف عليها مع بعض من خلال السطور الجاية.

ماسكات الاصلاح الليلي:

1- ماسك الليمون وبياض البيض لشد البشرة:

المكونات:

عصير ½ ليمونة.

بياض بيضة.

الطريقة:

اضربي بياض البيض وضيفي له عصير الليمون, قلبيهم مع بعض كويس, اغسلي بشرتك كويس وبعدين حطي الماسك وسيبيه طول الليل واغسليه الصبح بمية دافية.

الماسك ده بيساعد على تنضيف البشرة وشد الجلد, والتخلص من الرؤوس السودا والبيضا, وبيقضي على البكتيريا اللي ممكن تسبب حبوب البشرة.

ماسكات الاصلاح الليلي 1
ماسكات الاصلاح الليلي 1

2- ماسك العسل والشوفان لحب الشباب:

المكونات:

2 معلقة كبيرة عسل.

2 معلقة كبيرة شوفان مطحون.

الطريقة:

اخلطي العسل مع الشوفان لحد ما يبقى عندك خليط ناعم سهل الفرد على البشرة, اغسلي بشرتك وحطي عليها الماسك, وسيبيه طول الليل واغسليه الصبح بمية دافية مع تدليك البشرة في حركات دائرية.

الماسك ده بيساعد على تقشير البشرة, والتخلص من الحبوب, والتخلص من الرؤوس السودا.

ماسكات الاصلاح الليلي 2
ماسكات الاصلاح الليلي 2

3- ماسك الزيوت لترطيب البشرة والتخلص من التجاعيد المبكرة:

المكونات:

50 ملل من زيت عباد الشمس او زيت جوز الهند.

50 ملل من زيت الزيتون.

50 ملل من زيت اللوز الحلو.

الطريقة:

اخلطي كل الزيوت مع بعض, واحفظيهم في ازازة نضيفة, وادهني منهم الوش والرقبة بالليل قبل النوم, واغسلي البشرة الصبح بمية دافية, استخدمي الخليط ده مرتين بس في الاسبوع.

الماسك ده بيساعد على ترطيب البشرة, وبيغذيها بمضادات الاكسدة اللي بتمنع التجاعيد وعلامات الشيخوخة المبكرة.

ماسكات الاصلاح الليلي 3
ماسكات الاصلاح الليلي 3

4- عصير الطماطم لتفتيح البشرة:

عصير الطماطم من افضل الماسكات اللي بتساعد على تفتيح البشرة بأمان جدا, ادهني بشرتك قبل النوم بعصير الطماطم وسيبيه طول الليل واغسليه الصبح بمية باردة.

الطماطم بتحتوي على فيتامين C اللي بيساعد على تفتيح البشرة, وكمان بيساعد على تحفيز انتاج الكولاجين في البشرة, وده بدوره بيمنع التجاعيد والخطوط الرفيعة وبيساعد على نضارة وحيوية البشرة.

ماسكات الاصلاح الليلي 4
ماسكات الاصلاح الليلي 4

5- ماسك الخيار وزيت الزيتون لنضارة البشرة والتخلص من الاجهاد:

المكونات:

2 معلقة كبيرة زيت زيتون.

ثمرة خيار.

الطريقة:

ابشري ثمرة الخيار, وصفيها طلعي منها العصير, اخلطي عصير الخيار مع زيت الزيتون, ادهني بيه البشرة قبل النوم, سيبيه طول الليل واغسليه الصبح بمية باردة, استخدميه 3 مرات في الاسبوع لنضارة البشرة والتخلص من الاجهاد وشحوب البشرة.

ماسكات الاصلاح الليلي 5
ماسكات الاصلاح الليلي 5

6- ماسك الخيار والبابونج لعلاج انتفاخات البشرة والهالات السودا:

المكونات:

ثمرة خيار.

2 معلقة كبيرة من مغلي البابونج.

الطريقة:

ابشري ثمرة الخيار, وصفيها طلعي منها العصير, اخلطي عصير الخيار مع البابونج, ادهني البشرة بالخليط مع التركيز على المنطقة اللي حوالين العين, سيبيه طول الليل واغسليه الصبح بمية باردة, كرريه 3 مرات في الاسبوع.

ماسكات الاصلاح الليلي 6
ماسكات الاصلاح الليلي 6

7- ماسك النشا لعلاج البثور والبقع الغامقة:

المكونات:

¼ معلقة كبيرة نشا.

½ معلقة كبيرة من زيت جوز الهند.

الطريقة:

اخلطي النشا مع زيت جوز الهند, قلبيهم مع بعض كويس, ادهني بشرتك بالخليط قبل النوم مع تجنب منطقة حوالين العين, سيبيه طول الليل واغسليه الصبح, الماسك ده بيساعد على علاج البثور والبقع الغامقة, وشد البشرة.

ماسكات الاصلاح الليلي 7
ماسكات الاصلاح الليلي 7

8- ماسك الزيوت وشمع العسل لترطيب وتغذية البشرة:

المكونات:

معلقة صغيرة من زيت جنين القمح.

معلقة صغيرة من زيت الجوجوبا.

معلقة كبيرة من شمع العسل الطبيعي.

الطريقة:

اخلطي المكونات مع بعض ودوبيهم شوية على النار, سيبي الخليط يبرد شوية, وبعدين ادهني بيه بشرتك, سيبيه طول الليل واغسليه الصبح, الماسك ده بيساعد على ترطيب وتغذية البشرة.

ماسكات الاصلاح الليلي 8
ماسكات الاصلاح الليلي 8

9- ماسك الخيار وزيت الورد لعلاج الخطوط الرفيعة:

المكونات:

¼ معلقة كبيرة من عصير الخيار.

½ معلقة كبيرة من زيت الورد.

معلقة صغيرة عسل نحل او جل الالوفيرا.

الطريقة:

اخلطي المكونات كلها مع بعض كويس, ادهني بشرتك بالخليط وسيبيه طول الليل واغسليه الصبح, المساعد بيساعد على تغذية البشرة والتخلص من الخطوط الرفيعة والحفاظ على شباب البشرة.

ماسكات الاصلاح الليلي 9
ماسكات الاصلاح الليلي 9

ازاي تحسني بشرتك وتخلي شكلها صحي في اسبوعين بس

روتين تحسين البشرة
روتين تحسين البشرة

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

دليل من خبراء التغذية عن افضل الاطعمة لتعزيز جمال البشرة

دليل من خبراء التغذية عن افضل الاطعمة لتعزيز جمال البشرة